Oqallissaarut: Meeqqat atuarfii qineqqusaarutaannaanngillat piviusumik pitsanngorsagassaapput!

    Soorunami qinersinerit periarfissippaatigut IMAK-imi tusaaneqarnissatsinnut aammalu nunatsinni meeqqat atuarfiata qineqqusaartunit maluginiarneqarnissaanik.

    IMAK-ip inatsisartuni kommunenilu qinersinerit atorusuppai, meeqqat atuarfiata politikkikkut suliaqartunit maluginiarneqarnerunissaanik tinnersaalluni. Ilinniartitsisut kattuffiat politikkikkut pituttugaanngilaq, taamaattumik ilaasortavut kaammattorsinnaanngilavut inunnik partiimilluunniit aalajangersimasumik taasinissaannik.
    Taamaattorli qinersisartunut kaammattuerusuppugut, atuarfeqarfimmut pitsanngorsaanissamut sulissuteqarusuttumik taasinissaannik. Meeqqat inersimasunngortussat tamavimmik meeqqat atuarfiat aqqusaartussaavaat, taamaattumik periarfissat tamaasa atorlugit atuarfinni atukkanik pitsanngorsaasoqarnissaanik IMAK-imit tinnersaarusuppugut, meeqqat inuttaaqataalersussat aqqutissiunneqarluarnissaat pillugit.
    Meeqqat atuarfianni perorsaanermi ineriartortitsineq IMAKip suliniutigiuaannarpaa. Kattuffittut tunngavissat iliuusissallu, ukiorpassuit matuma siornali aalajangersarneqarsimapput, kattufittut aamma angisuumik pisussaaffeqarpugut nunatsinni meeqqat atuarfiata ineriartortinneqartuarnissaanik.
    Persuarsiutigalugu oqalugiarnerninngaanniit, atuarfeqarfimmi erseqqissunik pitsanngorsaaneq kissaatigineruarput. Takutinneqartuarpugut meeqqat atuarfiat tusiapittumik ingerlajuartoq, assersuutigalugu meeqqat atuarfianni meeqqat immikkut pisariaqartitsisut eqqarsaatigalugit immikkut taasarialinnik pitsanngorsaasoqarsimanngilaq. Isumaqarpunga pineqartut pitsanngorsaavigineqartussatut inissisimasut, soorluttaaq allat sammisat aamma pitsanngorsarneqarnissaat kissaatigineqartuartut, taamaattumik kaammattuutigaara qinersilerussi atuarfeqarfimmut pitsanngorsaarusuttumik taasinissassinnik.
    Meeqqat atuarfii qineqqusaarutaannaanngillat piviusumik pitsanngorsagassaapput!
    Inussiarnersumik inuulluaqqusillunga
    Birthe Møller Therkildsen

    Siulittaasoq