Ilinniartitsisut kattuffii, Education Internationalimut ilaasortaasut, arlalissuit, Nuuummi katersuutilerput. Nunatsinni ilinniartitaaneq ataatsimoornerlu qulequtaassapput. Ataatsimeersuarneq toqqaannartumik malinnaaffigineqarsinnaassaaq.
—
Ilinniartitsisut Meeqqat Atuarfianneersut Kattuffiat, IMAK, nunarsuarmi ilinniartitsisut kattuffippassuisa tikeraalerpaat. Nunarsuaq tamakkerlugu kattuffiit, ilinniartitaanermik suliallit kattuffissuannut, Education Internationalimut, ilaasortat amerlasuut, sapaatit akunneranni 24-imi Nuummi ataatsimeersuassapput.
– Ataatsimeersuarneq Nuummi juunip arfineq-pingajuannit qulingiluaat ilanngullugu ataatsimoorfigalugu ataatsimeersuarfigissavarput. Ataatsimeersuarnermi qulequtassarput tassaavoq; Kalaallit Nunaanni ilinniartitaaneq – ataatsimoornermillu oqariartuuteqarneq, IMAK peqatigalugu ataatsimeersuarneq, IMAK-ip siulittaasua, Elna Thomsen Heilmann oqarpoq.
Peqataasussat siammaseqisut
Ilinniartitsisut kattuffiisa, Education Internationalimut ilaasortaasut aallartitaat, Nuummut ataatsimeersuariassapput. Nunat peqataatitaqartussat ilaatigut makkuupput: Hawaii, Mexico, USA, Canada, Island, Savalimmiut, Danmark, Sverige, Norge, Irland. Kalaallit Nunaanni ilinniartitaanermut attuumassutillit arlallit aamma qaaqqusanut akuupput.
Ataatsimeersuarneq soqutiginnittunit tamanit malinnaaffigiumaneqassaqisoq naatsorsuutigineqarpoq. Taamaattumik IMAK pitsaasumik piareersaateqarpoq.
– Nunatsinni ilaasortagut aammalumi kikkulluunniit soqutiginnittut tamarmik ataatsimeersuarneq toqqaannartumik malinnaaffigisinnaajumaarpaat, siulittaasoq oqarpoq.
Anguniagaq
Nunarsuatsinni ilinniartitsisut kattuffippassui, aatsaat taama amerlatigalutik, Kalaallit Nunaannukarlutik, IMAK-imut tikeraarnissaat kattuffiup tulluusimaarutigeqaa.
– Kalaallit Nunaanni ilaasortatta pitsaanerpaamik atugassaqarnissaat sulinitsinni pingaarnerpaavoq, pingaarnerpaajuassaarlu. Taamaammat nunarsuarmi nunat tamalaanit taama tikeraarneqartussanngorneq kattuffimmut nukittuallaataaqaaq, takusinnaavarpummi nunarsuarmioqatitta qanoq pingaartitsigalutalu tapersersortigineraatigut, Elna Thomsen Heilmann oqarpoq.
Ataatsimeersuarnermi anguniakkat arlaqarput. Tikeraat IMAK-imut tapersersuipput. Ullunilu taakkunani oqallisissaaleqisoqassanngilluinnartoq siulittaasoq naatsorsuuteqarpoq.
– Ataatsimeersuarnermi oqallisissatta pingaaruteqartut ilaat tassaapput; Ilinniartitsisunut politikki, kattuffittut isumaqatigiinniartarnerit, sullivimmi avatangiisitigut atukkat, ilinniartitsisut ilitsoqqussaralugu oqaatsiminnik atuartitsinerminni atuisinnaanerat aammalu atuartunut angujuminaatsutut inissisimasinnaasut atugaannik immikkut ukkatarinninneq, Elna Thomsen Heilmann oqarpoq.
Kalaallit Nunaata tatineqarnera ataatsimoorfiusoq
Kattuffiit aallartitarpassuisa, Kalaallit Nunaata nunanit pissaanilissuarnit tatineqarnera arajutsinngilluinnarpaat. Tikeraartussallumi IMAK-imik Kalaallit Nunaannillu aammalumi tamat oqartussaaqataanerannik illersuisuupput.
– Nunarsuarmi nalagaaffiit pissaanilissuit, Kalaallit Nunaata inui ilinniartitsisullu siunissaat pillugit, siornatigut takusimanngisatsinnik, tatisiniarnerat siorasaariuarnerallu pillugit nunat assigiinngitsut akornanni peqatigiilluta nikisinneqarsinnaanatalu Kalaallit Nunaannik tapersersuinerput takutissavarput.
– Pissanganaqaaq, aamma nunatta tatisimaneqarnera pillugu, Inatsisartut ataatsimiittarfiata silataani katersuunnisamik pilersaaruteqarpugut, IMAK-ip siulittaasua oqarpoq.
Tunuliaqutaa
Isuma kattuffiit Nuummi katerinnissaannut tunngasoq siorna pilerpoq. Education Internationalimeersut aamma nunat avannarliit killiit ilinniartitsisunut kattuffiisa suleqatigiiffianit, Utnord-imeersut, septembarip qaammataani Nuummiipput. Tamannalu maanna aaqqissuussamut tunngavileeqataalluinnarpoq.
– Nunani assigiinngitsorpassuarni ilinniartitsisut kattuffippassui taakkua tikeraarnerisa kingornatigut tapersersuinerminnik oqariartuuteqarput. Tamatumanilu isumaqatigiippugut nunarsuatsinni ilinniartitsisut kattuffii pisinnaasut peqatigalugit nunatsinni ataatsimeersuartoqassasoq. Nunatsinni ilinniartitsisut atugaat ilinniartitsisutullu inuuniuteqarnerup killiffia qaffaallaateqassasoq neriuutigaarput, Elna Thomsen Heilmann naggasiivoq.
