Ileqqoreqqusat

ILINNIARTITSISUT MEEQQAT ATUARFIANNEERSUT KATTUFFIATA (IMAK-ip) ILEQQOREQQUSAI

§ 1 Kattuffiup aqqa, sumiiffia qanorlu aaqqissuussaanera

Kattuffiup ateraa Ilinniartitsisut Meeqqat Atuarfianneersut Kattuffiat, IMAK.

Imm. 2. Kattuffiup inissisimaffigaa 3900 Nuuk, Kalaallit Nunaat. 

Imm. 3. Kattuffik naalakkersuinikkut suliniaqatigiiffimmut sumulluunniit attuumassuteqanngilaq.

§ 2 Kattuffiup siunertaa ingerlatsineralu

Kattuffiup siunertaraa:

• ilaasortat aningaasatigut, atorfeqartitaanermi atukkatigut, perorsaanermi kiisalu sullivimmi avatagiisit pillugit atugaasigut soqutigisaannik sullisissallugit,
• ilaasortat ataatsimoornerunissaat nukittorsassallugu,
• nunatsinni meeqqat atuarfiata, ilinniartitaanikkut aaqqissugaanerata, allatigut atuarfinnik aaqqissuussinerit atuartitseriaatsillu kiisalu kattuffiup ilaasortaasa ilinniaqqinnerisa ilinniagaqaqqinnerisalu pitsanngorsaavigineqarnissaat sulissutigissallugu
• Ilinniartitaanerup aaqqissuussaanerata ataqatigiissumik aaqqinneqarnissaa sulissutigissallugu kiisalu ilinniartitaanermik suliallit tamarmik soqutigisaasa suleqatigiiffissaannik pilersitsissalluni

Imm. 2. Kattuffiup siunertai ilaatigut ima anguniarneqassapput:

• atorfillit pillugit Inatsisartut inatsisaannut atatillugu qitiusumik kattuffittut sulinikkut, ilaasortat tjenestemanditut atorfillit il.il. isumaqatigiinniarsinnaatitaanerannik isumaqatigiissuteqarsinnaatitaanerannillu isumagisaqarnikkut.
• ilaasortat isumaqatigiissutit naapertorlugit atorfeqartitat il.il. pillugit isumaqatigiissusiornikkut tassungalu atasumik aningaasarsiat atorfinitsinneqarnermilu atugassarititaasut allat pillugit pingaarnermik isumaqatigiissusiornikkut.
• ilinniartitsinermik suliallit allat allallu assersuunneqarsinnaasut isumaqatigiinniarsinnaatitaanerisa isumaqatigiissuteqarsinnaatitaanerisalu suliarinissaat qulakkiissallugu
• pisortani, pisortat akuuffigisaanni namminersortunilu atorfeqarlutik ilinniartitsinermut, ilinni-artitaanermullu siunnersuinermik attuumassuteqartunik suliaqartunut, inuussutissarsiuteqartut isumaqatigiinniarsinnaatitaanerisa isumaqatigiissuteqarsinnaatitaanerisalu suliarinerisa qulakkeernerisigut.
• Danmarks Lærerforeningimut, Nordisk Lærerorganisationernes Samrådimut kattuffinnulluunniit allanut ilaasortaanikkut,
• ataatsimoorussamik soqutigisat sulissutiginissaannut nunatsinni nunattalu avataani kattuffinnik allanik suleqateqarnikkut,
• meeqqat atuarfiata ilinniartitaanerillu allat aaqqissussaaanerisa ineriartorneranni sunniuteqaqataanikkut.
• ilaasortat aningaasaqarnikkut, inooqatigiinnikkut allatigullu ilaasortanut atugassarititaasunut pingaaruteqartunik ataatsimoorussamik soqutigisaasa sulissutiginerisigut,
• perorsaanermut, aaqqissugaanermut suliamullu tunngasunik ataatsimiisitsisarnertigut ataat-simeersuartitsisarnertigullu,
• inuiaqatigiinnut tunngasunut isummertarnikkut inuiaqatigiinnilu oqallinnernut peqataanikkut
• ilaasortanut siunnersuisarnikut ilitsersuisarnikkullu,
• siulersuisuni aalajangersimasumut aalajangereernerisa kingorna ilaasortanut inatsisilerinikkut ikiorsiisarnikkut, aamma
• ilaasortanut atuagassiaqartitsinikkut, qarasaasiakkut nittartagaqarnikkut kiisalu paasissutissanik allanik saqqummersitsisarnikkut

§ 3 Ilaasortaqarneq

Kattuffik nalinginnaasumik aamma immikkut ittumik ilaasortaqarpoq. 

Imm. 2. Nalinginnaasumik ilaasortaanissamut pisinnaatitaaffeqarput:

• kikkulluunniit kattuffiup isumaqatigiinniarsinnaatitaanerata iluani isumaqatigiissutit imaluunniit akissarsianut isumaqatigiissutit naapertorlugit atorfeqartut,
• kikkulluunniit ilinniartitsinermik suliaqartut,
• inuit assigiimmillu suliaqartut malittarisassani § 2 imm. 2-mut attuumassuserneqarsinnaasut,
• ilaasortat § 3 imm. 2-mut attuumassuteqartut, soraarnerussutisiaqalersimasullu.

