Isumaqatiginninniarnermi Sulisartut Højskoliani ilinniartitsinermik suliallit atugarisaannut, akissarsiaannut pisinnaatitaaffiinullu isumaqatigiissuteqarfiuvoq.
Isumaqatigiissut Sulisartut Højskoliani suliassanut sulisunullu naleqquttoq maannamut sulisut akissarsiaannik atugassarisaannillu ajornerulersitsinngitsoq kiisalu sulisut atugarisatik akissarsiatillu pillugit saaffiginniffissaqalernissaannik qulakkeerinnittoq isumaqatigiissutaavoq.
Isumaqatigiinniarnerit torersumik ataqqeqatigiiffiusumillu ingerlanneqartut IMAK-imi siulittaasup Elna Heilmannip nuannaarutigaa:
“Akissarsiat tapillu tunngaviusut, ilinniartitsisunut sulinngiffeqarnermi angalanernut akiliunneqartalerneq kiisalu pensionit isumaqatigiissutigigatsigit IMAK-imiit nuannaarutigeqaarput. Sulisartut Højskoliannit isumaqatiginninniartitaasut piumassuseqarlutik isumaqatiginninniarnerat sulisullu isumaasa ataqqineqarnerat IMAK-imiit maluginiagarput nuannaarutigaarput.”
Sulisartut Højskolianni pisortaasup Eigil Kielsen-Davidsenip isumaqatiginninniarnermi angusaasut aamma nuannaarutigai:
“Sulisussarsiornermi ilinniartitsisutut ilinniarsimasut qinnuteqarnissamut tunuarsimaartartut malugisarnikuuarput. Maannali akissarsiat atugassarititaasullu allat isumaqatigiissutigisagut Meeqqat atuarfianni ilinniartitsisuusunut isumaqatigiissummut tunngaviatigut assigiilerput taamaalillutalu sulisussarsiornermi neqeroorutigisartagassagut qinnuteqarumaartussanut soqutiginarninngortussanngorlutik.”
Isumaqatigiissutit ukioq manna aggustip aallaqqaataani atuutilissasut isumaqatigiissutaavoq.
