Isumaqatiginninniarneq Knud Rasmussenip Højskoliani pisortanut ilinniartitsinermillu sulialinnut atugarisatigut, akissarsianut pisinnaatitaaffinnullu isumaqatigiissuteqarfiuvoq.
Isumaqatigiissut Knud Rasmussenip Højskoliani suliassanut sulisunullu naleqquttoq maannamut sulisut akissarsiaannik atugassarisaannillu ajornerulersitsinngitsoq isumaqatigiissutaavoq. Isumaqatigiissuteqarnikkut ilanngullugu qulakkeerneqarpoq sulisut atugarisatik akissarsiatillu pillugit saaffiginniffissaqalernissaat.
Knud Ramussenip Højskoliata siulersuisuini siulittaasup Rasmus Frederiksenip isumaqatiginninniarnermi angusaasut nuannaarutigai:
“Isumaqatigiissuteqarneq Knud Rasmussenip Højskoliani inerisaanitsinnut siunissamilu suliassaalerumaartussanut naleqqussaanissatsinnut pingaaruteqarpoq. Knud Rasmussenip Højskoliani sulisussanik pikkorissunik pissarsiniarnitsinni akissarsiat atugassarititaasullu pillugit isumaqatigiissut ilinniarsimasunik allatigullu piginnaaneqarluartunik atorfinitsitsiniarnitsinnut neqeroorutitsialanngussaaq.”
Isumaqatigiinniarnerit angusaqarfiunerat torersumillu ingerlanneqarnerat IMAK-imi siulittaasup Elna Heilmannip nuannaarutigaa:
“Akissarsiat tapillu tunngaviusut, ilinniartitsisunut sulinngiffeqarnermi angalanernut tapiissuteqartalerneq/akiliunneqartalernerluunniit kiisalu pensionit isumaqatigiissutigigatsigit IMAK-imiit nuannaarutigeqaarput. IMAK-ip pingaartippaa Knud Rasmussenip Højskoliani sulisut ilinniartitsinermik suliaqartut toqqissisimanartumik pitsaasunillu sulinermut isumaqatigiissutinik aallaaveqarlutik sulisinnaanissaat, taamaalilluni sulisut sulinerminni atugassarititaminni sinaakkutitatigut illersorneqarsinnaanerat qulakkeerneqarluni.
Knud Rasmussenip Højskolia sinnerlugu isumaqatiginninniartitaasut piumassuseqarlutik isumaqatiginninniarnerat IMAK-imiit maluginiagarput nuannaarutigaarput.”
Isumaqatigiissut ukioq manna aprilip aallaqqaataani atuutilissasoq isumaqatigiissutaavoq.
