Sunday, 6 Jan 2019 09:06 Age: 161 days
Category: Forsidebanner, Forsidenyhed, Pressemeddelelser

IMAKip siulittaasuata Birthe Møller Therkildsenip

ukiortaami oqaaseqaataa.


 

Asasakka nunaqqatikka.

IMAKip siulittaasuatut suliassama pingaarnerit ilagaat, ilaasortatta naammaginartumik akissarsiatigut, atorfeqartitaanikkut aammalu suliffigisap avatangiisitigut peqqinnartuunissaat isumannaassallugit, taamaalilluni meeqqat atuarfiata pitsaasumik inissisimanissaa isumannaarneqassammat.

 

Tamanna ilaasortanut taamaallaat iluaqutaassanngilaq kisiannili aamma atuartut eqqarsaatigalugit. Ilinniartitsisut atuartitsinerat pitsaasuussappat taaneqartut ajunngitsumik inissisimasariaqartut qularnanngilaq.

 

Taamaattumik pingaaruteqarluinnarpoq - atuartut eqqarsaatigalugit – ilinniartitsisut suliartik pingaaruteqartuusoq aammalu suliffimminni avatangiisit eqqarsaatigalugit toqqissisimanartuunissaat misigisimassagaat. Ajoraluartumik ilinniartitsisut amerlasuut nakuusernermut aammalu nakuusernissamik sioorasaarneqartarput, ilaatigut sivisuumik napparsimanermik kinguneqartitsisumik.

 

Taamaattumik sulisitsisunut ukiortaami kissaateqarpunga. Suliffimmi avatangiisit peqqinnartuunissaat isumannaarniarlugu nukiit pisariaqartitat pilersissigit. Tassaappullu ilinniartitsisunut pisortanullu imminut illersorsinnaanermut pikkorissarnerit, qanoq aaqqiagiinnginnerit minnerpaaffissamiitinneqarsinnaaneri aammalu isumannaallisaanermut ataatsimiititaliap pitsaasumik ingerlanneqarnissaannik isumannaarineq. Minnerunngitsumik pisortat tamarmik sullivimmi avatangiisit pillugit inatsisit ilisimassagaat isumannaarneqassaaq, taamaalilluni ajornartorsiutip pereerneragut ikiorsiinermi kingunerlutsitsinnginnissap minnerpaaffissaaniinnissaanik isumannaarinikkut. Suliffimmi nakuuserneq aammalu nakuusernermik sioorasaarinerit paquminartutut isigineqassanngillat.

 

Meeqqat atuarfiini pisortat suliamik suliarinissaanut ataavartumik piginnaanngorsarneqarnissaat sulisitsisut  piumasarisaasut malillugit isumannaarinissaat pingaaruteqarluinnarpoq. 

 

Minnerunngitsumik eqaatsumik pilersaarusiorsinnaanerup atorneqarneratigut, ilinniartitsisut atuarfimmi allamik suliaqartariaqartut, angajoqqaanik sulinngitsutut isigineqalissanngippata. Eqaatsumik pilersaarusiornerup atorneqannginnera pillugu ilinniartitsisut sulinngitsuukulasutut nalilerneqartarput.

 

Sulisitsisut aamma akisussaaffigaat ilinniartitsisut piginnaassutsikkut ataavartumik naleqqussarneqartuarnissaat. Pisortat aammalu ilinniartitsisut suliaat allanngorartuarput, tassami meeqqat atuarfiat inuiaqatigiit inissisimanerannut tarrarsuutaavoq. Inuiaqatigiit ineriartortuartut.

 

2018-ip ingerlanerani allaaserineqarlunilu aammalu oqallissigineqartuarpoq atuartut akornanni qinngasaarisarneq. Oqaatigeqqissavara tamatta qinngasaarisarnerup pinngitsoortinneqarnissaa akisussaaffigigatsigu. Meeqqat atuarfiini, ilinniartoqarfinni suliffinnilu qinngasaarineq eqqarsaatigalugu. 

 

Qinngasaartinneq ataasiakkaanut annertuumik kinguneqartitsisarpoq taamaattumik pinnginnissaa tamatta akisussaaffittut tigusigu.

 

Naggataatigut minnerunngitsumik. Atuarfeqarneq ilinniagaqarnerlu pillugit nutarterinissaq aallartereerpoq – soqutigisaqaqatigiit ataqqeqatigiilluta oqallinnikkut peqataatinneqarnikkullu isumannaartigu nutarterineq imarisamigut nutarterinerussasoq ilusimiguinnaq nutarterinerunani. 2002-mi atuarfitsialak pilersinneqarmat kukkussutigut ilinniarfigisigit tassami nutarterinermik piviusunngortitsisussat piginneqataasutut misigisimanissaat pingaarluinnarpoq, piviusunut naleqqersuussinnaanngorlugu. 

 

Ukiortaami pilluaritsi

Birthe Møller Therkildsen

IMAKimi siulittaasoq.


Uani annertunerusumik atuaruk:
Ukiortaami_oqaaseqaat_Nytårstale2019.pdf100 K