Tuesday, 4 Dec 2018 11:29 Age: 257 days
Category: Forsidenyhed, Forsidebanner, Ilinniartitsisoq

Ilinniartitsisoq december 2018

Meeqqat atuarfiini pisortat suleqatigiiffiat sammillugu


 

Suliffinni avatangiisit pillugit suliat malunnartumik annertusiartorput, malunnarporlu meeqqat atuarfiini ilinniartitsisut pisortallu unammisassarpassuaqartut. Tapersersorneqarnissamik amigaateqarput, uangalu suna tamaat tikillugu pisortat suleqatigiit ikiorserneqarnissaannik aammalu pisariaqartitaminnik ilinniagaqaqqinnissaat pillugit sulissutigerusupakka.

 

Hans Peter Brobergip aggustimi Ilinniartitsisumi ilinniartitsisunngorlaat ukioq manna meeqqat atuarfiini pisortatut atorfinitsinneqarneri ernumanartoqartillugu uparuarpaa. Qujanartumik. Tassami pisortanngortut amerlanerit tassaapput ilinniartitsisunngorlaat inuusuttut aqutsinermik misilittagaqanngitsut.

 

Tassami taakku pisortanngorlaat inuusuttut suliassamik annertuumik akisussaaffeqalerput, ullumikkummi meeqqat atuarfiat unamminartorpassuaqarmat. Inuiaqatigiit kissaatigingaarpaat meeqqat atuarfianni kinguaariit tullinnguuttut pitsaa sumik angusaqarnissaat, pisortanngorlaalli misilittagakitsut artukkinnginnissaat pingaaruteqarpoq.

 

Meeqqat atuarfii 25-it ukioq manna nutaamik pisortartaarput, kisitsillu annertoorujussuuvoq. Aamma Inatsisartuni ilaasortap Sofia Geislerip (IA) oqallisissatut saqqummiuppaa meeqqat atuarfiini pisortat  pisortatut ilinniartinneqartariaqartut. Kisianni siunnersuutaa ataatsimiititalianut ingerlaqqinngilaq. Pissanganarpoq qanoq politikerit tamanna malersorniarneraat, kisianni ilanngutinngitsoorusunngilara uparuassallugu:

 

Tassami atuarfiup pisortaa kisiat aammattaarli pisortat tamaasa ilanngullugit ikiortariaqarput tapersersortariaqarlutillu. Pisortaq, pisortap tullersortaa alloriarfinnilu pisortat tamarmiullutik pikkorissarnernut ilinniagaqaqqinnernullu peqataatinneqarnissaat pingaaruteqartorujussuuvoq. Taamaattumik inatsimmi ilanngunneqarpat qulakkeerneqassaaq maannakkut siunissamilu qanoq isumannaarneqassanersoq. 

 

Taamaaliunngikkutta meeqqat atuarfianni unamminartorpassuit alliartuaassapput qanoq iliuuseqarfigineqarsinnaajunnaarlutik. Piukkunnartumik atuarfiit ataasiakkat pisortaqanngippata, ilinniartitsisut akornanni pisariaqanngitsumik pissaanerunniullutik pilersinnaapput, tunoqqutaarillutik ingutsinerit tamakkua tamarmik ilinniartitsisunut stressimik napaateqalersit sisinnaasut, taamaattoqarnissaalu kissaatiginngilluinnarparput. 

 

Taamaalinikkut najukkami nukiit pigineqartut atorluarnissaat pisariaqarpoq. Meeqqat atuarfii kommunimilu atuarfeqarfinnut qullersaqarfiit atuarfiit pillugit suliaminnik tapersersoqatigiittariaqarput. Kommuneqarfik Sermersuumi atuarfeqarfinnut qullersaqarfimmi sulisut amerlalaartukasiupput, kommuninut allanut naleqqiullugit. Taamaattumik pingaaruteqarpoq kommunimut attaveqartuaannarnissaq,  tamannalu siulima Sivso Dorphip pingaartillugu sulissutigisimavaa. Maani Kommuneqarfik Sermersuumi borgmesteri sulisuilu ataatsimeeqatigisimavagut immitsinnut paasissutissanik avitseqatigiinniarluta. Isumaqatigiippugullu tamanna ingerlatiinnassallugu siulersuisunilu taassuma piviusunngortinneqarnissaa suna tamaat tikillugu isumagissavarput. IMAK-imi suleqatigiiffeqarusuppoq sulissutigerusullugulu meeqqat atuarfiini sullivinnut avatangiisiat siumut isigisumik pitsanngorsaaviginissaat isumagissallugu.  

  

Birthe Therkildsenimi


Uani annertunerusumik atuaruk:
Ilinniartitsisoq_dec_2018.pdf1.8 M