IMAK Naalagaaffeqatigiit iluani tjenestemandit soraarnerit assigiimmik atugaqalernissaannik tamaviaarutiginnippoq. Naalakkersuisumilli akisussaasumik ataatsimeeqateqarniarneq akissutissarsiniarnerlu kattuffiup maannamut suli ilungersuutigeqai.
—
Ilinniartitsisut Meeqqat Atuarfianneersut Kattuffiat, IMAK, tjenestemandinik soraarnernik amerlasuunik ilaasortaqarpoq. Taakkua Naalagaaffeqatigiinnerup iluani assigiimmik aningaasarsiaqartinneqarnissaat kattuffiup qullersaani, Sinniisoqarfimmi, anguniagassatut aalajangersarneqarnikuuvoq. Tamannalu kattuffiup pingaartikkaa siulittaasoq naqissusiivoq.
– Kattuffiup qullersaata anguniagassatut aalajangiussai tamaasa pimoorullugit tamaviaarutigisarpagut, uani tjenestemandit soraarnerit pitsaanerusumik atugassaqalernissaat suliakkiutaammat aamma tamaviaarutigaarput, Elna Thomsen Heilmann oqarpoq.
Taassuma Aningaasaqarnermut Akileraartarnermullu taamani Naalakkersuisoq, Múte Bourup Egede (IA), siorna decembarip qaammataani ataatsimeeqatigaa. IMAK ilinniartitsisut tjenestemanditut soraarnerussutisiaqartut pillugit piumasaqaatiminik Naalakkersuisumut taassuma kingorna allakkatigut apuussivoq. Piumasaqaatit tassaapput:
- Danmarkimi naalakkersuisut Namminersorlutik Oqartussanik inerititaqarfiusussamik oqaloqateqalernerannut atatillugu IMAK-i tusarniarneqassasoq aammalu oqaloqatigiinnerup naammassinnginnerani oqaaseqarnissamut periarfissinneqassasoq.
- Tjenestemandit IMAK-ip ilinniartitsisutut soraarnerussutisiatta 2018/19-imili qaffaavigineqanngitsut kingumoortumik naalagaaffimmit tunniunneqarnissaat piumasaraarput.
- Iluarsiissuteqarnissami tjenestemanditut 1979 sioqqullugu nunatsinni atorfinissimasut ilanngullugit iluarsiivigineqassasut.
Naapeqateqarusunnerit kinguneqanngitsut
IMAK-ip siulittaasua Aningaasaqarnermut Akileraartarnermullu Naalakkersuisumut taakkuninnga piumasaqarnermi saniatigut Naalakkersuisumik aamma naapeqateqarluni ataatsimeeqateqarnissamik Naalakkersuisoqarfimmut kissaateqarpoq.
– Assammik isaassillunga naapeqateqarumasarnikka ulloq manna tikillugu suli iluatsinngillat. Isumaqarpunga tamanna kattuffimmut nukittuumik inissisimasumut suusupaginninnerullunilu ileqqorissaarnerunngitsoq.
– Taamaattumik maannakkut Naalakkersuisup, Aqqaluaq B. Egedep piaartumik naapinnissaa suli kissaatigaara. Ilaasortattami tjenestemandit ukiuni arlaqalersuni utaqqisinneqaannarnerat akuersaarsinnaanngilara, Elna Thomsen Heilmann oqarpoq.
Tjenestemandit soraarnerit nunatsinni Danmarkimilu atugarisaasa assigiinngissusaat pillugu nalunaarusiaq IMAK-ip 2024-mi upernaakkut saqqummersippaa. Tassani nunatsinni atukkat appasinnerusut inerniliussaavoq, assigiinngisitsineq annertooq piffissami sivisuumi suli atuuppoq. Tamanna qinikkanit piffissami sivisuumi soqutigineqarsimanngitsoq, IMAK isumaqarpoq. Nunatsinni Danmarkimilu qinikkat nalunaarusiap saqqummernerata kingorna aalassaqqallutik oqallipput. Oqallinnerli maannamut suli kinguneqanngilaq.
– Isumaqarpunga qinikkat ajornartorsiummik soorlu assigiinngisitsinermik, nalunngisaqarunik aammalu quarsaarunik, tamanna aaqqiissuteqarfiginiarlugu suliniuteqartussaasut. Maannamulli piffissaq sivisooq qaangiukkaluartoq aaqqiissummik, saaffiginnissutinut akissutinik allanillu suli tusannginnerput tupinnarsigaluttuinnaannarani utaqqikatannarsigaluttuinnarpoq. Suleqataarusoqaagut tamannalu piviusunngussappat aamma suleqatigineqartariaqarpugut saaffiginnissutigullu akineqartariaqarput, IMAK-ip siulittaasua oqarpoq.
Neriuutissaqalaartoq sulili saaffiginnissutit akineqanngitsut
IMAK Naalakkersuisoqarfimmut Naalakkersuisumullu saaffiginnissutimik akissutissarsinissaannik neriuuteqartuarpoq.
Inatsisartunut ilaasortaq, Nivi Rosing (IA), Inatsisartut 2024-imi ukiakkut ataatsimiinneranni tjenestemandinut tunngasumik suliaqarnikuunerat innersuullugu, tamanna suliaq Naalakkersuisut nanginniarneraat pillugu Naalakkersuisumut aasaq juulip naanerani apeqquteqarpoq. Aningaasaqarnermut Naalakkersuisoq suliap suli qamivissimannginneratut paasineqarsinnaasumik akissummi ilaani septembarip 17-ani ullulerneqarsimasumi ima allappoq:
“Ilanngullugu paasissutissiissutigineqarsinnaavoq, danskit aamma kalaallit tjenestemanditut soraarnerussutisiaasa oqaluttuassartatigut, teknikkikkullu assigiinngissutaat pillugit allakkiornissaq pillugu siulima danskit taamanikkut naalakkersuisorisai isumaqatigiissuteqarfigimmagit. Allakkiaq ataatsimoorussamik tusagassiorfinnut nalunaarummi eqqaaneqarpoq. Kalaallit Nunaanni aamma Danmarkimi najugallit tjenestemanditut soraarnerussutisiaasa naligiilernissaannut, allakkiami aaqqiissutissatut siunnersuuteqartussaavoq. Danmarkimi qinersineq aamma Aningaasaqarnermut Sulisoqarnermullu Aqutsisoqarfimmi sulisunik amigaateqarneq patsisaallutik allakkiornissaq kinguaattooqqavoq. Medarbejder- og Kompetencestyrelsip aamma Aningaasaqarnermut Sulisoqarnermullu Aqutsisoqarfiup suleqatigiinnerisigut allakkiaq massakkut allanneqaleruttorpoq.”
Tassa imaappoq, akissutip taassuma uppernarsarpaa Kalaallit Nunaata Danmarkillu akornanni atorfilittatigut piareersaasoqartoq paasivarput.
– Atorfilittat allakkiatut suliaat qinikkanut qaqinneqarnissaat tullinnguuttussaajumaassasoq ilimagisinnaavarput. Tassanngaannit tusarluarusunnaqaaq.
– Kissaaterpulli suli allanngunngilaq. Naalakkersuisumik piaartumik naapeqateqarusuppugut soraarnerimmi ilaasortagut paasinarluartumik utaqqikatalluinnarput, IMAK-ip siulittaasua naggasiivoq.