Imm. 3. Nalinginnaasumik ilaasortat meeqqat atuarfianni, efterskoleni, atuarfinni namminersortuni, Namminersorlutik Oqartussat Allaffissuanni, Ilinniartitaanermut Aqutsisoqarfimmi kiisalu suliffeqarfinni allani Namminersorlutik Oqartussat ataaniittuni kiisalu kommunit allaffiini atorfeqartut immikkoortukkuutaanut imatut agguataarneqassapput:

1. immikkoortoq 1-imiipput ilinniartitsisut, immikkoortortaqarfinni aqutsisut kiisalu siunnersortit aqutsisuunngitsut,
2. immikkoortoq 2-miipput meeqqanik minnernik atuartitsisut, meeqqat atuarfianni faglærerit timelærerillu,
3. immikkoortoq 3-miipput ilaasortat pisortatut akissarsiat inissisimaffianni atorfeqartut,
4. immikkoortoq 4-miipput nalinginnaasumik ilaasortat, soraarnerussutisiaqalerlutik soraarninngortut.

Imm. 3a. Ilaasortat allat immikkoortunut malittarisassanut ilanngussaq 2 naapertorlugu agguataarneqarput.

Imm. 4. Ilinniartitsisunngorniat immikkut ilaasortaapput, inuillu imm. 2-mut attuumassuteqanngitsut, siulersuisut aalajangernerisigut immikkut ittumik ilaasortanngortinneqarsinnaapput.

Imm. 5. Immikkut ittumik ilaasortat immikkoortunut imatut agguataarneqassapput:    

1. ilinniartitsisunngorniat immikkoortoq 5-imut ilaapput,
2. inuit siulersuisut aalajangernerisigut ilaasortanngortut immikkoortoq 6-imut ilaapput.

Imm. 6. Siulersuisut aalajangissavaat ilaasortanngorsinnaatitaanermut piumasaqaatit eqqortinneqarsimanersut, tamatumalu saniatigut immikkut ittumik akuersissuteqarnikkut ilaasortanngortitsi-sinnaallutik, assersuutigalugu siulersuisut isumaqarpata isumaqatigiinniarsinnaatitaaneq anguneqarsinnaasoq. 

Imm. 7. Kattuffimmut ilaasortat ataasiakkaat taamaallaat ilaasortaanermut akiliutit akilereersimasat akiligassanngorsimasullu tunngavigalugit akisussaassuseqarput, taamaattoq tak. § 6 imm. 5. 

Imm. 8. Nalinginnaasumik ilaasortat kattuffiup taasisitsinerini taasisinnaatitaapput. Isumaqatigiissutit inerneri pillugit ilaasortanik taasisitsinerni, taamaallaat ilaasortat inernernik kalluarneqartut taasisinnaatitaapput. 

§ 4 Ilaasortanngorneq ilaasortaajunnaarnerlu

Ilaasortanngorneq ilaasortaajunnaarnerlu allakkatigut kattuffiup immersugassiai atorlugit pissaaq. Immersugaq atsioriarlugu kattuffimmut e-mailikkut nassiussinikkut tunniunneqassaaq, periarfissaallunilu tatigisatut sinniisimut tunniunneqarsinnaanera. Ilaasortanngornerit tamarmik siulersuisut akuersissuteqarnerisigut, tak. § 3 imm. 6 pisassapput. 

Imm. 2. Ilaasortanngorneq ilaasortanngorniutip tiguneraniit atuutilissaaq.

Imm. 3. Ilinniartitsisunngorniat ilaasortanngornissamut pisinnaatitaapput.

Imm. 4. Nalinginnaasumik ilaasortanngorsinnaatitaalernermiit qaammatit pingasut qaangiutereernerisigut ilaasortanngoraanni, tak. § 2 imm. 2, kattuffimmit inatsisilerinikkut ikiorserne-qarsinnaaneq, ukioq ataaseq ataavartumik ilaasortaareersimagaanni aatsaat pisinnaalissaaq. Immikkut illuinnartumik pisoqartillugu, siulersuisut immikkut ittumik periarfissiinissamut akuersissuteqarsinnaapput.

Imm. 5 Ilaasortaajunnaarniarneq 31. december, 31. marts, 31. juli imaluunnit 30. september atuu-tilersumik qaammammik ataatsimik sioqqutsilluni nalunaarnikkut pisinnaavoq. Ilaasortaajunnaartoqarsinnaanngilaq, aalajangiisinnaatitaasoqarfimmi mattussigallarnissamut/suliumajunnaarnissa-mulluunniit aalajangiisoqarsimappat kattuffiup ilaasortaasa ilaannut ilaasortaanulluunnit tamanut, mattussigallarnerup/suliumajunnaarnerup atorunnaarnissaa tikillugu. Ilaasortaajunnaarneq allakkatigut kattuffiup allannguinermut immersugassaa atorlugu kattuffiup allattoqarfianut nalunaarutigineqassaaq. Allannguinermi immersuiffissaq atsiornertaqassaaq kattuffiullu allattoqarfianut tunniullugu/nassiulluguluunnit.

Imm. 6.  Ilaasortat piumaffigineqaraluarlutik ilaasortaanermut akiliummik, ernialiussanik akiliutinillu akileeqqusissutip nassiunneraniit kingusinnerpaamik qaammat ataaseq qaangiutsinnagu Akiliin-ngitsut, kattuffimmit ilaasortaajunnaarsinneqassapput. Ilaasortat taakku aatsaat ilaasortaanermut akiliut akiligassaq il.il. akilerneqareerpata ilaasortanngoqqissinnaapput, imaluunniit pisussaaffiliisumik akilersuinissamik isumaqatigiissuteqareernikkut, aammattaaq ilaasortanngortitseqqinnermi imm. 4-mi eqqaaneqartutut isummersortoqassaaq.

Imm. 7. Siulersuisut qulaani aalajangersakkamik allannguinissamut pisinnaatitaapput, erseqqissunik pissutissaalluartunik tunngavissaqarpat.

