Nunatsinni susoqartoruna? Suna naatsorsuutigisinnaavarput?
Namminersorlutik Oqartussani kommuninilu sulisitsisut isumaqatigiissutinik sulisullu inatsisitigut illersugaanerannik maleruaasannginnerat ilinniartitsisut kattuffiannit IMAK-imit kipiluttunartutut nalilerneqarpoq.
Piffissami sivitsortumi IMAK-ip maluginiarlugulu naammaginanngitsutut uparuartarpaa Namminersorlutik Oqartussani kommuninilu sulisitsisut isumaqatigiissutinik sulisullu inatsisitigut illersugaanerannik maleruaasannginnerat, IMAK-imi ilaasortat sulisullu allat toqqissisimannginnerannik kinguneqartoq.
”Nammineq kattuffittut pissutsinut malinnaanerput aamma ilaasortatsinnit sulisunillu allanit saaffigineqartarnigut tunngavigalugit ersarissigaluttuinnarpoq sumiiffinni arlalinni aqutsisut kisermaassillutik qulaanillu naalakkiiginnartarlutik ingerlatsisut,” IMAK-ip siulittaasua Elna Heilmann oqarpoq, nangillunilu: ”Isumaqarpunga tamatumunnga pissutaaqataasoq, sulisitsisut isumaqatigiissutinik inatsisinillu atuuttunik nalornisarnerat, tamatumalu kingunerisaanik kisermaassillutik naalakkiiginnartarlutillu aqutseriaaseqalersimanerat, taamaalillutillu sulisuminnikpeqataatitsiumasannginnerat, allaat sulisunik ataqqinninnginnermik taaneqartariaqartoq.”
IMAK aammattaaq isumaqarpoq atuarfinni aqutsisut atorfilinnut qulliunerusunut ilisimasaqarluartunullu saaffissaaleqisarnerat ajornartorsiutinut pissutaaqataasoq, taamatumunngalu ilaatigut ersiutaavoq Namminersorlutik Oqartussani kommuninilu oqartussanik oqaloqatiginnikkumalluni IMAK-imiit saaffiginnittaraluarnerit kinguneqartannginnerat.
Elna Heilmann oqarpoq: ”Suliassat arlallit ukiorpassuanngortuni uninngaannarput, aamma assersuutigalugu isumaqatiginninniarnerni kingullerni ataatsimoorluni siunnerfissatut isumaqatigiissutaasut suli piviusunngortinniarlugit aallarnisaasoqanngilaq.”
Isumaqatigiissutit naapertorlugit sulisut ingerlatsinermut sunniuteqaqataasinnaanerisa atuutsinneqannginerisa kingunerisa ilagaat kikkulluunniit naqisimaneqanngitsumik oqaaseqarsinnaatitaanerisa ilumut atuunneranik nalorninerit sulisullu tunuarsimaartunngortitaanerat.
”Nalunngilarput kommunit atuarfinnut sipaarniarnerisa kingunerisaanik atuartut eqqugaasartut, soorlu tiimit atuartitsiviusussat ikilisarneqaraangata, aamma ilinniartitsisunik qaangiuttoortoqannginnissaa tunngaviliullugu timelærerinik ilinniarsimanngitsunik atorfinitsitsisarneq atorneqarpoq, naak aaqqissuussilluarnikkut ilinniartitsisooreersut ilinniarsimasut ingerlatsisinnaagaluartut,” Elna Heilmann nassuiaavoq nangillunilu: ”pissutsit taamaattut meeqqanik meeqqallu atuartitaanerannik eqquisarput, aaqqiivigineqassappatalu meeqqat angajoqqaallu ulluinnarni qanimut peqatigalugit sulisut, tassalu ilinniartitsisut, isumaqatigiissutit inatsisillu atuuttut naapertorlugit peqataatinneqartariaqarput.”
Elna Heilmann naggasiivoq: ” IMAK-imit kissaatigaarput ilaasortatta toqqissisimanartumik suliffeqarnissaat aammalu atugaat pillugit kommunit Namminersorlutillu Oqartussat kattuffinnut susassaqartunut suliassat naammassisariaqartut pillugit naapeqateqarnissaat. IMAK naligiissumik ataqqeqatigiillunilu suleqatiginninnissaminut piareersimavoq, taamatullu isumaqatigiissutit inatsisillu atuuttut ilinniartitsissutigineqarlutillu maleruarneqarnissaat siunertaraluguikorfartueqataanissaminut piareersimalluni.”
