Kalaallit meerartaat amerlasuut, itisuumik oqaloqatigiissatillutik tuluit oqaasii kalaallit oqaasiinit ajornannginnerutittaraat Kangillinnguit Atuarfiani ilinniartitsisoq naliliivoq. – Taamaattumik meeqqat nukarliit kalaallisuinnaq oqaasileritittalernissaannut isuma pitsaavoq, Birgithe Geisler oqarpoq.
—
– Meeqqat tamarmik iPadeqartussaatitaalernerisa kingorna allanngoriartorneq sukkasoorujussuarmik ingerlavoq. Imaappoq kalaallisut oqaaseqatigiiliorsinnaanermik inoqatiminnillu oqaloqatiginnissinnaanerminnik kalallisut atuinerat killeqaleriartorpoq, Birgithe Geisler, Nuummi Kangillinnguit Atuarfianni ilinniartitsisoq oqarpoq.
Taanna 1989-imi ilinniartitsisunngorpoq, atuarfimmilu maanna atorfeqarfigisamini ilaatigut atuarsinnaanermut allassinnaanermullu inerisaasutut atorfeqarpoq. Birgithe Geisler, Ilinniartitsisut Meeqqat Atuarfianneersut Kattuffiata, IMAK-ip, Sinniisoqarfianut aamma ilaasortaavoq.
Ilinniartitsisoq misilittagartooq kinguaariit arlallit atuarfimmiinneranni ulluinnarni maannamut najuuttuarpoq. Tuluillu oqaasiisa meeqqanit atugaalernerujussuat aamma arajutsisimanngilaa. Meeqqammi amerlasuut pingaarutilinnik oqaatigisaqarniartillutik ilitsoqqussaralugu oqaatsitik, tassa kalaallisut oqaatsit, atorpallaarunnaaraat, Birgithe Geisler, sulinermini tusaasartakkani malillugit naliliivoq.
– Massakkut soorlu tusartalerpakka imminnut tuluttut oqaluuttut. Tuluttut oqaluunnerminni qamani eqqarsaatitik itisoorujussuit annissinnaasarpaat oqitsuararsuanngorlugit. Tuluttut oqaaserpassuit atorlugit nassuiaasinnaasarput. Kisiannili kalaallisut oqaloqatiginerini kutattarput, oqaasissaminnik nalornisarput oqaaseqatigiillu suut atussanerlugit nalulertarlugit, meeraaqqatut oqalullutik ikkattuararsuarmik, taanna oqarpoq.
Birgithe Geislerip aamma oqaatigaa, qangaanerusoq kalaallit meerartaat danskisuinnaq oqaasillit Nuummi takussaasut, maanna kalaallit meerartaat tuluttuinnangajak oqaasillit sinerissami tamarmi takussaanerat naatsorsuutigigini. Tassani atuartut tamarmik iPadeqarnerat innersuussutigaa.
– Taamaattumik aamma naatsorsuutigikannersinnaavarput sumiikkaluarunilluunniit massakkut taanna, tuluttut oqaatsit tiguaajartornerat arlaatigut pigineqartoq, Birgithe Geisler oqarpoq.
Inatsisissatut siunnersuummut isumaqataasoq
Naalakkersuisut meeqqat atuarfianni alloriarfinni minnerni fagit atuartitsissutit 13-it tallimaannanngornissaat kissaatigigamikku inatsisissatut siunnersuutertik tusarniutigeqqammerpaat. Isuma tamanna, tassa fagit atuartitsissutaasut ikilinissaat, Ilinniartitsisut Meeqqat Atuarfianneersut Kattuffiata, IMAK-ip, isumassarsiatsialattut nalileraa, kattuffiup siulittaasua, Elna Thomsen Heilmann, siusinnerusukkut tusarparput. Tamannalumi aamma Kangillinnguit Atuarfiani ilinniartitsisup isumaqatigilluinnarpaa. Fagimmi maannakkutut amerlassuseqartillugit piffissamik atuilluarniarsaraluni, tuaviorluni, atuartitsisoqartartoq taassuma ilaatigut tunngavilersuutigaa.
– Uanga taamatut allannguisoqarusunneranut isumaqataasorujussuuvunga. Ajorinngitsorujussuuara pissutigalugu atuartunut sakkussat tunniussassagut kusanartumik tunniussinnaagatsigit tuaviupilunnata, Birgithe Geisler oqarpoq.
Naalakkersuisut inatsisissatut siunnersuutaat pisarneq malillugu Inatsisartuni oqaluuserineqaqqaassaaq. Amerlanerussutillillu akuersippata aatsaat atuutilersinnaassalluni. Inatsisartunili qaqugu oqaluuserineqassanersoq suli ullulerneqanngilaq, taamaattumik qaqugu atuutileratarsinnaanera suli nalunarpoq. Kangillinnguit Atuarfianili ilinniartitsisoq nammineq piffissaliisinnaaguni piaarnerpaamik, tassa aasami atuanngiffioreerluni ukioq atuarfiusoq nutaassaq aallartippat periuseq taanna atuutilersikkusukkaluarpaa.
– Isumaqataasorujussuuvugut, neriuppugut iluaqutaangaatsiassasoq. Naalagaaguttaluunniit ukiamut aallartikkusukkaluarparput, Birgithe Geisler oqarpoq.
“Angajoqqaat kalaallisut oqaluttoqarnissaa pingaartinneruleriartoqqippaat”
Birgithe Geislerip angajoqqaat meeqqamik soorlu tuluit oqaasiinik atuilluarnerat ukiut siuliini tanngassimaarutigisaraluarlugu maanna taamaakkunnaariartortut maluginiarpaa.
Ilinniartitsisutoqqap maluginiagai naapertorlugit angajoqqaat kalaallit oqaasiinik meeqqaminnut ilikkartitserusuttut amerliartoqqilerput. Tamannalu nuannaarutigaa. Meeqqammi kalaallisut atuisinnaarpiarunnaarnerulissagaluarpata tamanna attaveqatigiinnermut kingunerlussinnaasutut aarlerigalugu ernumanartutut isigaa.
– Ukiut marluk-pingasut matuma siornatigut tusartarpagut angajoqqaat tanngassimaartut; Meerara tuluttut oqaluppoq, naa oqallorissorujussuuvoq. Kisianni taanna tusarsaajunnaaleriartorpoq qujanartumik. Tamassumami kingunerisinnaavaa immitsinnut attaveqatigiippiarsinnaajunnaarneq, Birgithe Geisler naggasiivoq.
