IMAK ilaasortaminit amerliartuinnartunit saaffigineqartarpoq, suliffimminni pissutsit pillugit FB- kut ilanngusssaqarsimanertik imaluunniit tusagassiuutinut oqaaseqaateqarsimanertik pissutigalugu sulisitsisuminnit mianersoqquneqartarnertik soraarsitaanissaminnilluunniit sioorasaarneqartarnertik pissutigalugit toqqissisimajunnaarsimasunit. IMAK-imit sulisitsisut sulisuminnit uparuarneqaqqusaanngitsutut misigineqartarnerat ernumanartoqartipparput, annermik nalunnginnatsigu sulisut sulisitsisut iluatigisinnaasaraluinik ilisimasaqarluartartut. Soorunami ilaasortavut kaammattunngilagut tunngavissaqanngitsunik isornartorsiueqqullugit, kisianni sulisitsisut tamaasa kaammattorumavagut, sulisut tunngavissaqarluartumik uparuarumasaasa soqutiginerannik takutitsisaqqullugit, immaqalu annermik suut uparuaanermut tunuliaqutaanerat soqutiginerusaqqullugu.
Naqisimaneqanngitsumik oqaaseqarsinnaaneq inatsit tunngaviusoq aqqutigalugu pisinnaatitaaffittut qularnaagaavoq, Nunatsinni innuttaasunut tamanut atuuttoq, naqisimaneqanngitsumillu oqaaseqarsinnaatitaaneq tassaavoq tamat oqartussaaqataanerannut ingerlalluartumut tunngaviusoq, tamatta oqaatsitigut allatatigullu isummatsinnik saqqummiisinnaanitsinnut pisinnaatitaaffiliisoq, tamatumunnga ilanngullugu inuiaqatigiit qanoq iluseqarnissaat pillugu isummatsinnik saqqummiisinnaanermut.
Taamaalilluni aallaavittut tamatta qanorluunniit inissisimagaluarutta kinaagaluaruttaluunniit sunaagaluartorluunniit pillugu isummatsinnik saqqummiussisinnaatitaavugut. Tamanna paarilluartariaqarparput, tassaavormi tamat oqartussaaqataaneranni tunngaviusumik pisinnaatitaaffik, naqisimaneqarani eqqarsaatersorsinnaanermut oqaloqateqarsinnaanermullu inuiaqatigiit ingerlalluartut pinngitsoorsinnaanngisaannut tunngaviusoq.
Naqisimaneqanngitsumik oqaaseqarsinnaaneq atorfeqarnermi pissutsit pissutigalugit killilerneqarsinnaavoq – tamatumunnga assersuutigalugu pissutaasinnaapput nipangiussisussaatitaaneq imaluunniit kattuffimmi suliffeqarfimmiluunniit pisortatut inissisimanermut atatillugu tunaartarisassat. Taamaannera pissutissaqarluarpoq. Kisianni suliffiup tusaamaneqarnera innuttaasup naqisimaneqarani oqaaseqarsinnaatitaaneranit pingaarninngunngisaannassaaq, aamma suliamut atatillugu tunngavilersukkamik apersuusersuilluni saqqummiinissaq kingunerisassaanut ernumaneq pissutigalugu tunuarsimaarfigineqanngisaannassaaq. Tamanna inuiaqatigiinnut inatsisinik tunngaveqarluni ingerlanneqartumut naapertuuttuunngilaq.
Taamaammat qanoq iliussaagut, naqisimaneqanngitsumik oqaaseqarsinnaatitaanitta killilersugaanerata oqaaseqarsinnaatitaanermut annikillisippagu, annermik oqaaseqaat inuiaqatiginni uparuartariaqartumut tunngasuuppat?