Imm. 8. Ilaasortat kikkulluunniit atorfeqarnikkut allatigulluunniit allannguutinik, soorlu najukkap allanngorneranik, allannguutit ilaasortaassutsimut sunniuteqartut pillugit kattuffimmut ilisimatitsinissamut pisussaapput.

§ 5 Ilaasortaajunnaarsitsineq

Siulersuisut isumaqarunik ilaasortaq kattuffiup soqutigisaanut akornusersuisoq, siulersuisunit ilaasortanit sisamanit taperserneqarpat pineqartoq ilaasortaajunnaarsinneqarsinnaavoq. Pineqartup aalajangiineq sinniisoqarfiup tulliani ileqquusumik ataatsimiinnissaannut saqqummiunneqartussanngortissinnaavaa, inaarutaasumillu aalajangiisoqannginnerani pineqartoq oqaaseqarsinnaatitaavoq. Sinniisoqarfimmi ilaasortat 2/3-ii ilaasortaajunnaarsitsinermut innersuussineq isumaqatigalugu taasippata ilaasortaajunnaarsitsisoqassaaq. Sinniisoqarfimmut saqqummiussinissamik piumasaqartoqarnera kinguartitsissutaasinnaanngilaq.

§ 6 Ilaasortaanermut akiliut

Ilaasortaanermut akiliut isumaqatigiissutit naapertorlugit atorfilinnut akilerneqartassaaq ilaasortanngornerup kingornatigut qaammatit aallartinneri tamaasa. Siumoortumik akissarsialinnut qaammatip aallartinnerani akilerneqartassaaq. 

Imm. 2. Ilaasortaanermut akiliutip annertussusaa aalajangerneqartassaaq sinniisoqarfimmit aalajangersagaq § 15imm. 6 malillugu. Sinniisoqarfik 2/3-imik amerlanerussuteqartut aalajangerneratigut ilaasortaanermut akiliummik immikkut ittumik akiliisussanngortitsisinnaavoq.

Imm. 3. Sinniisuutitat nalinginnaasumik ataatsimiinneranni, sinniisoqarfiup aalajangersinnaavaa ukiumut ilaasortat akiliutaasa ilaat immikkut kontomut inissinneqassasut, tak. § 7.

Imm. 4a. Ilinniarnerminni naammasserlaat ilinniarnermik naammassineranniit qaammatini 3-ni ilaasortaanermut akiliuteqassanngillat.

Imm. 4b. Ilaasortat 75-ileereersut ilaasortaanermut akiliuteqanngillat. Aammattaaq siulersuisut akuersissutigisinnaavaa, ilaasortaq ilaasortaanermut akiliuteqassanngitsoq soorlu akissarsiaqarnani sulinngiffeqarnermini.

Imm. 5. Siulersuisut ilaasortaanermut akiliut piffissaq eqqorlugu akilerneqanngitsoq, allaffissornikkut aningaasartuutinut ernianullu matussutissamik ilassuserneqartissinnaavaa.    

Imm. 6. Najugarisaq qimannagu ilinniartitsisunngorniat timelæreritut atorneqartut ilinniarnerminni kiisalu ilinniartitsinermik ingerlassaqartut, ukiumut 1078-it inorlugit akissarsissutaasunik tiimeqartut ukiumut affaannarmik ilaasortaanermut akiliuteqassapput.

Imm. 7. Siulersuisoqarfiup ilaasortaanermut akiliut piffissaq eqqorlugu akilerneqanngitsoq allaf-fissornikkut aningaasartuutinut matussutissamik ilassuserneqartissinnaavaa, aalajangersassavaalu malittarisassat ilaasortaanerup atorunnaarsinnissamut ilaasortaanermut akiliummik akileriigassamik kinguaattooruteqarnermi. Ilaasortanngoqqittoqassappat kinguaattoorutaasimasut akitsuuserlugit akilerneqassapput.

§ 7 Immikkut konto

Immikkut kontop kattuffiup aningaasaqarnikkut patajaatsumik inissisimanissaa siunertaraa, kiisalu kattuffiup nalinginnaasumik ilaasortaanut, pisuni aalajangersimasuni tapersiisinnaanissaq, soorlu atorfeqarnermi pissutsitigut akissarsiaqarnermullu tunngasutigut aaqqiagiinnginnerni.

Imm. 2 Immikkut konto IMAK-ip naatsorsuutaani immikkut inissinneqarluni ilaassaaq.

Imm. 3 Immikkut Kontomi aningaasaatit IMAK-ip pigivai, siulersuisullu aningaasat kattuffiup ilaasortaanut iluaqutaanerpaasussanngorlugit inissinnissaat aalajangiiffigissavaat.

Imm. 4 Aaqqiagiinngittoqartillugu Immikkut Kontomi aningaasaatit siulersuisut sinniisoqarfiulluunniit aalajangiineri naapertorlugit atorneqartassapput. Aammattaaq siulersuisut Immikkut Kontomi aningaasaatit inatsisilerituumit ikiorserneqarnermut atorsinnaavaat, ilaatigut eqqartuussisunut suliassanngortitsinerni atorfimmullu tunngatillugu suliani.

Imm. 5. Aaqqiagiinnginnerup taamaatinnerata kingorna, piffissami aaqqiagiinngiffiusumi tamakkiisumik ilaannakortumiluunniit akissarsiaqartitsisoqarsimappat, aningaasat Immikkut Kontomit tunniunneqartut akissarsiallu katigunneranni, ilaasortat aaqqiagiinngitsoqanngitsuuppat akissarsias-sarigaluannit amerlanerussutaasut utertinnissaat ilaasortat Immikkut Kontomit tapiif-figineqarsimasut pisussaaffigaat.

