Thursday, 6 Dec 2018 11:25 Age: 78 days
Category: Forsidenyhed, Forsidebanner, Pressemeddelelser

Tamatta akisussaaqataavugut

Naalakkersuisoq Ane Lone Baggerip Inatsisartuni ilaasortap Aqqa Samuelseni § 37 naapertorlugu apeqqutaanut akissutaata oqaaseqarfiginera.


 

Ilumoorpoq nunatsinni meeqqat atuarfii kommunit akisussaaffigimmatigit, taamaakkaluartoq kommunit meeqqallu atuarfiisa inuiaqatigiinni ajornartorsiutit tamarluinnaasa aaqqissinnaanngilaat – uani pineqarluni pimmatiginnittarneq. Nalunngilarput pimmatiginnittarneq ataasiakkaanut ajorluinnartumik kinguneqarsinnaasartoq. Ajornanngippallaaqaaq oqassalluni kommunit meeqqallu atuarfiisa suliniuteqarfigissagaat, inuttut, aningaasatigut aammalu pisinnaasassatigut sinaakkutissat pisariaqartut pigineqareernersut qulakkeeqqaarnagit. Pimmatiginnittarneq taamaallaat meeqqat atuarfiini kisimi pineq ajorpoq aammattaarli ilinniagaqarfiusuni allani aammalu suliffeqarfinni allani pisarluni. Soorunami meeqqat atuarfii tassanilu kommunit ajornartorsiutit taamaattut aaqqiissuteqarfiginissaannut akisussaaqataapput. Kisianni inersimasuusugut tamarluinnatta politikkerinit akisussaaffimmik annertuumik tigumminnittuniit, sulisuusut, ilinniartitsisut aammalu angajoqqaat tamattaalluta assigiimmik akisussaaqataavugut. Tassami inersimasut pissusaat pimmatiginnittarnerup pilertarneranut peqqutaaqataanerpaanut ilaavoq. 

 

Naalakkersuisup akissutaani ersarippoq misissuinerit arlaqartut ersersikkaat tamanna ajornartorsiutaasoq ajornartorsiutigineralu annertusiartortoq.  Taamaattumik ataatsimoorluta tamatta akisussaaqataanerput nassuerutigisigu akisussaaffiullu aaqqiissuteqarfiginissaa allanut ingerlateqqinnatigu. 

 

Ilumoorpoq ilinniartitaanermut aqutsisoqarfik saqqummersitsinikuummat sammisamut tunngasunik atortussianik pitsaalluinnartunik, kisianni ineriartorneq ima sukkatigaaq allaat atortorissaarutitigut pimmatiginninneq atugaalersimasoq, taammaattumik tassuunatigut ineriartorneq aamma pisariaqartuassaaq. Atortorissaarutinik atuineq meeqqat atuarfiini, ilinniagaqarfinni tamani suliffeqarfinnilu annertusiartorpoq, taamaalilluni atortorissaarutit aqqutigalugit pimmatiginnittarneq ajornannginnerulerluni – tassuunatigut pimmatiginninneq ilinniartitsisunit, atuarfinnit, angajoqqaanit sulisitsisunillu takujuminaassinnaasarpoq. Taamaattumik sammisap oqallisigiuarnissaa pisariaqarpoq – inuttut inerikkiartornermi atuartitsinerup iluaniinnaanngitsoq aammattaarli ilinniartitsisut, allat atorfeqartut aammalu pisortat pikkorissartarnerannut ilanngullugu ulluinnarni sakkussatut atorsinnaalertussatut. Naalakkersuisoq Ane Lone Baggerip akissutimi eqqaavaa meeqqat atuarfiini toqqissisimaneq pillugu misissuinerit. Taannarpiaq 2015-mi meeqqat atuarfiannik naliliinerup kingorna nangitsinermi eqqaaneqarpoq. Taamanikkut ilinniartitaanermut naalakkersuisoqarfimmiit nalunaarutigineqarpoq, namminersornerullutik oqartussanut  suliffeqarfik toqqissisimaneq pillugu misissuisitsisut, suleqatigigaat. Taamaattumik tamanna isumallualersitsivoq misissuineq atuarfinnut immikkut toqqarneqartunut piaartumik aallartinneqarsinnaasoq kingusinnerusukkullu meeqqat atuarfiini ilinniagaqarfinnilu tamani misissuisoqarsinnaanngorluni. Ajoraluartumik suliniut taanna qanoq ingerlanneqarsimanersoq tusagaqarfigeqqinngilarput. 

 

Ajornartorsiutit ataatsimoorluni aaqqiisuteqarfigineqarpata pitsaanerpaajuvoq – ataatsimoorluta ataqatigiinnikkut oqaloqatigiinnikkullu ajornartorsiutit aaqqiissuteqarfigisigit nammineq silarsuaaratta iluaniiginnarata, taamaalilluta allat aaqqiissuteqarnissaat utaqqiinnarnagu. 

 

IMAKimi siulitaasutut peqatigiiffiit kattuffiillu suliniummik taassuminnga ullumikkut annertuumik suliniuteqareersut qujaffigerusuppakka – taamaakkaluartoq pinngitsoorneqarsinnaanngilaq tamarluinnatta ajornartorsiutip aaqqiissuteqarfiginissaanut akisussaaqataagatta.   

 

Nuuk den 6. december 2018

 

Birthe Therkildsen

IMAKip siulittaasua/ formand for IMAK


Uani annertunerusumik atuaruk:
PM_Vi_har_alle_et_ansvar_dec2018.pdf97 K