Elna Thomsen Heilmann nunani avannarlerni ilinniartitsisut ataatsimoorullugu suliniaqatigiiffiata Norgemi ataatsimeersuarneranut peqataavoq.
—
Nunani avannarlerni ilinniartitsisut ataatsimoorullugu suliniaqatigiiffiat, NLS, ilaasortaminik Norgemi illoqarfimmi Tromsø-mi marsip qiteqqutilaareernerani ulluni marlunni ataatsimeersuartitsivoq. Ilinniartitsisut Meeqqat Atuarfianneersut Kattuffianni, IMAK-imi, siulittaasoq, Elna Thomsen Heilmann, peqataavoq.
– Nunani avannarlerni nunat inoqqaavi ilinniartitaanikkut inissisimanerat saqqummiunneqarpoq. Tassani erserpoq nunat inoqqaavi sutigut tamatigut kingulliunneqartarpallaartut, IMAK-ip siulittaasua oqarpoq.
Ataatsimeersuarnermut nunat inoqqaavinik Finlandimeersunik, Sverigemeersunik Norgemeersunillu, soorlu aamma saaminik peqataasoqarpoq. Ataatsimeersuarnerup ulluani siullermi nunani avannarlerni nunat inoqqaavisa killiffiat ersarissarneqarpoq. Taama saqqummiisoqareermat ilinniartitaanermut tunngasunik sukumiinerusumik saqqummiisaqattaarnerit pipput. Tassa nunanit tamalaanit peqataasut aggerfimminni unammillernartutut isigisatik taakkartorpaat.
Unammilligassat assigiissuteqartut
Peqataasut aggerfimminni unammillernartutut taakkartugaat assigiissuteqarput. Soorlu makkuupput: Nunat inoqqaavisa oqaasiisa pigiinnarnissaannik ilungersuuteqarneq, ilinniartitsisunik ilinniarsimasunik amigaateqarneq aamma atuartitsissutit pitsaasuunissaannik unammillernartumiinneq.
– Peqataasut tamatta kissaatigaarput nunap inoqqaavisa oqaasiinut tunngatillugu, ilinniartitaaneq eqqarsaatigalugu aammalu pingaartutut immikkut taasariaqartutut sutigut tamatigut naligiimmik inissisimatinneqarnissaq, naleqartinneqarnissaq, peqataatinneqarnissaq pisinnaatitaaffeqarnerlu anguniartariaqartut naqissuserparput, Elna Thomsen Heilmann oqarpoq.
Ulloq siulleq naggaserlugu ilinniartitsisut marluk, saamisut tunuliaqutallit, Norgemi, Sverigemi nunatsinniillu ilinniartitsisut kattuffiini siulittaasunik oqalliseqateqarput. Tassani nunat inoqqaavisa ajornartorsiutigisartagaat oqallisaapput. Ilinniartitaanikkullu ajornartorsiutit qaangernissaannut qanoq suleqatigittoqarsinnaanersoq aamma eqqartorneqarpoq. Peqataasummi tamarmik nunap inoqqaavisa illersorneqarnerunissaat pingaarteqaat.
– Ilinniartitaaneq eqqarsaatigalugu kissaatigivarput oqaatsigut atorlugit assigiimmik sullinneqarnissaq, oqaatsivut atorlugit ilinniaqqissinnaanermut periarfissinneqarnissaq, oqaatsigut atorlugit atuagassanik annertusaanissaq siammarterinissarlu, IMAK-ip siulittaasua oqarpoq.
Ataatsimeersuarnerup ulluata aappaani oqaatsit inituumik eqqartorneqarput. Nunat inoqqaavisa inissisimanerat nukittorsarneqassasoq peqataasut aamma isumaqatigiipput.
– Eqqartukkatta ilagivaat nunat aaqqissuussaanerisa nunami pineqartumi aaqqissuussaaneq nunap inoqqaavi aallaavigalugit aaqqissuussinissaq aammalu aaqqissuussaanermi nunap inoqqaavi sutigut tamatigut aallaqqaataaniik peqataatinneqartarnissaat piginneqatigineqartarnissaallu pingaartinneqartariaqartoq, Elna Thomsen Heilmann oqarpoq.
Nunatsinnit allamik peqataasoqartoq
Ataatsimeersuarnerup ulluani siullermi Nuummeersoq, Eva-Luusi Marcussen-Mølgaard, saqqummiivoq. Taanna Ilisimatusarfimmi inuiaat kulturiannik oqaluttuarisaanerannillu ilinniagartuujuvoq.
Eva-Luusi Marcussen-Mølgaardip ataatsimeersuartunut saqqummiussinermi ilaatigut eqqartugai tassaapput: Nunatta inissisimanera aqunneqarneralu. Nunasiaataanermi, nutaanngorsaanermi ilinniartitaanikkullu pissutsit ineriartornerat. Oqaatsit atukkagut. Qaffasissumik ilinniarneqarsinnaasutut periarfissat. Meeqqat atuarfiat pillugu inatsimmik allannguiniarluni suliaqarneq.
Taama ataatsimeersuarneq aatsaat siullermeerluni ingerlanneqarpoq. Tamannali siunissami malitseqartinneqassasoq isumaqatigiissutaasoq, NLS allappoq.