Imm. 6. Immikkut Kontomi uninngasuutit, tamatumunnga ilanngullugit aningaasaatit amerleriaataat, kattuffiup ingerlatsineranut, nalilinnik pigisaanut illikartitsinerinut assigisaannulluunniit atorneqarsinnaanngillat, tamanna siulersuisunit sinniisoqarfimmilluunniit aalajangiiffigineqarsimanngippat.

Imm. 7 Immikkut Kontomi pigisat minnerpaamik naleqassutsitik pigiinnassavaat. Naatsorsuinermut tamatumunnga aallaavittut toqqarneqassaaq, ukiumi Sinniisoqarfiup nuussivissatut aalajangiussaani 1. januar pigisat nalingat, tak. § 7 imm. 6. Malittarisassap tamatuma sanioqqunnissaanut pi-umasaavoq, Sinniisoqarfimmi najuuttut minnerpaamik 2/3-iisa akuersinissaat.

§ 8 Tatigisatut sinniisoq inullu attaveqaat

Suliffeqarfinni tamani, kattuffiup aaqqissugaaffiata ataaniittuni, ukiuni akunnattunik kisitsisitalinni suliffeqarfimmi ilaasortat akornanni tatigisatut sinniisumik kingoraartissaanillu qinersisoqartassaaq tatigisatut sinniisoqarnermut isumaqatigiissutit qaqugukkulluunnit atuuttut tunngavigalugit. Ilaasortat pisortatut atuuffeqanngitsut kisimik qinigaassinnaapput.

Imm. 2.  Tatigisatut sinniisup/ kingoraartissap suliassani tatigisatut sinniisoqarnermut isumaqatigiissutit naapertorlugit isumagissavai. Tatigisatut sinniisup aammattaaq suliffeqarfigisamini ilaasortat siulersuisunik suleqateqarnerat isumagisassavaa.

Imm. 3. Suliffeqarfinni tatigisatut sinniisoqarnissamut pisinnaatitaanngitsuni taarsiullugu inummik attaveqaammik qinersisoqassaaq tatigisatut sinniisumut atassuteqartartussamik, tatigisatut sinnii-suunermut kattuffimmullu attaveqarnermik isumaginnittussamik. 

Imm. 4. Sinniisumik tatiginninnginnermik siunnersuut taasissutigineqarsinnaavoq siunnersuut allakkatigut ilaasortanut ataatsimiigiaqqusisoqarsimappat. Siunnersuut tunngavilersorneqarsimassaaq minnerpaamillu ilaasortanit 1/3-init atsiorneqarsimassalluni.

Siunnersuut ilaasortanit akuerineqarpat, malittarisassat malillugit sinniisumik sinniisussaanillu nutaamik qinersisoqassaaq.

§ 9 Immikkut attaveqaatit

Majoriami pisortat akunnerminni immikkut attaveqaammik toqqaassapput.

Imm. 2. Ilinniarfeqarfinni allani ilaasortat akornanni immikkut attaveqaammik toqqaasoqartassaaq,

Imm. 3. Immikkut attaveqaat kattuffimmut attaveqarnermik isumaginnittussaavoq. 

§ 10 Suliamut tunngasumik klubbit

Suliffigalugit sumiiffigisani suliamut tunngasumik politikkikkut sulinerup nukittorsarneqarnissaa siunertaralugu aamma ilaasortat akornanni kredsimi ilaasortat fraktionitut immikkoortuni 1 aamma 2-mi suliffigalugit sumiiffigisani pilersissinnaavaat suliamut tunngasumik klubbi. Klubbip sulinermini najoqqutassaa siulersuisunit akuersissutigineqassaaq.

Tatigisatut sinniisoq/inuk atassuteqaat klubbimut siulittaasuuvoq siulersuisunullu atassuteqartitsisuulluni.

Imm. 2. Ilaasortat aalajangersimasumik sumiiffilimmik suliffeqanngitsut kredsip ataani immikkut klubbiusinnaapput.

Inuup atassuteqaatip siulersuisunut atassuteqarneq isumagissavaa. 

Imm. 3. Ilaasortat, atuarfimmi atorfinitsitaanngitsut, IMAK-illi isumaqatigiissutaasa malillugit atorfeqartinneqartut, IMAK-ip ataani immikkut klubbiusinnaapput.

§ 11 Ataatsimoorussatut tatigisatut sinniisoq

Ataatsimoorussatut tatigisatut siinniisumik qinersineq.

• Kommunimi tatigisatut sinniisut nutaamik qinigaanerisa kingorna taakku akornannit ataatsimoorussatut tatigisatut sinniisoq taassumalu sinniisussaa qinerneqassapput.
• Namminersorlutik Oqartussani ataatsimoorussatut tatigisatut sinniisoq, taassumalu sinniisussaa namminersorlutik oqartussat allaffeqarfissuani Ilinniartitaanermut Aqutsisoqarfimmi kiisalu suliffeqarfinni allani taakkununnga atasuni tatigisatut sinniisut akornannit qinerneqassapput.
• meeqqaat atuarfiini namminersortuni efterskolenilu kattuffiup isumaqatigiissuteqarfigisimasaani, ataatsimoorussatut tatigisatut sinniisoq taassumalu sinniisussaa tatigisatut sinniisut akornanni qinerneqassapput.

Ataatsimoorussatut tatigisatut sinniisoq kattuffiup sinniisoqarfianut aamma qinigaavoq. 

Imm. 2. Qinersinissaq siulersuisunit nalunaarutigineqassaaq, peqatigisaanillu qinersinermi malittarisassat nalunaarutigissallugit. Sinniisut kisimik qinigassanngortitsisinnaapput.

