Ilinniartitsisut Meeqqat Atuarfianneersut Kattuffiata, IMAK-ip, Sinniisoqarfianut ilaasortat 33-t, Ilulissani novembarip 15-nit 17-inut 2023-mi ataatsimeersuarput.
Ataatsimeersuarnermi kattuffiup ataatsimeersuaqqinnissaminnut tullermut, ukiut marluk qaangiuppata pisussamut, suliassaat arlallit aalajangersarneqarput.
Suliassani anguniagassanilu tullerni meeqqat immikkut pisariaqartitsisut initupput. Taakkuami ukiuni kingullerni amerliartortut Sinniisoqarfimmi ilaasortat oqarput.
Ilinniartitsisut kattuffiata immikkut atuartitsinermi, specialklassini atuartut amerlanerpaamik arfineq-pingasuunissaat piumasaraa.
Immikkulli ittumik pisariaqartitsilluinnartunut namminerisamik atuarfittaarnissaq, tassa specialskoletaarnissaq aamma kissaataavoq.
– Taamaaliorutta meeqqat immikkut pisariaqartitsisut ilikkagassaminnik angusamillu pitsaanerusumik angusaqartalissapput. Ilinniartitsisut sulerulunnerat annikillissaaq meeqqanullu immikkut pisariaqartitsisunut piffissaqarnerulissapput, IMAK-ip siulittaasua, Elna Heilmann oqarpoq.
IMAK isumaqarpoq ilinniartitsisut meeqqanut immikkut pisariaqartitsisunut ikiuinissaminnut sakkussaat pitsanngorsartuarneqartariaqartut.
Immikkut pisariaqartitsisunut ilinniartitsisuusunut pikkorissaanerit ataavarnerusut ilinniaqqiffissallu pitsaanerunissaat kissaataavoq.
– Ilisimatusarnikkut paasisat nutartertuarput. Meeqqanut immikkut ikiortarialinnut sullissisut taakkununnga malinnaatinneqarnissaat pingaaruteqaqaaq, Elna Heilmann oqarpoq.
IMAK: MISI-mi pappialarsortoqarpallaaqaaq
Kommunini meeqqat inuusuttullu pillugit siunnersuisarfinni, MISI-ni, sulineq pitsaanerulissasoq IMAK-ip kissaatigaa.
|
– MISI-ni sulisut ilinniartitsisullu immikkut ittumik atuartitsisartut nalunaarsuillutillu pappialarsorpallaaqaat. Ilinniartitsisut nukii meeqqat sullinnerinut atornerusariaqarput, Elna Heilmann oqarpoq nangipporlu: |
|
– MISI-ni sulisut ilaasortagut sulinermi atugaat akissarsiaallu pitsaanerusariaqavipput. Taakkua suliinnassappata naleqqussaasoqartariaqalerpoq, siulittaasoq oqarpoq. |
Naalakkersuisoq suleqatiserinnittoq
IMAK kattuffittut pilersinneqarnerminit ukioq manna ukiunik 25-nngortorsiorluni nalliuttorsiorpoq. Ilinniartitaanermut Naalakkersuisoq, Aqqaluaq B. Egede, ataatsimeersuarnermi oqalugiarpoq. Taassuma meeqqat atuarfianni ukiuni qulikkaani arlalinni suliassanik atsioqatigiilluni IMAK-imik suleqatiserinninnera kattuffiup siulittaasuata nuannaarutigaa.
– Taamaaliorutta angusassaq pitsaanerpaassaaq. Naalakkersuinikkut pissaanermik allannguisoqaraangat anguniakkat allanngortarneri takornartaanngilaq. Sangujoraarneq meeqqanut ilinniartitsisunullu pitsaanngilaq. Naalakkersuisup aggersaanissaanut qilanaarpugut, Elna Thomsen Heilmann oqarpoq.
Annertunerusumik paasisaqarusuttut itisiliititserusuttunullu saaffissaq:
IMAK-ip siulittaasua, Elna Thomsen Heilmann, oqarasuaat: 54 33 45 imaluunniit elh@imak.gl / imak@imak.gl
