Ilinniartitsisut perorsaasullu suliaat pingaarutilerujussuupput

    Ilinniartitsisut perorsaasullu akissarsiaasa atorfeqartitaanerminnilu atugarisaasa Inatsisartunut kommuninullu qineqqusaarnermi oqaluuserineqarnerat IMAK-ip NPK-llu nuannaarutigaat.

    IMAK NPK-lu isumaqarput, ilinniartitsisut perorsaasullu inuiaqatigiinni atuuffiit pingaarutilerujussuusut.
    ✓ Meeqqatit meeraaqqerivimmiittussanngoraangata meeqqerivimmiittussanngoraangatalu, meeqqatit perorsaasunik pisariaqartitsisarput.
    ✓ Meeqqat angineruleraangamik atualertussanngortarput ilinniartitsisunillu pisariaqartitsisarlutik.
    ✓ Meeqqat atuareeraangamik atuareernerup kingorna paaqqinniffimmukartarput tassanilu perorsaasunik pisariaqartitsisarlutik.
    MIO kissaateqarpoq perorsaasut ilinniartitsisutut akissaasersorneqalernissaannik SPS-illu rektoriata perorsaasut ilinniartitsisullu akissarsiaasa assigiissarneqarnissaat tapersersorpaa.
    IMAK-ip NPK-llu siulittaasuisa erseqqissaatigerusuppaat, kattuffittut isumaqatigiissuterfigisaminni akissarsiat atorfeqarnermilu atugassarititaasut pillugit taamaallaat isumaqatigiinniarsinnaatitaagamik.
    Naluneqanngitsutut peqatigiiffeqarnissamut kiffaanngissuseqartoqarpoq, uagullu akissarsiat atorfeqarnermilu atugassarititaasut isumaqatigiinniutigisussanngortillugit ilaasortavut sinnerlugit isumaqatigiinniuttarpavut. Isumaqatigiinniarnermut immikkoortortaqarfik illuatungiuvoq, isumaqatigiissutit isumaqatigiinniutigineqaqqittussanngortillugit Naalakkersuisut sinnerlugit isumaqatigiinniartuusartoq, tamatumalu ataaniinnaq isumaqatigiissutit isumaqatigiinniutigineqarsinnaapput.
    Ilinniartitsisut perorsaasullu akissarsiaasa atorfeqarnerminnilu atugarisaasa qinersinissap tungaanut oqaluuserineqarnerat nuannaarutigaarput, aamma politikerit sulinermi atugassarititaasunik pitsaanerusunik oqaluuserinninnissaat ilaasortatsinnullu sulinermi atugassarititaasunut aningaasaqarnikkut sinaakkutissanik pitsaanerusunik tunniussaqarnissamut periarfissiinissaat qilanaaraarput, aamma politikerit sulilerpata.
    Kingullertut minnerunngitsumillu Isumaqatigiinniarnernut Isumalioqatigiissitap sulineranut peqataavugut, Kalaallit Nunaanni isumaqatigiinniariaatsip pisariillisarnissaanik pitsanngorsaaviginissaanillu suliaqarnermut, neriuutigalugulu tamanna akissarsianik atorfeqarnermilu atugassarititaasut isumaqatigiinniutigineqartarnerannik oqilisaaqataassasoq, siulittaasut naggasiipput.
    Paasissutissanik sukumiinerusunik pissarserusukkaanni saaffigineqarsinnaapput:
    Imak Siulittaasoq                      NPK Siulittaasoq
    Birthe Møller Therkildsen         Arnaq Brønlund