Imm. 3. Ataatsimoorussatut tatigisatut sinniisup isumagisassaraa ilaasortat, tatigisatut sinniisut, inuit atassuteqaatit siulersuisullu akornanni suleqatigiinnissaq, isumagisassaraluguttaaq suliassat allat tatigisatut sinniisoqarneq pillugu isumaqatigiissut naapertorlugu.

Imm. 4. Ataatsimoorussatut tatigisatut sinniisoq tatigisatut sinniisuujunnaarnermigut aamma sin-niisuunertut tunuartarpoq.

§ 12 Siulersuisunik qinersineq

Siulersuisunik qinersinermi Kalaallit Nunaat nunap immikkoortuinut/distrikt sisamanut agguarneqassaaq. Immikkoortut ileqqoreqqusanut ilaliussaq 1 naapertorlugu aalajangersagaapput. Nunap immikkoortuini tamani siulersuisoqarfimmut ilaasortassamik ataatsimik allakkatigut qinersi-so­qartassaaq. Immikkoortumi nalinginnaasumik ilaasortat tamarmik qinersisinnaatitaapput. Siulittaasoq sinniisoqarfimmit qinigaasarpoq.

Imm. 2. Siulersuisut qinersinissaq kingusinnerpaamik 1. september qinersineq nalunaarutigissavaa, qinersinissamilu maleruagassanik aalajangersaallutik. 

Imm. 3. Ukiuni 2021-imi, 2025-mi, 2029-imi il.il. qinersisoqartassaaq. Siulersuisut piffissaq qinigaaffiat aallartissaaq ukiup tulliani 1. januar, ukiunillu sisamanik sivisussuseqarluni.

Imm. 4. Kattuffiup siulersuisuinut qinigassanngortitsinermi qinigassanngortitap ataatsip aqqa, a-ngerlarsimaffeqarfia kiisalu kingoraartissaa minnerpaamik ataaseq ilanngullugu nalunaarutigineqassapput, taakkulu qinigassanngortinnertik allakkatigut uppernar­sassavaat. Qinigassanngortitsinermut ilanngullugit qinigassanngortitsissut ilaasortat qinersisin­naasut­ atsiornerinik ikinnerpaamik qulinik amerlanerpaa­millu 20-nik imalik nassiunneqassapput. Siulersuisuni ilaasortassatut taassumaluunnit kingoraartissaatut qinigas­sanngortitat qinersinermi pineqartumi qinigassanngortitamut allamut qinigassanngortitsisutut atsiorsinnaanngillat. Ilaasortaq ataaseq qinigassanngortitamut ataasiinnarmut qinigassanngortitsisutut atsiorsinnaavoq.

Imm. 5. Nunap immikkoortuani ataatsimi ataasiinnarmik qinigassanngortitsisoqarpat, qinigassanngortinneqar­toq qinersinertaqanngitsumik qinigaassaaq.

Imm. 6. Siulersuisuni ilaasortaq qinigaaffiup ingerlanerani kattuffimmut nalinginnaasumik ilaasortaajunnaaruni siulersuisuniit tunuassaaq, kingoraartissaalu siulersuisuni ilaasortanngussaaq. Ki-ngoraartissaa siulersuisunut ilaasortanngorsinnaanngippat, piffissap qinigaaffiup sinnerani siulersuisut nammineerlutik, siulersuisunut ilaasortassamik kingoraartissamik qinersinermi amerlanerpaamik taaneqarsimasumik toqqaasinnaapput.

§ 13 Kongresimut aallartitamik qinersineq

Danmarks Lærerforeningip kongresianut IMAK marlunnik aallartitaqarpoq. Aallartitap aappaa sin-niisoqarfiup ataatsimeersuarnerani sinniisoqarfimmit qinerneqartassaaq. Kongresimut aallartitap

aappaa tassaavoq IMAK-ip siulittaasua.

§ 14 Qinersisinnaatitaasut

Qinersinerni taasisitsinernilu qinersisinnaatitaasut tassaapput nalinginnaasumik ilaasortaasut, ilaasortat allattorsimaffianni nutartigaasumi allassimasut. Qinersinnginnermi IMAK-imit sinniisunut/ attaveqaatinut sinniisuuffiisa allattorsimaffiat nassiussorneqassapput, allattorsimaffillu ilaasortat normuinik aqqinillu imaqassaaq.

Isumaqatigiinniarnermi angusat ilaasortanut taasisitsissutigineqarnerat pillugu § 3 imm. 8. innersuussutigineqarpoq.

§ 15 Sinniisoqarfik

Sinniisoqarfik Kattuffimmit qulliunerulluni inissisimavoq, maleruaqqusani allamik allassimasoqartinnagu.

Imm. 2. Sinniisoqarfik makkunannga inuttaqarpoq:

• Siulersuisut,
• Kommunenit tamanit tatigisaallutik sinniisuunerit
• Tamatuma saniatigut kommunini atorfeqartut 75-ikkaanik aallartittunik amerlassuseqaraangata tatigisaallutik sinniisut akunnerminni ilassutaalluni sinniisumik ataatsimik qinersisassapput.
• Namminersorlutik Oqartussani, Ilinniartitaanermut Aqutsisoqarfimmi kiisalu suliffeqarfiit Namminersorlutik Oqartussanut atasut ataatsimoorullugu tatigisatut sinniisuat
• Akissarsiat inissisimaffianni pisortatut inissisimallutik akissarsiaqartut akunnerminni qinigaat sinniisut marluk tak. § 3 Imm. 3
• Nunaqarfiit atuarfiini pisortat akunnerminni qinigaat ataaseq, akissarsiat inissisimaffianni pisortatut aningaasaqartitaanngitsoq.
• Meeqqat atuarfiisa namminersortut efterskolellu ataatsimoorussamik tatigisatut sinniisuat
• Aallartitaq ataaseq immikkut attaveqaatit ilinniarfeqarfiit allat piareersarfinnilu pisortat akornannit qinigaasoq
• Aallartitaq ataaseq ilaasortat soraarninngorsimasut akornannit qinigaasoq

Siulersuisut qinersisoqarnissaa aalajangertassavaat peqatigisaanillu qinersinermi malittarisassat nalunaarutigisassallugit.

