Asasakka ataqqinartut ilaasortagut sinerissatsinni sumiiffinni assigiinngitsuni sulisuususi. Asasakka IMAK-imi siulittaasuusarsimasut, siulersuisut siulersuisuusarsimasullu; minnerunngitsumik IMAK-ip ingerlalluarnissaanik tunngaviliisut sinniisoqarfimmi ilaasortaasarsimasut mannakkullu ilaasortat, aammalu sineriassuatsinni piffinni IMAK sinnerlugu sinniisuusarsimasusi sinniisuususilu. Ullumikkut IMAK pilersinneqarnerminit ukiunik 25-nngortorsiornerani tamassi pilluaqqungaarpassi, qujangaarpugullu sullissinissinni tunniusimallusi kattuffitta nukittuujunissaanik sulissuteqartuarsimagassi.
Tulluusimaarpunga maniguullungalu ullumikkut IMAK-imi siulersuisut sinnerlugit siulittaasutut pilluaqqusillunga oqaaseqarsinnaagama.
Pilluaqqusillunga oqaaseqannginninni kissaatigivara nunatsinni IMAK-imi ilaasortarisimasagut sulisorisimasagullu toqukkut qimagussimasut eqqaaniarlugit minutsip affaanik nipaallisimalaassaagut……
Ullumikkut ilinniartitsisut meeqqat atuarfianeersut kattuffiat IMAK ukiunik 25-nngortorsiorpoq, siullertullu eqqaaqqaarusuppakka 1998-mi oktoberip 12-ani IMAK-ip pilersinneqarnissaannut ilungersorlutik sulissuteqarsimasut tamaasa, taamatullu IMAK-ip ukiuni taakkunani nukittuumik inissisimanissaanik suleqataasimasut siulittaasuusarsimasut siulersuisuusarsimasullu tamaasa qujassuteqarfigerusukkakkit.
Aamma pinngitsoorusunngilanga qujaffigissallugit ukiuni taakkunani nunatsinni politikkerit IMAK-imut tatiginnillutik, upperinnillutik aammalu ataqqinnillutik suleqateqarusussuseqarnermik isaassiuarsimanerannut.
Ullumikkut nunatsinni aammalu siunissami pingaaruteqarluinnarpoq sineriassuatsinni isorartoqisumi meeqqat atuarfiani ilinniartitsisutut atuartitsisutut aammalu allaffissornermi meeqqat atuarfiannut attuumasseqartumik suliaqartunut kateriffigisinnaasaannik kattuffeqarnissaat kattuffeqartuarnissaallu. Piffinni tamani
suliffimmi atugassarititaasut assigiinngitsorujussuupput taamatullu suliassat suliallu assigiinngitsorujussuarmik nalilersorniarneqartarput akilersorniarneqartarlutillu. Isumaqarpungalu IMAK tassani qitiusumik inissisimalluinnartoq nukittulluni ilaasortatta sulinerminni atugassarititaat pillugit sorsuuteqartuarmat sorsuuteqartuassallunilu; ilaasortagut naleqartumik, ataqqinartumik naleqquttumillu atugassaqartinneqarnissaasa illersortuassallugit illersorlugillu.
IMAK-imit ersersikkusuppagut naqissuserlugulu kikkulluunniit ilaasortagut ilinniartitsisuususi atuartitsisuususilu naleqartingaarpassi ataqqinngaarlusilu. Nunatsinnimi ingerlaasitsinni meeqqat atuarfiat qitiulluinnartumik inissisimasumi annertuumik naatsorsuuteqarfiusumi aammalu sullivimmi atugassarititaasuni imaannaanngitsumi sulinissinni meerartatta inuiaqatigiinni sullisseqataalernissaannik aqqutissiuussillusilu kivitseqataallusi ilungersungaarlusi takutittuarassiuk.
Ungataaniippusilu ilaasortagut pisortat, allaffissornermik suliaqartusi, ilissiuvusi meeqqat atuarfiani sulisunut pingaarutilimmik inissisimasusi; sulisussinnut aqqutissiuisuuvusi sullissinermilu oqilisaasuullusi, meerartatta pitsaasumik tunngavissinniartarpasi nammineersinnaasunngortinniarlugit peqqinnartumillu ilinniarfinnut ingerlaqqinnissaannut kivitseqataavusi aqqutissiuusseqataallusilu.
IMAK-imit immikkut taarusuppakka nersorusullugillu nunatsinni ilinniartitsisut atuartitsisut ukiorpassuit tunniusimallusi atuartut uummateqarfigalugit meeqqat atuarfiani sulisuususi; taakkuuvusimi meerartatsinnut inuusuttuarartatsinnut maligassiuillusi takutitsiuartusi immaqalu aqqutissiuisartusi inuusuttortatta ilinniartitsisunngorusunnissaannut. Qujanaq meeqqat atuarfiani ilinniartitsisuusimagassi/atuartitsisuusimagassi.
Taamatuttaaq qujaffigerusuppakka ilaasortarisagut ilinniartitsisut atuartitsisullu soraarninngornikut, IMAK-imit isumaqarluinnarpugut ukiorpassuit inuiaqatigiinni tunniusimalluni meeqqat atuarfiat uummateqarfigalugu sulereersimalluni eqqissilluni toqqissillunilu soraarninngortarnissaq isumaqartorujussuusoq, soraarninngoreeraluarlunimi inuiaqatigiinni naleqartinneqarluni sulilu arlaatigut soqutigisat aallaavigalugit tunniussaqartuarnissaaneq pigineqartariaqartoq naleqartinneqarlunilu. Qujanaq meeqqat atuarfiani ilinniartitsisuusimagassi/atuartitsisuusimagassi.
Kattuffitsinni IMAK-imi nukittuumik inissisimanitsinnut pingaarutilittut inissisimatitsisuupput allattoqarfimmi sullissisugut. Qujanaq nukittullusi ilaasortatta pitsaasumik ajunngitsumillu suliffimminni peqarnissaannik aqqutissiuussiuartuugassi,
ilaasortatsinnut aammalu inuiaqatigiinni IMAK-ip nukittuujunera ersersittuartarassiuk.
Siulersuisut pingaartipparput aamma nalunngilarput siulitta pingaartitarigaat IMAK kattuffittut ineriartortuassasoq ammasuulluni. Pingaaruteqarpoq nunani allani, nunani avannarlerni aammalu kitaatungitsinni Canadami Alaskami atuartitaaneq ilinniartitaanerlu pillugit isumassarsiorfigiuarsinnaasariaqarpagut nunatsinni atuartitaaneq ilinniartitaanerullu ineriartortuarnerani; ullumikkummi meerartagut inuusuttortagullu nunarsuarmioqataanerat unitsitassaajunnaarluni ingerlarsorpoq, taamaattumik IMAK aamma ilaasortanut atugassarititat pitsaanerulertuarnissaannut aqqutissarsiortuartariaqarpoq.
Taamatut oqaaseqarlunga maani tamatta isersimasugut avataaniillu malinnaasusi tamassi IMAK pilluaqqullugu ingerlalluarnissaanillu kissaallugu pingasoriarluta horaarutigisigu.
