Naalagaaffeqatigiinnerup iluani tjenestemandit soraarnerit akissaataat assigiinngeqaat. Tamanna pillugu IMAK Naalakkersuisunik ataatsimeeqatiserinnittaraluarpoq, kinguneqanngitsunik. Tjenestemanditut soraarneq tupigusullunilu utaqqikatappoq.
—
Ilinniartitsisutut sulinermi suliat assigiit soraarninngornermi akissaatit nikingasut. Tamanna ilinniartitsisut tjenestemanditut soraarnerit atugaraat. Soraarnerit Kalaallit Nunaanni najugallit Danmarkimiittunit akissaatikinneroqaat.
Nalunaarusiaq IMAK-ip 2024-imi saqqummersitaa naapertorlugu, meeqqat atuarfiani ilinniartitsisut tjenestemanditut soraarnerit, Danmarkimi najugallit, Kalaallit Nunaanni najugalinnit qaammammut 10.000 koruunit angullugit akissaateqarnerusartut inerniliussaavoq.
Cecilie Vahl tjenestemanditut Nuummi soraarneruvoq. Nunat Naalagaaffeqatigiit akunneranni akissaatit assigiinnginnerujussuat taassuma isumaqatiginngilaa.
– Uanga uggorisaqaara taamatut inissisimatitaanerput. Tupiginngilara ilinniartitsisorpassuit allat, tjenestemandit, Danmarkimut nuuttarmata pitsaanerusumik pensioneqarnissartik siunertaralugu, Cecilie Vahl oqarpoq.
Taanna 1973-imit ilinniartitsisutut sulilerpoq. 2011-imi pensionerpoq, 2016-illi tungaanut suleqqippoq. Ilinniartitsisup misilittagartuup assigiinngeqisunik akissaateqartitaaneq paasiuminaatsillugulu apeqqusertuarpaa.
– Eqqarsaatigisaqaara. Sooruna nunatsinni najugaqarutta appasinnerusumik pensionisiaqassasugut taakkutorluinnaq sulinikuugaluarluta?
– Danmarkimut nuukkaanni pensionisiat qaffassapput. Sooq taamaattoqarpa? Nunarput najugaqarfigalugu nalikinnerunerpoq? Taanna apeqqusiivoq.
Naalakkersuisut qisuariarneq ajornerat tupigigaa
IMAK-ip Aningaasaqarnermut Akileraartarnermullu siorna decembarip qaammataani Naalakkersuisoq, Múte Bourup Egede (IA), ilaatigut soraarnerit atugaat pillugit ataatsimeeqatigaa. Kattuffiup siulittaasuata Elna Thomsen Heilmannip IMAK-ip Naalakkersuisunut piumasaqaatai ataatsimiinnerup kingorna allakkatigut apuuppai. Taakkua tassaapput:
Danmarkimi naalakkersuisut Namminersorlutik Oqartussanik inerititaqarfiusussamik oqaloqateqalernerannut atatillugu IMAK-i tusarniarneqassasoq aammalu oqaloqatigiinnerup naammassinnginnerani oqaaseqarnissamut periarfissinneqassasoq.
Tjenestemandit IMAK-ip ilinniartitsisutut soraarnerussutisiatta 2018/19-imili qaffaavigineqanngitsut kingumoortumik naalagaaffimmit tunniunneqarnissaat piumasaraarput kiisalu iluarsiissuteqarnissami tjenestemanditut 1979 sioqqullugu nunatsinni atorfinissimasut ilanngullugit iluarsiivigineqassasut.
Taama piumasaqaateqarnerup saniatigut maanna atuuffimmi tassani naalakkersuisumik, Aqqaluaq B. Egedemik (IA), ataatsimeeqateqarusunneq IMAK-ip, Naalakkersuisoqarfimmut pineqartumut, arlaleriarluni allakkatigut apuuttaraluarpaa. Saaffiginnissutilli akineqanngisaannarput.
Tamanna soraarnerup akissaatit assigiinnerulernissaannik utaqqikatattup tupigaa.
– Utaqqikatannartorujussuuvoq. Tupigaara Naalakkersuisut IMAK-iminngaanniit saaffiginnissutinut qisuariartarsimannginneri. Piffissami taama sivisutigisumi saaffiginnissutit qanoq iliuuseqarfigineqarsimannginneri uggoreqaara tupigalugulu. Taakkuummatami pisussaaffillit politikkikkut aaqqiinissamut.
Soraarneq: Neriuppunga peqqinnitsinni tamakkua aaqqinneqassasut
Cecilie Vahl ukioqqortusiartorpoq. 80-it tungaanut ingerlavoq. Suleqatigisimasani Danmarkimi maanna najugallit assigalugit akissaateqalernissaminik neriuuteqartuarpoq.
– Assigiimmik pineqarnissamik neriuttuaannarpunga. Maannakkut utoqqanngungaatsiarpugut taamaattumik neriuppunga peqqinnitsinni tamakkua aaqqinneqassasut. Danmarkimut nuunnikutulli pitsaasumik soraarnerussutisiaqarnissarput pisariaqartipparput. Assigiimmik piumasaqarfigineqarluta sulinikuuvugut, taanna oqarpoq.
Taassuma IMAK-ip sukataaruteqarnera qujamasuutigaa.
– IMAK-ip sulinera qujassutissaqarfigeqaara suliniutiminnik angusaqarluarnissaannik neriuuteqarpunga.
Cecilie Vahlip oqarnera naapertorlugu Kalaallit Nunaanni tjenestemanditut soraarnerulluni ilaquttanit tapersersorneqanngikkaanni aningaasat tungaatigut inissisimaneq naammaginanngilaq.
