IMAK-imiit Tjenestemandit pillugit suliaasunik ilaasortanut paasissutissiineq.
IMAK-imiit ilaasortatsinnut tjenestemandinut tunngassutillit ukua paasissutissiisutiginiarpagut:
- Tjenestemandit pensioniinut qaffakkiartuutissaannut nalimmassaatit
- Tjenestemanditut atorfeqartut ilaasa pensioninut pinngitsoorani katersisussaatitaanermut peqataatinneqarnerannut tunngasoq
- Tjenestemandit nunatsinniittut pensioniisa DK-imi najugaqartunut naleqqiullugit nikinganerujussui
1.
Tjenestemandit pensioniinut qaffakkiartuutissaannut nalimmassaatit.
IMAK-imi siulittaasoq siulersuisut peqatigalugit qinigaaffimmi sulinertik aallartikkamikku suliniutit Sinniisoqarfiup aalajangersagai suliaralugit aallartippaat. Taakkua saniatigut immikkut Tjenestemandit nunatsinniittut pensionisiaasa qaffakkiartunnginnerat ingerlannaaq aamma suliniuteqarfigilerpaat.
IMAK-imiit anguniarneqarnikuuvoq, nunatsinni naalakkersuisut aammalu danskit naalakkersuisuisa naalagaaffeqatigiinnermi suleqatigiissuteqarnermi akisussaaffitsik inatsisinik isumaqatigiissutinillu tunngavilik atorlugu aaqqiissuteqarnissaat, tamannalu naammassisariaqalersoq qinikkanut susassaqartunullu allanut apuuttarnikuullugu. IMAK-iimit aamma piumasarineqarpoq kingumoortumik soraarnernut nalimmassaatinik qaffakkiartuutaasunik iluarsiissuteqartonissaa.
Maannakkut IMAK-imiit nalunaarutigisinnaavarput nunatsinni najugaqartunut Tjenestemandit pensioniinut qaffakkiartuutit kiisami Qallunaat nunaanni Finansministeriap ataani isumaqatiginninniartitaasut aamma Qallunaat nunaanni Qitiusumik tjenestemandit kattuffiisa isumaqatigiinniareerneranni inissinneqarsimalersut.
Apriilip aallaqqaataa 2019-imi qaffakiartuummi inissisimaffik 46,5896 %-iusoq 2020-mi, 2021-mi, 2022-mi 2023-milu nikisinneqanngilaq.
Apriilip aallaqqaataa 2024 aallarnerfigalugu Tjenestemandspensionit qaffakkiartornermi nalimmasaataat 56,6128 %-imut inissinneqarpoq. Taamaalilluni aprilip aallaqqaataani 2019
qaffaanerup kingulliup pineqaraniit 10 % sinnilaarlugu nalimmassaammik qaffaasoqarluni. Taakkualu ukiumut 10 000 kr.-it sinnerlugit tjenestamndspensionilinnut qaffaataapput apeqqutaassallunili ukiumut tjenestemandiusimasut pensioniisa ukiullu sulisimanerisa inissisimaffiat.
Erseqqissaatigissavarpulli uani qaffakkiartuutinik nalimmassaalluni iluarsiissuteqarnermi nunatsinni Danmarkimilu tjenestemandit tjenestmandspensionistillu tigusartagaannik assigiinnerulersitsinngimmata. Taannalu suliassaq suli IMAK-imiit ingerlanneqassaaq.
2.
Tjenestemanditut atorfeqartut ilaasa pensioninut pinngitsoorani katersisussaatitaanermut peqataatinneqarnerannut tunngasoq.
IMAK-imiit isumaqarpugut Tjenestemandit soraarnerussutisiassanut pinngitsoorani katersisussaatitaanermut peqataasussaannginnerat tunoqqutaarinikkut allanngortinneqartoq. Taamaattumik IMAK-imiit 2023-mi ukiakkut suliaq aallartipparput. Akileraartarnermut Aqutsisoqarfik Aningaasaqarnermut Naalakkersuisoq Naalakkersuisoqarfimmilu pisortaaneq sulinitsinni aqqusaarsimallutigit.
Allannguineq qulaani pineqartoq tjenestemandioreersut ilaannut kinguneqapiluppoq. Tassami tjenestemanditut atorfillit ilaasa IMAK-imit isumaqatiginninniunneqarnikkut aningaasarsiat angusaat maanaannaq soraarnerussutisiassanik pinngitsoorani katersisussaatitaanermut ilanngunneqarnerata kingunerisaanik aningaasat atugassatut tigummiaat ilanngarneqarput.
Tamannalu inatsisip suliarineqarnerani siunertaanikuunngitsoq IMAK-imit isumaqarpugut. Taamaassimagaluarpammi IMAK-i 2015/2016-imi tusarniaanermut allatorluinnaq akissuteqarsimassagaluarpoq aammalu isumaqatiginninniarnikkut aaqqiissutissamik IMAK piumasaqarsimassagaluarluni.
Juli naajartulersoq IMAK-imit allakkat apuupput tassanilu Naalakkersuisoqarfimmi pisortaanerup naqissuserpaa namminneq pinngitsoorani soraarnerussutisiassanut katersisussaatitaanermut nassuiaanertik attallugu aamma tjenestemandit akissarsiaasa ilaat (Løndele) pineqarpata.
Taamaattumik una killiffik aatsaat inatsisartutigut allanngortinneqarsinnaasutut inisseqqasutut oqaatigisariaqarpoq. IMAK-imiilli aamma isumaqarpugut isumaqatiginninniarnissamut tulliuttumut tjenestamandinut eqqugaasunut iliuuseqarfiginninnissaq nalilersoqqissaagassaasoq.