Imm. 3. Kattuffiup siulittaasua sinniisoqarfimmi siulittaasuussaaq.

Imm. 4. Sinniisoqarfik ileqquusumik ukiuni akunnattunik kisitsisitalinni ataatsimiigiaqquneqassaaq nalinginnaasumik oktober kvartalimi. Ataatsimiigiaqqusineq ataatsimeersuarnissaq minnerpaamik sap. ak. 14-it sioqqullugu nalunaarutigineqassaaq. Sinniisoqarfimmi ilaasortanit oqaluuseritinniakkat siulittaasup allaganngorlugit sinniisoqarfiup ataatsimiinnissaa sap. ak. 8-t sioqqul­lugu tigoreersimassavai.

Aammattaaq immikkut ittumik sinniisoqarfik ataatsimiisinneqartassaaq ukioq isumaqatiginninniarfissaq ukiumik ataatsimik sioqqullugu, ukiumi pineqartumi ileqquusumik ataatsimiinnissaq ingerlanneqartussaanngippat.

Imm. 5. Sinniisoqarfiup ataatsimiinnissaa minnerpaamik sap. ak. 4-t sioqqullugu oqaluuserisas­sat, naatsorsuutit kukkunersioriikkat, ukiunut tulliuttunut marlunnut aningaasanut missingersuutit kiisalu ukiunut tulliuttunut marlunnut ilaasortat akiliutissaattut siunnersuut, ataatsimiinnermilu oqaluuserisassatut siunnersuutit allat sinniisunut nassiunneqariissapput.

Imm. 6. Sinniisoqarfiup ileqquusumik ataatsimiinnerani oqaluuserisassatut makku ilanngunneqas­sapput:

1. Aqutsisussamik qinersineq.
2. Siulittaasup nalunaarutaa.
3.  
4. Siunnersuutit tiguneqartut.
5. Ukiunut tulliuttunut marlunnut aningaasatigut missingersuutit kiisalu ilaasortaanermut akiliutit aalajangersarneqarnera.
6. Danmarks Lærerforeningip kongressianut ilaasortassamik qinersineq.
7. Kukkunersiuisunik isornartorsiuisunik sinniisussaannillu qinersineq.
8. Taasariaqartut allat.

Ukiuni 2021-mi, 2025-mi, 2029-imi il. il.  “Siulittaasumik qinersineq” ilannguneqartassaaq.

Imm. 7. Siulersuisut siulittaasussamik qinigassanngortitsisassapput. Tamatuma saniagut sin-niisoqarfik qinigassanngortitsisinnaavoq. Siulersuisoqarfik siulittaasussamik qinersinissamut maleruagassanik erseqqinnerusunik aalajangersaassaaq.

Imm. 8. Sinniisoqarfiup ileqquusumik ataatsimiinnerani kukkunersiuisussat isornartorsiuisut marluk taakkulu sinniisussaat marluk qinerneqassapput, tamarmik ukiuni marlunni atasussanik. Kukkunersiuisut isornartorsiuisut sinniisoqarfiup ataatsimiinnerani naatsorsuutit kukkunersioriikkat aallaavigalugit, taamaallaat oqaatigissavaat kattuffiup aningaa­saatai siunertarineqartunut atorneqarsimanersut.  

Imm. 9. Sinniisoqarfik malittarisassat malillugit ataatsimiigiaqqusineq nalunaarutigineqarsimappat aalajangiisinnaassuseqarpoq.

Imm. 10. Sinniisoqarfik oqaluuserisassanngortinneqartunut taamaallaat aalajangiisinnaavoq. Aalajangiinerit nalinginnaasumik amerlanerussuteqarnikkut pisassapput, periaaseq allaasoq ileqqo-reqqusani taakkunani oqaatigineqarsimanngikkaangat. Allakkatigut taasisoqassaaq tamanna sin-niisoqarfimmut ilaasortat tallimat piumasarippassuk. Taasivissat taasiffigineqanngitsut imaluunniit taasivissat akuerisaanngitsut taasinertut isigineqassanngillat. Allamik oqqersuilluni pisinnaatit­sinikkut imaluunniit allakkatigut taasisoqarsinnaanngilaq.

Imm. 11. Sinniisoqarfik siulersuisoqarfiup sulinermini najoqqutassaannik aalajangersaas­saaq, taassuma iluaniissapput aammattaaq malittarisassat uku malillugit siulersuisut piginnaatitaaffii.

Imm. 12. Ukioq naatsorsuiffiusoq ukiup qaammatisiutai malillugit ingerlavoq. Naatsorsuutit kukkunersiuisumit kukkunersiuisutut akuerisatut akuersissuteqartumit siulersuisunit toqqarneqarsimasumit kukkunersiorneqartassapput.

Imm. 13. Siulittaasup nalunaarutaa, naatsorsuutit akuerineqartut kiisalu sinniisoqarfiup ataatsi-miinneranit imaqarniliaq ilaasortanut tamanut nassiussuunneqassapput, imaluunniit ilaasortat atuagassiaanni naqinneqassallutik.

