Aningaasaqarnermut Naalakkersuisup, Aqqaluaq B. Egedep (IA), Naalakkersuisut aningaasanut aappaagumut inatsisissatut siunnersuutaat saqqummiuppaa. Siunnersuut kattuffiup siulittaasuata, Elna Thomsen Heilmannip, qimerlooreerlugu pakatsissutigaa.
—
Ilinniartitsisut Meeqqat Atuarfianneersut Kattuffiani, IMAK-imi, siulittaasup, Elna Thomsen Heilmannip, Naalakkersuisut aningaasanut aappaagumut inatsisissatut siunnersuutaat isornartorsiorpaa. Taassuma ilinniartitsisut pikkorissartarnerannut ilinniaqqittarnerannullu aningaasaliissutit takorusukkaluarpai.
– Pikkorissartarnermut ilinniaqqittarnermullu tunngasunut pitsanngoriaatit ataasinnguamilluunniit ersinngillat. Taannartaa iluaagivarput, Elna Thomsen Heilmann oqarpoq.
Taamaattumik tamanna pillugu sukataaruteqassalluni maanna nalunaaruteqarpoq.
– Tamanna qinikkanut isumaqatigiinniartussanut, tassa Inatsisartunut ilaasortanut, qaqinneqarnissaa naatsorsuutigineqassaaq, siulittaasoq oqarpoq.
Pikkorissartarnernut ilinniaqqittarnernullu aningaasaliissutit assersuutigalugu aningaasanut 2014-imi inatsimmi 17.5 millionit koruunit missaanniipput. 2019-imi ikinnerulerlutik 12.3 millionit koruuniupput. Siorna 2025-imi 3 millionit koruunit sinneqalaaginnarput aappaagumullu siunnersuummi aningaasaliissutit amerleriarnatik taamaaginnarput.
Ilinniartitsisut piginnaasaasa ineriartortinneqartuarnerat pitsaappat tamanna aamma atuartunut pitsaasumik sunniuteqassasoq, siulittaasoq isumaqarpoq.
Elna Thomsen Heilmannip oqarnera naapertorlugu ilinniartitsisut pikkorissartarnissamut ilinniaqqittarnissamullu periarfissaqarnissaat ilinniartitsisutut inuuniuteqarnerup orniginarnerulernissaanut aamma aalajangiisooqataavoq.
– Nunatsinni ilinniartitsisut amerlanerulissappata ilinniartitsisutut inuuniuteqarneq soqutiginarlunilu orniginartuusariaqarpoq. Orniginartuussappat ilinniartitsisup ilinniartitsisutullu sulerusuttup ujartortuartussaavaa ineriartornissaminut periarfissat qanoq innersut, taanna oqarpoq.
Ukiut pingasut pikkorissannginneq sivisuallaartoq
Ilinniartitsisoq ukiut arlallit pikkorissarsimanngippat, atuartitsissutigisartakkanilu pillugit ilisimasani nutartertarsimanngippagit, tamanna pitsaasuuneq ajortoq IMAK isumaqarpoq.
– Assersuutigalugu ilinniartitsisoq atuartitsissutigisartakkamini ukiualunnguani, soorlu pingasuni, pikkorissarsimanngippat, taava isumaqarluinnarpugut pissutsinut atuuttunut meeqqat ilikkarsarnikkut pisariaqartitaannut kinguussaalereertartoq, siulittaasoq isummerpoq.
Oqaatsit iliuuseqarnertaqanngitsut
Qinikkat meeqqat atuarfianni atuartitsinerup pitsaassusaa qaffassarusullugu arlaleriarlutik angorusutaminnik saqqummiussisarput. Taakkuattaaq atuartut ingerlaqqittartut amerlanerulernissaat kissaatigalugu oqaatigiuarpaat.
Elna Thomsen Heilmannili isumaqarpoq oqaatsit taakkua naammanngitsut, aningaasaliissutinilli malitseqartinneqartariaqartut.
– Atuartitsinerup pitsaassusaa Naalakkersuisut ujartortuarpaat. Kissaatigivaat atuartut ingerlariaqqittartut amerlanerussasut. Meeqqat atuarfiat tassani qitiutinneqaannavippoq kisiannilu aningaasartaqarnerusunik suliniuteqarfigerusunnagu. Oqaasiinnarniissanngippat taava maannakkuuvoq iliuuseqarnissaq, siulittaasoq uparuaavoq.
Siunnersuut ataatsimut isigalugu naammagisimaanngikkaa
Taassuma aningaasanut inatsisissatut siunnersuutip aningaasaqarnermut tunngasortai aamma isornartorsiorpai.
Siulittaasup Naalakkersuisut aningaasanik isertitassanik annerusumik eqqartuinnginnerat qanoq paasisariaqarnersoq eqqarsarnartoqartippaa.
– Naalakkersuisut aningaasanik isertitassanik annerusumik eqqartuinngimmata imatut paasisassaanerluni nunatsinni aningaasarsiornissaq isertitassaqarniarnissarlu immikkut suliniutigalugu pingaartinneqanngitsoq? Elna Thomsen Heilmann apeqqusiivoq.
Taassuma aamma oqaatigaa nunatsinni ilinniartitsisussameerneq inuuniarnikkullumi atugassarititat pitsaannginnerat eqqarsarnartuusoq.
– Ajalusoorfissatta killinganiippugut, ilinniartitsisussaqarniarnikkut, inuuniarnikkut, atugassarititaasut pitsaannginnamik. Illuatungaanut aallartinnissaanut motorimik aallartitserusuttoqannginnera taanna pitsaanngilaq, taanna naggasiivoq.