IMAK-imi ilaasortagut Nunatsinni ilinniartitaanerup aaqqissugaanerata ilarujussuanut akuupput, taamaammallu ilaasortagut meeqqat atuarfianni aamma kommunini Namminersorlutillu Oqartussani ingerlatsivinni sulianut ulluinnarni qanimut attuumassuteqartuupput. Ilaasortagut aamma Majoriani sulipput imaluunniit pisortat susassaqarfiini allani imaluunniit tunngaviusumik atuarfinni namminersortuni efterskolinilu ilinniartitsinermik suliaqartuullutik.
Taamaammat ilaasortatta suliffigisaasa assigiinngisitaaqisut nassatarivaat, ilaasortagut tassaammata Nunatsinni ingerlatseqataasut pingaarnerpaat ilaat, taakkuami qularnaartarpaat ilinniartitsisutta, atuartut naggataatigullu sumiiffinni ataasiakkaani nunalu tamakkerlugu inuiaqatigiit ineriartornissaat. IMAK-ip suliassaasa pingaarnersaraat ilaasortat kikkulluunniit aningaasaqarnikkut, perorsaanikkut aamma sullivinni avatangiisinut tunngatillugu soqutigisaasa isumaginissaat, sulinerminni annertunerpaamik tapersersorneqarnissaat siunertaralugu. Taamaammat aammattaaq soqutigisarivarput ilaasortatta isumaasa saqqummiunneqarlutillu tusaaneqarnissaat.
Ilaasortatta inuiaqatigiinnut pingaaruteqarluinnartumik suliaqarnerisa aammattaaq kingunerivaa, pissutsit siunertamut naapertuutinngitsoqartut ajornartorsiutillu ilaasortatta sulinerannik ajornakusoortitsilersumik pissuseqarfigineqartut eqqumaffigilluarmatigit, meerartavut inuusuttavullu toqqissisimasumik sinaakkutissaqarlutik atuartinneqarsinnaaqqullugit.
Ilaasortatta amerlanersaat pisortani atorfeqarput, taakkulu annertuumik naqisimaneqanngitsumik oqaaseqarsinnaatitaapput. Imaappoq nammineerlutik oqallinnernut tamanut ammasunut peqataasinnaasut inuttullu isummaminnik isiginneriaatsiminnillu saqqummiisinnaasut. Taamaattoq pisortani atorfeqartup naqisimaneqanngitsumik oqaaseqarsinnaatitaanera taamaallaat atuuppoq atorfilik nammineq inuttut isummaminik saqqummiigaangat, suliffigisani sinnerlugu oqaaseqarnani imaluunniit qanoq sutulluunniit inissisimanini tunngavigalugu oqaaseqarnera nalornissutigineqalersinnaanngippat. Taamaalilluni sulisitsisoq sinnerlugu oqaaseqartoqassappat, sulisitsisup pisinnaatitaaffigaa suut kimillu oqaaseqaatigineqarsinnaanersut pillugit tunaartarisassaliornissaq, taamatullu sulisitsisup atorfillit tunaartarisassat akerliannik iliuuseqartut iliuuseqarfigisinnaallugit.
Arlallit qunulersinnaapput
Ilinniartitsisoq soriarsinnaajunnaartitaasutut misigisinnaavoq, arlaleriarluni kinguneqartinneqanngitsunilli aqutsisuminut saaffiginnittarsimaguni, whistleblowereqarnermillu aaqqissuussineq atorlugu aqutsisut kommunillu atuarfiup atortulunnera, atuakkat pisoqalillutillu nungullarnikut, init atuartitsiviit peqqinnanngitsut, oqoqarnera nungullarsaataasullu allat ilikkariartornermut annertuumik sunniuteqapilussinnaasut pillugit saaffiginnittaraluarnini kinguneqanngippata.
IMAK isumaqarpoq, uagut ilaasortagullu mianersoqqusinissamut immikkut pisinnaatitaaffeqartugut imaluunniit politikeritsinnut saaffiginnissinnaatitaasugut, suliamik ilisimasaqarnerput tunngavigalugu nalilerutsigu, kissaatiginanngitsumik sammineqartoqartoq.