§ 16 Immikkut ittumik sinniisoqarfiup ataatsimiinnera

Siulersuisut imaluunniit sinniisoqarfimmut ilaasortat amerlanerussuteqartut allakkatigut piumasa-rippassuk peqatigitillugulu oqaluuseritinni­akkat nalunaarutigalugit, immikkut ittumik sinniisoqarfik ataatsimiigiaqquneqassaaq.

Immikkut ittumik ataatsimiinnermi tak. § 15 imm. 4.

Immikkut ittumik ataatsimiinnermi uku oqaluuserisassanngortinneqartassapput:

1. Aqutsisussamik qinersineq
2. Isumaqatigiinniarnissami piumasaqaatit
3. Tamalaat

Imm. 2. Sinniisoqarfik immikkut ittumik ataatsimiissaaq, tamatuminnga piumasaqarnerup saqqummiunneqarneraniit kingusinnerpaamik qaammatip ataatsip qaangiunneratigut (ullut atuanngiffiit ilanngunnagit).

Imm. 3. Sinniisoqarfimmi immikkut ittumik ataatsimiinnerit siulersuisut aalajangiineratigut oqarasuaatikkut ingerlanneqarsinnaapput. Siulersuisut suliat sinniisoqarfimmi ilaasortanut allakkatigut nalilersugassatut nassiussinnaavai.

Imm. 4. Aalajangiinerit sinniisoqarfimmi ileqquusumik ataatsimiinnertut ingerlanneqartassapput, taamaattorli oqarasuaatikkut ataatsimiinnerni allakkatigut taasinissaq piumasarineqarsinnaanngi­laq.

§ 17 Siulersuisut

Siulersuisuniipput siulittaasoq, sinniisoqarfiup ileqquusumik ataatsimiinnerani qinerneqar­toq, kiisalu siulersuisunut ilaasortat sisamat, ilaasortat allakkatigut taasinerati­gut qinerneqar­tut. Siulersuisut akunnermini siulittaasup tullianik toqqaassapput.

Imm. 2. Siulersuisut kattuffiup ulluinnarni ingerlanneqarnera akisussaaffigaat. Siulersuisut kattuffiup ileqqoreqqusai sinniisoqarfiullu aalajangiussai malittussaavai, taamaattorli kattuffik sinnerlugu iliuuseqarnissaminut tamakkiisumik nammineq aalajangiisinnaatitaalluni. Ataatsimiin­nerit avataatigut sinaakkutassat tassani atortussatut aalajangersakkat malillugit siulittaasoq siulersuisut ingerlatsineranik isumaginnittuussaaq. Siulittaasoq allatoqarfimmi, kattuffiup pilersittariaqagaani, politikkikkut aqutsisuussaaq, kattuffiullu atuagassiaanut akisussaalluni aaqqissuisuus­salluni.

Imm. 3. Siulersuisut ataatsimiititaliorsinnaapput, aallartitassani il.il. nammineq qinerlugit, ingerlatsinemi suleriaasissaq aalajangersarsinnaallugu, taassuma iluani allalluni nalilersuinikkut aamma/imaluunniit oqarasuaatikkut ataatsimiinnernut malittarisassat alajangersarsinnaallugit.

Imm. 4. Ilaasortat akiliutissaannik aalajangiineq tunngavigalugu siulersuisut ukiut tamaasa ani-ngaasanut missingersuusiortassapput. Siulersuisut kattuffiup aningaasaataasa siunertaasalu akuersissutigineqarsimasut atorneqarnerannut akisussaapput. Illunik pigisanillu aalajaatsunik pisineq tunisinerluunniit taamaallaat sinniisoqarfiup aalajangerneragut pisinnaavoq. Siulittaasoq aalajangigaq piviusunngortissallugu piginnaassuseqartitaavoq.

Imm. 5. Kattuffiup aningaasaataanik atuisinnaaneq, taassuma iluaniilluni aningaaserivinni kontoni uninngasuutinik, aningaasaateqarfinni il.il. uninngasuutinik atuineq, aatsaat pisinnaavoq inuit marluk siulersuisut pisinnaatinneqartut atsiornerisigut.

Imm. 6.  Siulittaasumik tatiginnikkunnaarnermik taasisitsisinnaanissamik siunnersuut piffissaagal-lartillugu ullormut oqaluuserisassanut ilanngunneqarsimaguni tassungalu ilanngullugu nalunaarutigineqarsimaguni, sinniisoqarfiup inatsisit malillugit ataatsimiigiaqquneqarsimalluni ataatsimiinneranni oqaluuserineqarsinnaavoq.

Siunnersuut sinniisoqarfiup akuerippagu siulersuisut sinniisoqarfik qaammatip ataatsip ingerlanerani – atuarfinni sulinngiffeqarnerit ilanngaatigalugit – kattuffiup siulittaasussaanik nutaamik qinersinissamut immikkut ittumik ataatsimiigiaqqussavaat. Tamatumani nutaamik qinigaalluni siulittaasunngortoq ingerlaannartumik atuutilissaaq siulittaasup tunuartup qinigaaffia atuuffigissallugu. 

Imm. 7. Kattuffiup siulittaasua qinigaaffimmi nalaani tunuassappat imm. 6-imi taaneqartut peqqutaanatik, siulersuisut immikkut ittumik sinniisoqarfiup ataatsimiinnissanik aggersaassapput qaammatip ataatsip iluani – aasaanerani sulinngiffeqarneq ilanngunnagu – siulittaasumut qinersineq, siulittaasumut qinersinertut nalinginnaasutut ingerlanneqassaaq malittarisassani § 15 imm. 7 malillugu.

