Nauja Lisa Egede tjenestemandiuvoq. Ukiut marluk qaangiuppata soraarninngussaaq. Sulinini sivisunerussappat aaqqissuussaanikkut pitsaanerusumik atugassaqarnissi kissaatigaa.
—
Ilinniartitsisut ilinniarsimasut ilinniartitsisut atorfeqanngitsut amerlaqisut naluneqanngilaq. Ilinniartitsisutoqqallu ilinniartitsisutut maanna sulisut, amerlasuut, aamma soraarninngukaapput. Taamaattumik ilinniartitsisussaaleqereerneq suli ajorsiartuinnassanersoq aarlerisoqarsinnaavoq.
Nauja Lisa Egede Nuummi Atuarfik Inussummi maanna ilinniartitsisuuvoq. Ilinniartitsisutut ilinniakkaminik 1988-imi naammassivoq. Tjenestemanditullu soraarninngornissaa qanillivoq.
– Ukiut marluk qaangiuppata tjenestemanditut soraarninngortussaavunga. Ingerlaqqikkusussagumali qanoq inissisimanera nalornissutigilaarpara, Nauja Lisa Egede oqarpoq.
Fagit pingaarnerinnaat atuartitsissutigisarusukkai
Ilinniartitsisut tjenestemandit 65-liinerminni tjenestemanditut soraarninngortussaatitaapput. Apersorneqartup ukiut taakkua ukiut marluk qaangiuppata angugunigit, sulilu ilinniartitsisutut sulerusulluni, taava aaqqissuussaanermik allaanerusumik atuerusulluni kissaateqarpoq.
– Isumaqatigiissutit (overenskomst) malinnagit piffissap ilaani ilinniartitsisutut sulineq periarfissaasinnaassappat uannut tulluartuussaaq.
– Soorlu oqarutta fagini danskisut, tuluttut matematikkimilu atuartitsisarlunga. Fagit pingaarnerit pingasuinnaat, fageerarpassuunngitsut. Soorlu immaqa lektionit aqqaneq-marluk atuartitsisarlunga. Taamaattoqarsinnaappat ilinniartitsisut sivisunersumik sulerusussinnaassagaluarpunga, Nauja Lisa Egede oqarpoq.
Tassalu taassuma inuttut ataasiakkaatut kissaatit naapertorlugit utoqqalereernermi sulisinnaaneq periarfissaatikkusukkaluarpaa. Tjenestemanditummi soraarninngoreerluni isumaqatigiissutit maanna atuuttut atorlugit sulerusunngilaq.
– Isumaqatigiissutit atorlugit sulilissaguma suliat tiimillu ikiliartuaartinneqassapput. Uanga taanna orniginartippallaannginnakku. Kiffaanngissuseqarnerullunga lektioninik soorlu aqqaneq-marlunnik atuartitsisarusunnerugaluarpunga, Nauja Lisa Egede oqarpoq.
“Fagiaqqat” nungullarnartut
Taassuma oqarnera naapertorlugu fagit amerlanerusut atuartitsissutigisarlugit sakkortuvoq. Taamaattumik tjenestemanditut soraarninngoreeraluarluni sivisunerusumik sulissagaluaruni sapaatit akunnerinut atuartitsissutit sivikinnerusumik atuartitsissutaasartut, soorlu upperisarsiorneq uumassusilerinerlu atuartitsissutigisannginnissaat kissaatigaa.
– Ukiorpassuarni taama sulinikuulluni nalunnginnakku taama sulineq qanoq oqimaatsigisinnaasoq, Nauja Lisa Egede oqarpoq.
Vikaritut sulerusunngilaq
Taassuma ulluinnaat atuarfimmi atukkani amerlanerutikkusussagunigit kissaatini taariikkani atorlugu sulinissani perusuppaa. Vikaritummi periarfissaq nammineq aamma atorumanngilaa.
– Nalunngilara soraarninngornikut aamma vikaritut sulisartut. Kisianni uanga taanna orniginartinngilara. Pissutigalugu ullaakkut atuartitsinerup aallartinngilaarnerani aatsaat paasineqartarpoq klassinut sorlernut ullormut atuartitsinissaq. Tassa minutsialunnguit sioqqullugit. Qanoq ilillunga 10 minutsip iluani uanga piareersassagama illersorneqarsinnaasumik? Nauja Lisa Egede apeqqusiivoq.
Ilinniartitsisussaaleqineq
Ilinniartitsisut ilinniarsimasut amigaataaqaat. Tamanna aaqqinneqassappat siusinnerusukkut iliuuseqarsinnaaneq apersorneqartup kissaatigaa. Nauja Lise Egedep oqarnera naapertorlugu Ilinniarfissuarmi ilinniartut ullumikkut suliffimmik misiliisarnerat sapaatit akunnerinik amerlanngitsunik sivisussuseqartartoq piffissanullu arlalinnut agguarneqartartoq eqqarsaatigeqqinneqarsinnaavoq.
– Ilinniartitsisunngorniaratta uagut ukioq ilivitsoq suliffimmik misiliinikuuvugut. Ullumikkutut naafferarlugit kipisaqattaarnagit. Tamanna uagut ilinniutiginikooqaarput.
– Misissorneqarsinnaannginnersoq suliffimmik misiliinerat sivitsorlugu. Qaammatit marluinnaanngitsut, maluginiassagamikku imminnullu aperalutit; Ilumut uanga ilinniartitsisoorusuppunga? Ukioq affarluunniit. Taava ilinniartitsisoorusunnerlutik paasiaarnerusassagaluarpaat, Nauja Lisa Egede naggasiivoq.
