Pingasunngornermi 8. juni 2022 Eqqartuussiviit qullersaat – Højesteret – Ilinniartitsisut Kattuffiata IMAK-ip ilaasortami ilaat sinnerlugu Kalaallit Nunaanni kommunimut tunngatillugu tunngaviusumik aalajangiiffigisassatut suliakkiissutaa pillugu eqqartuussivittut aalajangiivoq.
Kommuni 2019-imi IMAK-imut ilaasortaq soraarsippaa, ilaatigut pissutigalugu ilaasortaq napparsimasutut sulinnginnermi nalaani Danmarkimut nunasisimammat, tassungalu atatillugu najugaqarfini inuit aqqisa allassimaffianni Danmarkimut nuussimallugu – taamaaliorporlu Danmarkimi peqqissaavinni katsorsarneqarsinnaajumalluni nakorsamillu napparsimasutut uppernarsaaserneqarsinnaajumalluni.
Suliaq Kalaallit Nunaanni eqqartuussivimmi, Nunatta Eqqartuussiviani maannalu Eqqartuussiviit qullersaanni suliarineqarpoq.
Suliami pineqartumi pingaarnersaavoq, sulisoq Kalaallit Nunaanni atorfeqartoq, napparsimasutut nalunaaqqanermi nalaani – taamaalillunilu suliartornissaminut pisussaaffeqannginnermi nalaani – najugaqarfini Danmarkimut nuussinnaaneraa.
Eqqartuussiviit qullersaata – Nunatta Eqqartuussivia assigalugu – sulisup atorfeqarnerminut kinguneqanngitsumik taamaaliorsinnaanera aalajangiuppaa.
Eqqartuussissuserisup Britta Keldsenip Arctic Law-imeersup, IMAK-ilu sinnerlugu Eqqartuussiviit qullersaanni sassartup, anguneqartoq nuannaarutigaa, tassami aalajangerneqarmat, uagut Kalaallit Nunaanni najugaqartugut soorunami Naalagaaffeqatigiinnerup sinneranisulli najugaqartutut allatulli nuussinnaatitaasugut, tamannalu pissutigalugu sulisut Kalaallit Nunaanni najugaqartunut immikkut killilersuisoqassanngitsoq. Kommunip pineqartup suliamut pingaaruteqartillugu tunngavilersuutigigaluarpaa, peqqissinermiit Danmarkimiit Kalaallit Nunaannut suliartoqqinnissamut ullut arlallit qaangiunneranni aatsaat suliffimmut annguttoqarsinnaanera, tamannali Eqqartuussiviit qullersaata – Britta Keldsenip tunngavilersuutai assigalugit – pingaaruteqartutut nalilinngilaa. Eqqartuussiviit qullersaata – Nunatta Eqqartuussivia assigalugu – aalajangerpaa Kalaallit Nunaanni suliffeqarneq pissutigiinnarlugu toqqaannartumik piumasaqaatitulluunniit Kalaallit Nunaanni najugaqarnissaq pisussaaffiusinnaanngitsoq – matumanissaaq Eqqartuussiviit qullersaat isumaqarpoq Kalaallit Nunaanni atorfeqarnermi atugassarititaasut Danmarkimi atugassarititaasunit allaanerussanngitsut.
Eqqartuussiviit qullersaata aalajangiineratigut suliaq inaarutaasumik naammassivoq, sulisullu pineqartup nuannaarutigisinnaavaa 300.000 kr-ngajannik taarsiivigitittussanngornini.
Eqqartuussissut Eqqartuussiviit qullersaata nittartagaani tamakkiisumik atuarneqarsinnaavoq: https://domstol.dk/hoejesteret/aktuelt/2022/6/bortvisning-af-laerer-i-groenland-var-ikke-berettiget/
