IMAK-ip Namminersorlutik Oqartussallu akunnerminni isumaqatigiissutaat siorna apriilip aallaqqaataani atuukkunnaarpoq. Nutaaq maanna atsiorneqarsimalerpoq. Piffissaq sooq taama sivisutigisoq isumaqatigiinniartoqarpa? Uani paasisaqarit.
—
Ilinniartitsisut Meeqqat Atuarfianneersut Kattuffiat, IMAK, pisortanut, tassa Namminersorlutik Oqartussanut, sulinermi atukkat pillugit isumaqatigiissummik atsioqqammerpoq.
– Ilaasortatta sulinerminni atugaasa sinaakkutissaat illua-tungerisagullu kiisami isumaqatigiissutigivagut. Isumaqatigiinniarneq sivisoqaaq, ilaasortat utaqqikatalersimasut paasilluarsinnaavakka, Elna Thomsen Heilmann oqarpoq.
Isumaqatigiinniutaasoq siulersuisut maanna akueraat. Tamannalu tassa ilaasortanit taasissutigineqartussanngorpoq.
– Ilaasortatta – uagullumi sivisuumik utaqqinikuunerat sumik ilaatigut tunngaveqarnersoq ilaasortatsinnut ilisimatitsissutigilaarusupparput, siulittaasoq oqarpoq.
Ukioq ataaseq sioqqullugu piareersarneq
Isumaqatigiissut maanna atuukkunnaalersoq siorna apriilimut killeqarpoq. Tamannali sioqqutingaatsiarluguli kattuffik piareersarluni aallartippoq.
– Pitsaanerpaamik isumaqatigiissusiornissarput soorunami pingaartipparput, taamaattumik isumaqatigiinniarnissat sioqqutingaatsiarlugit tassa 2024-imi upernaakkut piareersaatit aallartippagut. Ilaasortagut amerlasuut tikippagut tassani isumaqatigiinniarnissatsinnut kissaatigisaat suunersut tusarpagut, isumaqatigiinniarnitsinni iluaqutigilluakkatsinnik, siulittaasoq oqarpoq.
Kissaatit katersorneqareermata siulersuisut ataatsimiipput. Sinniisoqarfiup ilaasortat kissaataat 2024-imi oktobarip qaammataani oqaluuseralugillu inississorpaat. Tamassuma kinguninngua Namminersorlutik Oqartussat isumaqatigiinniarneq siulleq 2025-imi januaarimi pissasoq, aggersaallutik, neriorsuutigaat.
Aggersaasoqanngitsoq
Neriorsuutigisartilli piviusunngortinngilaat. 2025-imi januaarimi aggersaanngillat. Upernaaq tamaat IMAK-imut tutsiuttoqanngilaq.
– Maajip qaammataani, tassa isumaqatigiissutitoqanngortup atuuffiata qaangiutereernerani, illua-tungerisagut aatsaat tutsiupput. Tassalu isumaqatigiinniarnissamut piareersaatit aatsaat tassani aallartilluarput. Taamanili ilimangeriikannerparput isumaqatigiinniarneq sivisusinnaassasoq, Elna Thomsen Heilmann oqarpoq.
Isumaqatigiinniarnerup qanoq ingerlanissaa, tassani piffissaliussanut missingiut ilanngullugu, illua-tungeriit juulimi suliaraat. Taakkua piumasaqaatitik kissaatitillu aggustip qiteqqutilernerani saqqummiuppaat.
Avissaarallartut
– Isumaqatigiinniarneq siullerpaaq septembarip 15-anni ingerlapparput, Elna Thomsen Heilmann oqarpoq.
Taassuma kinguninngua ullut pingasut isumaqatigiinniartoqaqqippoq. Tamannali isumaqatigiinnermik kinguneqanngilaq.
– Isumaqatigiinniarnerit naammassinngillat. Illua-tungerisatta piareersarsimanerat annikippoq paasiniaaqqaarnerit amerlasuut aammalu akissutaasut ”pitsaanngitsut” nalaappagut, Kattuffik ilisimatitsivoq.
Taassuma kingorna IMAK isumaqatigiinniaqqinnissamut piareersarpoq. Isumaqatigiinniarnerillu oktobarip qaammataani nangipput.
– Suliassat isumaqatiginniutissallu arlalissuit naammassineqarput. Taamaakkaluartoq aningaasarsiat qaffariaatigisinnaasaannut tunngasoq isumaqatigiissutiginngilarput, taamaattumik qaqugu naapeqqissalluta isumaqatigiinnata tassani immitsinnut avissaarallarpugut, IMAK ilisimatitsivoq.
Ukioq nutaami aallarteqqinneq
Sinniisoqarfik novembari qiteqquttoq ataatsimiippoq, tassa suli naapittoqaqqinngitsoq. IMAK naapinnissamik kaammattuuteqartaraluarpoq. Ukioq 2025 naavoq naapeqqittoqarani.
– Saaffiginnissutigut ukioq manna januaarimi kiisami akineqarput oqaloqatigiinnerillu nangipput. Isumaqatigiinniarnerup inaarsarnissaa februarimi ilimanarsivoq naak suli aaqqitassarpaalussuaqaraluartoq, siulittaasoq oqarpoq.
Taassuma kingorna, tassa marsip, apriilip maajillu qaammatai iluarsisassat kingulliit iluarsinerinut atorput, isumaqatigiissutissarlu maaji naalluinnartoq inissippoq, juunillu aallartinnerani atsiorneqarluni.
