Meeqqat atuarfianni atuartitsinermik suliallit sulinermi atugaat ilisimatusartunit
misissorneqartussanngorput. – Atukkatta qanoq innerisa ilisimatuussutsikkut nalilerneqarnissaat pingaaruteqarpoq, taamaattumik ilinniartitsisut misissuinermut peqataagilittoq, Elna Thomsen Heilmann kaammattuivoq.
—
Meeqqat atuarfianni ilinniartitsisut, timelærerit, vikarit pisortallu meeqqat atuarfianni
sulinermi inuunerat, sulinermi misilittagaat atuartitsinermullu tunngavissaat qanoq ippat? Apeqqutit taakkua ilisimatuussutsikkut maanna misissorneqarlutik aallartipput.
Atuarfiit pillugit ilisimatusartut, Nuummi Ilisimatusarfimmeersut, tamarmik ph.d.-tut
qaffasitsigisumik meeqqat atuarfii pillugit ilisimatusarsimasut, Lars Demant-Poort aamma Mitdlarak Lennert, ilisimatuussutsikkut nutaamik misissuinerminni IMAK aammalu
ilinniartitsisut ulluinnarni atuartitsinermik suliaqartut suleqatiseraat.
- Misissuinermut matumunnga siunertaavoq ilinniartitsisut sulinermi inuunerat, atuarfimmi sulinermi misilittagaat atuartitsinermullu tunngavissaat paasiniarnissaat.
- Misissuinermi Kalaallit Nunaanni meeqqat atuarfianni siammasissumik ilinniartitsisut akissutaat piniarneqarput, ilisimatusaqatigiit nassuiaapput.
Sinniisoqarfik 2023-imi ataatsimiimmat aalajangikkanut ilaapput iPad-ip atuartitsinermut atuartitsissutinillu ilinniarnermut sunniutai misissorneqassasut aamma Youtube-p atugaarujussualernerata kingorna ilinniartitsisut atuarfiillu qanoq piareeqqanersut
misissuisoqarnissaanik aalajangertoqarnikuuvoq. Misissuinermullu maanna pisumut Sinniisoqarfimmi taamanikkut aalajangikkat apeqqutit ilaannut atatinneqarput.
IMAK: Peqataagitsi
Ilisimatusartut apeqqutit ilisimatusaatiginiarlugit suliaat Kalaallit Nunaanni siornatigut
ilisimatuussutsikkut misissorneqarnikuunngillat. Periarfissarlu maanna takkuttoq, tassa ilisimatuussutsikkut misissuinermi ilinniartitsisunik peqataatitsinissaq, Ilinniartitsisut Meeqqat Atuarfianneersut Kattuffiannit atorluaqquneqarpoq.
- Sulinitsinni atukkagut amerlasuutigut oqitsuunngillat. Assersuutigiinnarlugu meeqqat sakkortusiartuinnarnerat allaallu ilinniartitsisunut nukersortalernerat Sinniisoqarfiup ataatsimeersuarnerani ulluinnarnilu sulinitsinni tusartualerpagut.
- Kisianni aamma allarpassuarnik tamatta ataasiakkaatut ilungersuuteqartarpugut unammillernartitatsinnik. Tamakkua ilaatigut apeqqutini akisassaajumaarput. Taamaattumik pissutsisut ilaatigut tamakkua pillugit ilisimatuussutsikkut misissuisoqartussanngornerani neriuppunga meeqqat atuarfiini atuartitsinermik suliaqartut peqataalluassasut, kattuffiup
siulittaasua, Elna Thomsen Heilmann oqarpoq.
Apeqqutinik akissuteqarnissaq maanna periarfissaalereerpoq. Ilisimatusartoqatigiit akissunik
juunip 15-at sioqqullugu pissarsilluarnissartik neriuutigaat.
Misissuinermi peqataasut kinaassutsiminnik paasissutissiissanngillat.
- Paasissutissat ilisimatusarnermuinnaq atorneqassapput, soorlu atuagassiani
ilisimatusarnermut tunngasuni, saqqummiussinerni ilaatigullu aviisini ilisimatuussutsimut nalinginnaanerusumut tunngasuni. Paasissutissat taamaallaat Ilisimatusarfimmi apeqqutillu ilaannut atatillugu IMAK-imi misissuisunit atorneqassapput. Apeqqut sumi ilinniartitsisutut atorfeqarnersutit taamaallaat atorneqassaaq Kalaallit Nunaanni atuarfinnit ilinniartitsisunillu sapinngisamik siammasinnerpaamik akissuteqartitsinissaq siunertaralugu,
ilisimatusaqatigiit, Lars Demant-Poort aamma Mitdlarak Lennert nassuiaapput.
Taakkua aamma ilanngullugu ilisimatitsissutigaat, misissuinermi paasissutissat pissarsiarineqartut isumannaatsumi toqqoqqaneqassasut.
Misissuineq aallartereerpoq – immersuiinnarina
Ilisimatusartut misissuinerminni apeqqutaat ilinniartitsisunit atuartitsinermillu suliaqartunit maanna akiortorneqarsinnaanngoreerput. Linki ataaniittoq iserfigalugu apeqqutit akioriarlugit nassiussisinnaavutit: https://www.survey-xact.dk/LinkCollector?key=PLU288K3U2C1
- Misissuinermi peqataaninnut atatillugu peqataasut akornanni makitsinikkut 2.000
koruuninik akissarsisitsisoqassaaq. Unammisitsinermut peqataaniaruit apeqqutit tamaasa akisimassavatit aammalu misissuinerup quppernerani kingullermi illit attaviginissannut paasissutissat allattorsimassavatit.
- Illit attaviginissannut paasissutissat makitsinerup kinguninngua nunguterneqassapput taamaattumillu ajugaasumut attaveqarnissamut taamaallaat atugassaallutik,
ilisimatusaqatigiit allapput.
Misissuineq pillugu apeqqutissaqaruit, imaluunniit apersuinermi akissuteqartutut
pisinnaatitaaffiit pillugit apeqqutissaqaruit attavissat: Lars Demant-Poort, lodp@uni.gl) Mitdlarak Lennert, mitl@uni.gl
- Neriuppunga meeqqat atuarfiini atuartitsinermik suliaqartut sapinngisamik amerlanerpaat apeqqutinik akiortuissasut. Taamaaliornikkut qanoq inissisimasoqarnera tamakkiinerusumik assiliartalerlugu takuneqarsinnaanngornerussammat, Elna Thomsen Heilmann naggasiivoq.
FAKTABOKS:
Misissuinermi ukua peqataasinnaapput:
Vikarit, timelærerit, ilinniartitsisut, atuarfiit pisortaat tullersortaallu.
Missuineq qupperuk: Uani
