Thursday, 9 May 2019 14:17 Age: 10 days
Category: Forsidenyhed, Forsidebanner, Pressemeddelelser

QANOQ ILILLUTA MEEQQAT ATUARFIANNI ANGUSAT PITSAASUUNISSAAT ILIMAGISINNAAVARPUT, MEEQQAT INGERLAATSIMIT SUMIGINNARNEQARTUARPATA?

IMAKimi siulersuisut piviusulersaarut “ Byen, hvor børn forsvinder “ (“Illoqarfik meeqqat peeruffiat”)

isiginnaarpaat.


 

Suliat ilaat takutinneqartumiit assigiinngissitaarsinnaapput, qularutissaanngilarli ukiuni kingullerni Kommuneqarfik Sermersooq suliniutinik arlaqartunik aallartitsisimammat. Kisianni nalinginnaasumik takusat ersaripput annilaarnarlutillu. Suliarpassuit piviusut tigussaasumik qanoq iliuuseqarfigineqarsimanngillat. Meeqqat inuusuttuaqqallu amerlasuut piffissami sivisuumi ikiorserneqartarsimanngillat.

Meeqqat pisortanit sumiginnarneqartuartut, qanoq ilillutik atuarnerminni pissarsiaqarsinnaappat? Ilinniartitsisup pisoq qanoq ililluni aqussinnaavaa meeqqat allat aamma atuartinneqarnissaat isumagiutigalugit?

Annilaarnaraluartoq taamaattoq- Tasiilamiinnaanngitsoq nunarpulli tamakkerlugu ilinniartitsisorpassuit inunnik isumaginnittoqarfimmut kinguneqanngitsumik nalunaaruteqartarneri IMAKip siulersuisuisa ilisimasaqarfigaat

Ilinniartitsisorpassuit iliuusissaaleqisutut misigisimasarput atuartoq pillugu arlaleriarlutik nalunaaruteqaraluarlutik susoqarneq ajormat, takusinnaallugulu atuartoq ajortikkiartuinnartoq.

Meeqqat atuarfianni ilinniartitsisut pisortallu sakkortusisamik nalunaarusiortussaatitaapput, IMAKillu siulersuisuisa ilinniartitsisut paasisinnaalluarpaat oqaraangata: “Sooq uanga nalunaaruteqassaanga, qanoq iliuuseqartoqarnavianngilaq, taamaalillunga atuartitannut peqqutissaqanngitsumik ilimasutsitsissannginnama, tamannalu pingaaruteqarpoq,  atuartup inersimasumik sumiginnarneqarluni misigeqqissammagu”.

Soorunami nikeriarsinaanngitsutut misigisimagaluaraanniluunniit nalunaaruteqartarneq ingerlatiinnarneqassaaq, pisussaatitaaneq kisiat peqqutiginagu kisianni allat tamarmik sumiginnaanerummata.

Tamatta akisussaaffeqarpugut – tamakku qunuginagit inissaqartittariaqarpagut.

Kisianni annerpaamik sumiginnaasut tassaapput politikerinit oqartussaasullu. Oqartussaasut qanoq iliuuseqartussaapput innarliisoqarsimatillugu, taamaanngippat meeqqat inuusuttuaqqallu sumiginnarneqaqqissapput. 

Nukissaqarniarneq peqqutaatikkunnaarniarli tassami apeqqutaaginnarpoq politikkikkut suut salliutillugit suliniutigineqassanersut.

Sumut iluaqutaava inatsisartut inatsisiliorpata namminneq inatsisiliatik malissinnaanngikkunikkit, tamassuma kinguneraa meeqqat inuusuttuaqqallu sumiginnagaaqqinnerannik.


Nuuk den 9. maj 2019


Birthe Therkildsen               
Siulittaasoq/ Formand mobil 543339           

Nikoline Cortzen
Siulittaasup tullia / næstformand mobil 290406

Kirsten Sandgreen                        
Siulersuisuni ilaasortaq/bestyrelsesmedlem/mobil 485789

Bodil K Schierbeck
Siulersuisuni ilaasortaq Bestyrelsesmedlem/ mobil 554240


Uani annertunerusumik atuaruk:
Byen_hvor_børn_forsvinder_gr_dk.pdf109 K