Tjenestemandinit IMAK-imut saaffiginnissutit qulit missaanniittut tigunikuuavut. Eqqugaasut saaffiginnitsullu amerlanngikkaluartut suliaq IMAK-imiit pimoorullugu ingerlanneqarpoq.
Naalakkersuisoqarfimmiit akissutaasartut piffissarujussaq ingerlareeraangat aatsaat apuuttarneri ajuusaarnartaqaaq.
Allakkiaq Naalakkersuisoqarfiimiit tigusarput tjenestemandinut eqqugaanikuusunut saaffiginnissuteqarnikunut ilisimatitsissutitut nassiunneqassaaq.
3.
Tjenestemandit nunatsinniittut pensioniisa DK-imi najugaqartunut naleqqiullugit nikinganerujussui.
Kalaallit Nunatsinni kattuffinnit siullersaalluni IMAK-ip kissaatiginikuuaa tjenestemanditut pensionisiallit Nunatsinni Danmarkimilu atugarisaasa sukumiisumik misissorneqarnissaat.
Misissuinermi suliassat suunissaat IMAK-imit siulersuisunit inissinneqarput. Suliassat ilaat suleqatigiissitamit pensionistinik tallimanik inuttalimmit eqqartorneqarlutillu suliarineqarput naggataatigullu IMAK-imit sulisinneqartumit allaqqissaarneqarlutik. IMAK-imiit sulisinneqartumit nalunaarusiaq IMAK-imut tunniunneqarmat IMAK-ip allaffeqarfiani misissoqqissaarneqarpoq paasissutissallu nalunaarusiami ilaatinneqartut eqqortuunissaat qulakkeerniarneqaqqaarluni.
Suliassiissutit allat allaffeqarfimmit suliarineqarput naallu Naalakkersuisoqarfimmit neriorsuutaanikut amigaataagaluartut nalunaarusiaq saqqummersinneqassasoq IMAK-imi siulersuisut aalajangiuppaat.
Ukiorpassuarni qinikkanit isiginngitsuusaarneqartoq aammalu IMAK-imit siusinnerusukkut aallunneqarluni suliarineqarsimanngitsoq IMAK-imi 2022-mi siulersuisunngortut pimoorullugu suliarilerpaat. Qujanartumillu nalunaarusiap saqqummerneratigut IMAK-illu arlaleriarluni tusagassiutitigut nalunaaruteqarlunilu qinikkanik ataatsimeeqateqartarneratigullu eqqartorneqarnera annerulerpoq.
IMAK-ip nalunaarusiaani takuneqarsinnaasutut nunatsinni danmarkimilu tjenestemandinut pensionernikunut assigiinngisitsineq annertooq qinikkanit isiginngitsuusaarneqarpoq.
Allaanngilarmi tjenestemandit soraarninngortut Nunatsinni asasamik akornanni kinguaaqarfigisaminnilu angerlarsimaffeqarniarlutik toqqaasut pillarniarneqartut. Pineqartut allatuulli naleqartinneqarlutik ataqqineqartariaqarput, taamaattumillu politikkerit pisussaaffitsik naammassisariaqaraat IMAK-imiit isumaqarpugut.
IMAK-imiit takusinnaavarput nunatsinni politiit akissarsiamikkut Qallunaat nunaanni politeeqatiminnut nalimmassaaffigineqarnerat nunatsinni tjenestemandspensioninut sunniuteqartinneqarsimanngitsoq. IMAK-imi tamanna maluginiaqqissaarparput nunatsinnimi Danmarkimilu Tjenestemandit pensionillit atugaat IMAK-ip misissuineratigut assigiinngitsorujussuusut ersersinneqarmat.
Allanngortoqarsinnaaneranilli neriuutissaqarpugut, tassaniipporlu suliassaq tulliuttoq. Tassa nunatsinni Aningaasaqarnermut Naalakkersuisoq Erik Jensen Inatsisartuni § 37 atorlugu apeqquteqaammut ilaatigut imatut akissuteqarmat:
“Aningaasaqarnermut Akileraartarnermullu Naalakkersuisoqarfik maannakkorpiaq tjenesetemandinut aaqqissuussinitta ilusilersorneqarneranut oqaluttuarisaanermi patsisaasorpiaat pillugit nalunaarusiorsinnaanermik periarfissanik misissuinera paasissutissiissutigissavara…”
IMAK-imiit Aningaasaqarnermut Akileraartarnermullu Naalakkersuisoqarfik attaviginikuuarput suliassaq pillugu annertunerusumik paasisassarsiorluta. Taanna malinnaaffigeqqissaarparput aammalu suliassaq pillugu IMAK-imiit Naalakkersuisoqarfik apeqquteqarfiginikuullutigu.
Qallunaat nunaanni Naalakkersuisut aamma ilimasaaripput Nunatsinni, Savalimmiuni Danmarkimilu Naalagaaffimmi atorfillit akissarsiaasa atugassarisaasalu assigiissaarnissaat anguniarlugu suliaqalerlutik. Suliarineqartussamut atatillugu siunnerfiuvoq 1. april 2026 atuutilertussamik aaqqiisimanissaq. Taakkua iluarsinissaannut pinngitsoorani tjenestemandit pensioniisa annertussusaannut sunniuttussaammat IMAK-imiit malinnaaffiginnillutalu sunniuteqarfigisinnaasagut atorlugit IMAK-imiit sulissuteqassaagut.
