Thursday, 31 Jan 2019 15:28 Age: 83 days
Category: Forsidenyhed, Forsidebanner, Pressemeddelelser

Ilinniartitsisut soraarninngornikut nunatta inuerukkiartuinnarnera ernumanartoqartippaat isumaqarlutillu politikerit iliuuseqartariaqartut

Ilinniartitsisut soraarninngornikut Naalakkersuisut kaammattorpaat nunatsinnit nuuttarneq pillugu misisuisitsequllugit aammalu nunatsinniiginnarnissamut nunatsinnullu uternissamut kajuminnarsaarineroqqullugit.


Ilinniartitsisut soraarninngornikut IMAK’imut ilaasortaaffillit Nuummi najugallit 28. januar 2019 soraarninngoraanni atugassarititat pillugit ataatsimiipput. Ataatsimiinnermi IMAK’imi siulittaasoq allaffeqarfimmilu sulisoq aamma peqataapput.  

 

Oqallisigineqartut ilagivaat soraarninngortorpassuit Danmarkimut nuuttarnerat. 2018-imi Nunatta Naatsorsueqqissaartarfianit nalunaarutigineqarpoq kalaallit 60-it sinnerlugit ukiullit Danmarkimi najugallit ukiuni kingullerni qulini marloriaataat sinnerlugit amerlassuseqalersimasut (1109-nit 2339-nut). 

 

Soraarnerit Danmarkimut nuuttarnerannut patsisaasinnaasut 

Sooq kalaalerpassuit Danmarkimut nuuttarnersut misissuiffigineqarnikuunngilaq. Tamaakkaluartoq nuukkusunnermut tunngavilersuutaasartut makku ulluinnarni tusarajuttarpagut: 

  • Tjenestemanditut atorfeqarsimasunut soraarnerussutisiassat nunatsinniikkaanni Danmarkimilu najugaqaraanni nikinganerujussuat. 
  • Utoqqalinersiat Danmarkimi amerlanerunerat. 
  • Inissaqarniarnikkut pissutsit.  
  • Ulluinnarni inuniarnermut DK-mi aningaasartuutikinneruneq. 
  • Peqqinnissaqarnermut tunngasut. 
  • Pisariaqalersilllugu ikiorserneqarsinnaanermut periarfissat. 

 

Politikerit iliuuseqarlik 

Nunatsinnut uggornarpoq soraarninngorlutillu taama amerlatigasut Danmarkimut nuuttarmata. Qularinngilarput pissutsinik allannguisoqaraluarpat amerlasuut nunatsinniiginnarnissartik piumanerussagaluaraat. Piginnaasaat misilittagaallu nunatta pisariaqartippaat!  

 

Siorna april-imi inatsisartunut qineqqusaartarnerni partiit tamakkerlutik nunatta inuerukkiartuinnarnera ernumanartoqartillugu taakkartortarpaat. Neriorsuutigineqartut ilagivaat. 

  • Sooq nuuttoqartarnersoq misissuiffigineqassasoq. 
  • Soraarnerit sulillattaarusuttut utoqqalinersiaminnik ilanngaavigineqartarunnaassasut. 
  • Danmakimi ilinniagaqartut nunatsinnut utertarnissaat suliniarfigineqassasoq. 

 

Oqaq naammanngilaq! Nunarput inuerukkiartuinnassanngippat politikerit qaa nuuttarneq pillugu misissuisitsiniaritsi aammalu nunatsinniiginnarnissaq nunatsinnullu uternissaq kajungernarnerulersillugu.  

 

På vegne af mødedeltagerne 

Marianne Jensen (585249)     William Kriegel (547304)     Fia Kriegel (548857) 


Uani annertunerusumik atuaruk:
PM_pensionist_01_19.pdf83 K