Thursday, 30 Aug 2018 21:01 Age: 108 days
Category: Forsidenyhed, Forsidebanner, Pressemeddelelser

AG-mi allaaserineqartoq pillugu ilaasortanut allagaq

AG marlunngorneq 21. august 2018 saqqummersumi, allaaserisaqarpoq IMAKip atuagassiaanit Ilinniartitsisumit allaaserineqartunit marlunnit tunngaveqartumit. Ilinniartitsisoq kingulleq saqqummersoq tigusimaleriissagassiuk allaaserisat tamakkiisumik atuakkit. Aamma Ilinniartitsisoq aasinnaavat uani www.imak.gl -mi.


 

AG-mi tusagassiortup, eqaatsumik pilersaarusiorneq pillugu Ilinniartitsisumi allaaserisat, ilaannakortumik tigulaariffigisimavai, taamaalilluni allaaserisaa ima nipeqalersillugu, siulittaasutut uanga IMAKip ilaasortai isornartorsiorikka. Ilinniartitsisumi allaaserisat taamatut paasineqassanngillat. Allaaserineqarpoq meeqqat atuarfianni eqaatsumik pilersaarusiornerup atorneqannginnerata kingunerigaa, ilinniartitsisut sulinngitsutut nalunaarsorneqartartut naak suliffimminni allanik suliaqarlutik atuartitsinngitsut imaluunniit pikkorissartut. 

 

Eqaatsumik pilersaarusiornerup atorneqannginnerata kinguneraa, angajoqqaat meeqqamik oqaluttuaat aallaavigalugu ulloq taanna ilinniartitsisoq sulinngitsutut nalunaarsorneqarsimasoq, illoqarfimmi naapissinnaasarmassuk. Taamaalilluni ilinniartitsisoq sulinngitsutut nalilerneqartarpoq uffa sulinermut pilersaarutaani allanik suliaqartussatut pilersaarusiorneqarsimammat atuartitsinngitsoq. 

 

Atuagassiami arlalinnik allaaserisaqartoqarpoq meeqqat atuarfianni eqaatsumik pilersaarusiornerup atorneqannginneranut tunngassuteqartunik. Allaaserineqarneranut peqqutaavoq angajoqqaat allallu atuarfiup avataani inissisimasut ilisimasimanngimmassuk ilinniartitsisut aammalumi atuartut sapaatip akunneri tamaasa assigiimmik skemaqartariaqanngitsut, meeqqat atuarfianni eqaatsumik pilersaarusiorneq atorneqarpat meeqqat atuarfiata inatsisaata siunertaa anguneqassammat tassani ilikkagassatut pilersaarutit allallu atuartut pisinnaassutsikkut pitsaasumik atuartinneqarnissaat qulakkeerneqassammata. 

 

Tiimit atuartitsiffissat ukiumoortumik naatsorsorneqartalernerat sulisitsisut piumasarisimavaat, taamaalilluni meeqqat atuarfiata inatsisaani siunertaq naammassineqarnissaanut sakkussat ilagimmassuk aammalu pisariaqanngitsumik vikarinik atuineq pinaveersaarneqassammat. Ajuusaarnarpoq eqaatsumik pilersaarusiornerup qanoq atorneqarnissaa pillugu sakkussanik sulisitsisut sinaakkusiisimanngimmata. Atorneqannginnerata kinguneraa atuartut atugaat ajornerulermata aammalu kommunit  aningaasartuuteqarnerulernerannik – ilinniartitsisullu sulinngitsuukulasutut pisuutinneqarlutik naak suliffitsik paarigaluarlugu.

 

Asasakka ilaasortat Ilinniartitsisumi allaaserisat imatut paasineqassanngillat ilissi isornartorsiorissi – akerlianilli nersualaarpassi. AGp tusagassiortuata allaaserisat allatut paasisassanngorlugit allaaserivai, tassami uissuumminartut piviusuninngaanniit  atuarusunneqarnerusarunarmata.

 

Inussiarnersumik inuulluaqqusillunga/Med venlig hilsen

 

Birthe Therkildsen

IMAKip siulittaasua/Formand for IMAK

 

 

 


Uani annertunerusumik atuaruk:
Medlemsbrev_AG.pdf0.9 M