Naalakkersuisut atuarfik pillugu Inatsisartut inatsisaata allanngortinnissaa siunertaralugu siunnersuummik tusarniaaqqammerput.
—
Inatsisartut Naalakkersuisut atuarfik pillugu Inatsisartut inatsisaannik allannguerusullutik siunnersuutaat akuerissappassuk, kukarlerni atuartunut fagit atuartitsissutigineqartartut malunnaatilimmik ikilissapput. Inatsimmi maanna atuuttumi nukarlernut fagit atuartitsissutitut atuutsinneqartut 13-it missaannik amerlatigisinnaapput. Allannguutissatut maanna siunnersuutaasoq akuerineqassappat, fagit nukarlernut atuartitsissutit inuup assaata ataatsip inuattaanik kisinneqarsinnaalissapput. Tamanna Ilinniartitsisut Meeqqat Atuarfianneersut Kattuffiata, IMAK-ip, anguniagaanut naapertuuttuusoq, kattuffik Naalakkersuisut tusarniutaannut akivoq.
– IMAK-ip Sinniisoqarfiata ataatsimeersuarneranut atatillugu novemberimi 2023-mi immikkut sammisaqarneq ingerlanneqarpoq. Tassani ilaatigut eqqartorneqarlutik nukarlerni fagit assigiinngitsut amerlavallaarneri, ilikkagassatut anguniagassat amerlavallaartut, kalaallisut oqaatsigut pingaarnerulertariaqartut, allannerup kisitsinerullu aallunneqarnerunissai piginnaanngorsaanerillu sukumiisumik ingerlallugit.
– Ilanngullugu tikinneqarput atuartut kalaallinit angajoqqaallit tuluttuinnaq oqalullutillu paasisartut amerliartuinnartut. Tassa kalaallisut oqaatsigut kinguariartorfeqartut aammalu atuartut nukarliit ullumikkut ”qimutsippallaarlugit” atuartinneqartut eqqartorneqarlutik. Tamanna aamma atuarfiit pisortaasa naapittarnerannit qaqinneqartarpoq, IMAK tusarniummut akissummi allappoq.
IMAK-ip Sinniisoqarfianut ilaasortat 2023-imi ataatsimeersuaramik meeqqat atualeqqaat fagiisa amerlavallaarnerat pillugu oqallinnerannut tunngasoq uani atuarsinnaavat: https://imak.gl/wp-content/uploads/2024/03/Ilinniartitsisoq-no-1-marts-2024-Kal.pdf
Naalakkersuisut maanna siunnersuutaat akuerineqassappat nukarlerni atuartunut atuartitsissutaasartussat tallimaannanngussapput. Makkuusut: Kalaallisut, matematikki, inuunermi ingerlalluarneq, timersorneq silamilu sammisaqartarneq aamma pilersitsinermik atuartitsissut. Siunnersuut akuerineqassappat alloriarfinni nukarlerni atuartut danskit tuluillu oqaasiinik atuartinneqartarunnaassapput.
200-nit 180-nut?
Naalakkersuisut inatsisissatut siunnersuumminni nukarlerni atuartut fagiisa ikilinissaat taamaallaat kissaatiginngilaat. Taakkuami ukiumi atuarfiusumi ullut atuarfii maanna 200-it 240-rullu akornanniittut ullunut 180-inut ikilitikkusuppaat. Erseqqinnerusumik oqaatigalugu meeqqat nukarliit tassa 1-3. klassit ukiumi atuarfiusumi ullut atuarfissaat qaammammik ataatsimik sivikillitikkusuppaat. Tamanna IMAK-ip Sinniisoqarfianit eqqartorneqarnikuunngilaq, aamma kattuffiup tunngavissatut iliuusissatullu pilersaarutaani ilaanngilaq. Kattuffiulli tunngaviusumik isummernermini siunnersuut taanna aarlerinartoqartillugulu mianernartoqartippaa.
– Inatsimmut allannguutissamut siunnersuummi meeqqat ukiumi atuarfiusumi ullut atuarfissaat ullunik 20-nik ikinnerusussaapput. Tassa angajoqqaat suli sulisut inuussutissarsiutiminnilluunniit ingerlataqarneranni meeqqat amerlavallaarujussuartut sapaatip akunnerini sisamani “imminnut paarinissaat” aarlerinartutut isigaarput, IMAK allappoq.
Ullut atuarfiusut 180-nnanngussappata tamannalu atuarnikillinermik kinguneqalerpat, atuartut angerlajaarlutik oqarasuaammik angallattakkamik, qarasaasiamik spilinillu atuisarnerat suli annertunerulersinnaanera IMAK-ip eqqarsaatigeqqusaanut aamma ilaavoq.
– Inatsimmik allannguinissamut atatillugu pisariaqarluinnarpoq susassaqartut tamaasa peqatigalugit, aamma angajoqqaat, pissutsit allannguinermik kalluarneqarsinnaasut tamaasa eqqartorluartinnissaat kiisalu aamma pissutsit allannguutaasussat “isorinnittunik isilerluni” eqqartorluarnissaat pingaaruteqarput.
IMAK: Qanoq nalilersuisoqassava?
Inatsisartunut ilaasortat amerlanerussutillit Naalakkersuisut inatsimmik allannguerusunnerat akuerissappassuk meeqqat atuarfiini allannguutit pitsaassusaasa pitsaanngequtaasaluunniit qanoq iliorluni misissorneqarnissaat pillugu siunnerfimmik IMAK amigaateqarpoq.
– Allannguiniarnermi pitsaanerusumik atuartut pissarsiaqartinnissaat anguniarneqarpoq. Allannguinerit suulluunnit pitsannguutinik takussutissaqarnissaat pisariaqarpoq. IMAK-imit paaserusupparput allannguinerup kingorna pitsannguutit qanoq aamma suut uuttuutit atorlugit nalilersorneqartarniarnersut, IMAK allappoq.
IMAK-ip inatsisissatut siunnersuutip tusarniutigineqarnerani akissutaa tamakkiisoq uani atuarneqarsinnaavoq: Uani