Siulittaasoq nutaaq siulittaasuusimasup qinigaaffia ingerlatiinnarlugu atorfinitsinneqassaaq.

§ 18 Kattuffimmi ilaasortat tamarmik taasinerat

Kattuffiup isummerfiginninnera aalajangiifigineqassaaq nalinginnaasumik isumaqatigiinniarnermi angusanut/isumaqatigiissutinilluunniit nutarterinermi ilaasortat isumaqatigiissummik angune-qartumut pineqartut tamarmik taasissutiginninneratigut. Angusaq itigartinneqassaaq taasisut taasinermi peqataasut amerlanerussuteqartut itigartippassuk, taamaattorli minnerpaamik ilaasortaqatigiit pineqartut 35 %-iisa aku­ersissutigineqarnissaa naaggaarpassuk.

Imm. 2. Siulersuisoqarfiup taasissutiginninnermut malittarisassat erseqqinnerusut aalajangersas-savai, tamatumani tatigisatut sinniisut suleqataa­nissaat ilanngullugu.

§ 19 Ileqqoreqqusat

Ileqqoreqqusat uku allanngortinneqarsinnaapput allannguutissatut siunnersuut sinniisoqarfimmi ileqquusumik imaluunniit immikkut ittumik ataatsimiinnermi oqaluuserisassatut ilanngunneqarsimap­pat, kiisalu taasinermi ikinnerpaamik taasisut 2/3-iisa akuerippassuk.

Imm. 2. Taasisitsinermi kisitsit taanna anguneqanngippat, taamaattorli nalinginnaasumik amerlanerussuteqarluni, siulersuisut siunnersuut ilaasortanut tamanut allakkatigut taasissutigisassatut nassiussinnaavaat. Siunnersuut akuerineqassaaq ilaasortat taasisut affaat sinnerlugit akuersillutik taasippata.

§ 20 Kattuffiup atorunnaarsinneqarnissaanik aalajangiineq

Kattuffik atorunnaarsinneqarsinnaavoq tamanna pillugu siunnersuut sinniisoqarfup ileqquusumik imaluunniit immikkut ittumik ataatsimiinnerani oqaluuserisassatut ilanngunneqarsimappat, siunnersuullu taasisut minnerpaamik 2/3-iisa akueralugu taasissutigippassuk.

Peqatigitillugu sinniisoqarfik kattuffiup aningaasaataasa pigisaasalu sumut atorneqarnissaat aalajangiiffigissavaa.

Imm. 2. Sinniisoqarfiup kattuffiup atorunnaarnissaa aalajangiuppagu, aalajangerneq kiisalu ani-ngaasaatit pigisallu sumut atorneqarnissaat piaartumik ilaasortanit nalinginnaasunit tamanit allakkatigut taasissutigisassatut nassiunneqassaaq.

Aalajangerneq ilaasortat tamarmik allakkatigut taasitinneqarneranni peqataasut affaat sinnerlugit akuersippata aatsaat atuutilissaaq.

Kattuffiup atorunaarnerani, kattuffiup qaqugumulluunniit pigisai nalillit, taassuma iluaniillutik illuutit, pequtit assigisaallu, siunertamut tamanut iluaqutaasussamut IMAK-ip sinniisoqarfiata aalajangigaanut tutsinneqassapput.  

§ 21 Ileqqoreqqusat atuutilerfiat

Ileqqoreqqusat uku akuersissutigineqarput IMAK-ip sinniisoqarfiata ataatsimiinnerani 16. – 17. november 2023-mi pisumi atuutilerlutillu tamatuma kinguninnguagut.

Nuuk ulloq 20. november 2023

Ilanngussaq 1 Ilinniartitsisut Meeqqat Atuarfianeersut Kattuffiata (IMAK`p) ileqqoreqqusaanut

Siulersuisoqarfimmut qinersinermi qinersiviit agguataarnerat, § 12-imut attuumassuteqartoq. 

Qinersivik 1:   Nanortalik, Narsaq, Qaqortoq, Paamiut, Maniitsoq

Qinersivik 2:   Nuuk

Qinersivik 3:   Sisimiut, Kangaatsiaq, Aasiaat, Qeqertarsuaq, Qasigiannguit, Ilulissat

Qinersivik 4:   Uummannaq, Upernavik, Qaanaaq, Ittoqqortoormiit, Tasiilaq

Ilanngussaq 2 ileqqoreqqusani § 3 imm. 3a malillugu:

Ilaasortat Namminersorlutik Oqartussat Allaffissuanni, Ilinniartitaanermut Aqutsisoqarfimmi kiisalu suliffeqarfinni Namminersorlutik Oqartussanut atasuni kiisalu kommunit allaffiini atorfeqanngitsut imatut immikkoortukkuutaarlugit agguataarneqassapput:

Immikkoortoq 7-imut ilaapput uillarnerit/nuleernerit qimagaasimasut

Immikkoortoq 8-mut ilaapput ilaasortat affarmik ilaasortaanermut akiliuteqartartut

Immikkoortoq 9-mut ilaapput ilaasortat Majoriami inuussutissarsiutitigut ilinniarfinni atorfeqartut

Immikkoortoq 10-mut ilaapput ilaasortat ilinniarnertuunngorniarfinni atorfeqartut

Immikkoortoq 11-imut ilaapput ilaasortat Ilinniartitsinermi Ilisimatusarfimmi allanilu ingerlaqqiffiusumik ilinniagaqarfinni atorfeqartut

Immikkoortoq 12-imut ilaapput ilaasortat sinneri immikkoortunut allanut ilaatinneqarsinnaanngit-sut.