Soraarnerussutisiallit suliap naammassinissaannut utaqqikatapput.
Qallunaat nunaanni folketingimi ukioq manna januari naalersoq inatsit naalagaaffimmi tjenestemanditut atorfeqartunut tunngasoq naammassineqarpoq.
Nunatsinni Aningaasaqarnermut Akileraartarnermullu Naalakkersuisoq oqaaseqarpoq suliassaq tullinnguuttoq tassaasoq; Naalagaaffimmi tjenestemanditut atorfillit isumaqatigiissullu malillugu isumaqatigiissuteqartut nalingiisilernissaat minnerunngitsumillu tjenestemandit soraarninngoreernikut aamma ilanngullugit.
Nunatsinni Aningaasaqarnermut Akileraarutinullu Naalakkersuisumit Oqaatigineqartoq “Naalagaaffimmi tjenestemanditut atorfillit isumaqatigiissullu malillugu isumaqatigiissuteqartut nalingiisilerneqarnissaat” suli pisortatigoortumik paasinngilarput kikkut pineqarnersut aammalu sunik imaqarnersoq. Unali kingulleq tassa tjenestemandit soraarninngoreersut Naalagaaffimmi soraarnernut nalingiisinneqalernissaat aamma IMAK-imiit 2022-miilli suliniutaasoq aammalu 2024-mi IMAK-imiit nalunaarusiamik pilersitsinitsigut politikerinut kaamisaataalluarnikoq inissinniarneqarpoq.
Suliassap inaarnissaanut qallunaat nunaanni Folketingimut qinersisoqarnera kinguarsaataasorigaluarlugu neriulluarpugut naammassineqassasoq. Sulili siusinnerusukkut nalunaarutigeriikkatsitut IMAK-imiit suliassaqarpugut, Sinniisoqarfik november 2025 ataatsimiimmat imatut aalajangertoqarpoq:
- Tjenestemandit / Statsansat ilinniartitsisutut soraarnerussutisiatta 2018-imili qaffaavigineqanngittut kingumoortumik naalagaaffimmit tunniunneqarnissaat piumasaraarput.
Taannalu nunatsinni Naalakkersuisunut tunniunneqareernikuuvoq. Tassani aamma IMAK peqataatinneqarlunilu paasissutissinneqartarnissaa kissaataanikuulluni.
IMAK-imiit 2022-mili suliniuteqarnerput suli ingerlavoq aammalu IMAK-ip sinniisoqarfiata november 2025-mi ataatsimiinnerani suliassiissutaasut ingerlanneqarlutik.
Tassa suliaq maannakkut Naalakkersuisuniittoq paasisaqarfiginiarlugu ukiumilaali Naalakkersuisumik naapitsinissaq IMAK-ip siulittaasuata noqqaassutiginikuuaa sulili Naalakkersuisusoq periarfissaninngilaq, nukinginsaarummik maajimi nassiussinitsinni ilisimatitsissut taamaappoq.
IMAK-imiit apeqqutigerusupparput Tjenestemandinut soraarninngorsimasunut suliaq Naalakkersuisut unitsissimaneraat?
