Tusagassiutinut nalunaarut
Covid 19-ip atuunnerani pisortat suliffeqarfiutaanni allanngueqattaarnerit pileruttorfianni ilinniartitsisut puigorneqarput.
Ilinniartitsisut tassaapput ullormut inuppassuarnik naapitsisartut. Ilinniartitsisut ullut tamaasa
atuartut, suleqatit angajoqqaallu naapittuartarpaat.
IMAK-imiit maluginiarparput qitiusumiit kommuniniillu Covid 19-imik tuniluutsitsinaveersaarnermut atatillugu atuarfinnut qulaaniit peqqusinerit allannguinernik kinguneqartartut pisaqattaartut. Tamanna ilinniartitsisut toqqissisimassutiginagu kattuffimmut apuuteqattaarpaat.
Ilisimavarput pisortat pisinnaatitaaffeqartut assigiinngitsunik pisortatut iliuuseqarsinnaanissamut.
Puigorneqartartorli tassaavoq isumaqatigiissutit siumut ilisimatitsereerluni allannguinissamut tunngasortaat sinaakkutillu ilinniartitsisut oqartussaaqataanerannik sunniuteqaqataasinnaaneranillu aalajangersagaasut.
-Ulluni makkunani ilinniartitsisut ilisimasanngilaat suliartorunik “sumut miloriunneqassanerlutik” imaluunniit suliassatik suussanersut minnerunngitsumillu Covid 19-imik tunillanneqassanerlutik tunillaassanerlutilluunniit. Taamaattoqartillugu atuartut aamma toqqissisimannginnerat pilersarpoq.
Illua`tungaani Namminersorlutik Oqartussani kommuninilu allaffeqarfinni sulisut angerlarsimaffimminniit sulitinneqartut.
Pingaaruteqarluinnarpoq kommunini ingerlatsiviit atuarfinnilu pisortat isumaqatigiissutinik, najoqqutassanik sinaakkutinillu avaqqutaaralutik ingerlatsinnginnissaat. Isumaqatigiissutinik sinaakkutinillu avaqqutaarinerit pileraangata ilinniartitsisut toqqissisimajunnaartarput uippakajaalernissamullu qanittuararsuanngortarlutik.
Kingumut kommunit kaammattorumavagut atuarfinni ilinniartitsisut oqartussaaqataatillugit sunniuteqaqataatillugillu allannguisarnerit aaqqissuuteqqullugit, soorlu tamanna IMAK-imiit kommuninut nunatsinni Covid19-ip ajornartorsiutaanerata aallarteqqaarsimalernerani april 2020-mi kaammattuutiginikuugipput.
Namminersorlutik Oqartussanit Covid 19-imut atatillugu iliuuserilikkanut aalajangikkanullu paasissutissiineq paatsuuganermik pilersitsinngitsoq aaqqissuulluagarlu pisariaqarluinnarpoq.
Naggataatigut ilinniartitsisut nersorpakka unammillernarsinnaasumik inissisimanitsinni akisussaaqataalluarnerat, qujaffigerusullugillu pisussaaffinnik ataqqinnillutik assigiinngitsutigut naammassinninniartuarmata.
Elna Heilmann
IMAK-imi siulittaasoq/
Forkvinde IMAK