Taamaattoq takornartaanngeqaaq ilaasortatta atorfeqarnerminni nipangiussisussaatitaasarnerat imaluunniit naqisimaneqaratik oqaaseqarsinnaanermikkut killilersugaasarnerat, tamannalu pissutigalugu ilaasortaq suliffini sinnerlugu oqaaseqassaguni, pineqartullu unioqqutikkunigit pineqaatissinneqarsinnaanera. Naggataatungaatigut kingunerisinnaavaa ilaasortap suliassaminik akisussaaffimminillu pimoorussisup suliunnaarallartitaagallarsinnaanera immaqalu allaat soraarsitaanera.
Suliamummi atatillugu ernummatit?
Pineqartut ilaasortatsinnut puullaaqinarsinnaasaqaat, tassami uagut paasinninnerput naapertorlugu naqisimaneqanngitsumik oqaaseqarsinnaatitaanermut killiliussat isiginiarneqartariaqaraluarput oqimaaqatigiisinneqarlutillu atuartut, ilinniartitsisut sulisullu allat isumassornissaannik pisussaaffeqarnermut naleqqiullugit. Assersuutigalugu qanoq iliortoqassava, meeqqat atuarfianni ilinniartitsisutut arlaleriaqaluni qullersarisanut kommunimilu oqartussaasunut uparuaasarsimagaanni, atuarfimmi meeqqanut naammattunik piginnaaneqarluartunillu sullissisoqanngitsoq? Kommunilu ilinniartitsisoq imaluunniit atuarfik qanillattorniarlugit iliuuseqanngippat? Soorunami nipangiinnartoqassanngilaq, nipangiinnaraluaruttami nikeriarnavianngilagut. Ilaasortatta ilaat allannguisoqarnissaanik neriuuteqarlutik oqaaseqaateqarnissamut aqqutissaasut periarfissaasullu tamaasa atortarnikuuaat naggataatigullu tusagassiuutinut saaffiginninnissaq toqqartarsimallugu, kisiannili naqisimaneqanngitsumik oqaaseqarsinnaatitaanerup killilersugaanera pissutigalugu taamatut pisoqarnerani ajutoortotaqartarlutik. Naqisimaneqarani oqaaseqarsinnaatitaaneq killilersugaanersoq arlalitsigut paasiuminaatsinneqartarpoq, tamatumanilu erseqqissartariaqarparput aqutsisut akisussaaffigimmassuk, naqisimaneqarani oqaaseqarsinnaataanerup killigiunnagaanik ilaasortatta ilisimatinneqarnissaasa qularnaarnissaat.
Maluginiarparput suliffigisaq sinnerlugu oqaaseqaateqartoqarneranut atatillugu sulisup naqisimaneqarani oqaaseqarsinnaatitaanerminik atuisup pineqaatissinneqarnissaanut piffissaq atorneqartartoq, ajornartorsiutip saqqummiunneqartup aaqqiiviginissaanut piffissamit atorneqartumit annertunerusartoq. Taamaalilluni piffissaq annerusumik atorneqartarpoq ilaasortatta pisortani atorfeqartut naqisimaneqanngitsumik oqaaseqarsinnaatitaanerannik killilersuinermut, saqqummiunneqartup tamanut ammasumik oqallinnermut ilaatinnissaa taamaalillunilu ilinniartitaanerup aaqqissugaanerani ajornartorsiutigisinnaasatta aaqqiiviginiarnissaa pineqarani. Paarlaallugu kaammattuutigivarput nunami tamarmi pisortani oqartussaasutut aqutsisut naqisimaneqanngitsumik oqaaseqarsinnaatitaanerup imarisassai isiginiarnerussagaat, oqaaseqarnermi periusaasimasoq kimillu oqaatigineqarnera piunnaarlugit.
Ilaasortagut Nunatsinnilu innuttaasut allat isummernissaminnut qunusiarineqassanngillat!
