Suliamut tunngasunut klubbi atuarfissinni pilersissiuk!
Assersuutigalugu qanoq iliortoqassava, meeqqat atuarfianni ilinniartitsisutut arlaleriaqaluni qullersarisanut kommunimilu oqartussaasunut uparuaasarsimagaanni, atuarfimmi meeqqanut naammattunik piginnaaneqarluartunillu sullissisoqanngitsoq? Kommunilu ilinniartitsisoq imaluunniit atuarfik qanillattorniarlugit iliuuseqanngippat? Soorunami nipangiinnartoqassanngilaq, nipangiinnaraluaruttami nikeriarnavianngilagut.
Ilaasortatta ilaat allannguisoqarnissaanik neriuuteqarlutik oqaaseqaateqarnissamut aqqutissaasut periarfissaasullu tamaasa atortarnikuuaat kinguneqartanngitsumilli. Taamaattumik ilinniartitsisut kaammattorumavagut sumiiffissinni klubbiliornissassinnik taamaalillusi sulianut tunngasunik politikkikkullu oqalliffissassinnik oqaaseqaateqarfiginnissinnaanissassinnulluunniit periarfissaaqalissaasi.
IMAK-ip maleruagassaani § 3 aamma § 10 tunngavigalugit
IMAK-ip iluani suliamut tunngasumik klubbit
Suliffigalugit sumiiffigisani suliamut tunngasumik politikkikkut sulinerup nukittorsarneqarnissaa siunertaralugu aamma ilaasortat akornanni kredsimi ilaasortat fraktionitut immikkoortuni 1 aamma 2-mi suliffigalugit sumiiffigisani pilersissinnaavaat suliamut tunngasumik klubbi. Klubbip sulinermini najoqqutassaa siulersuisunit akuersissutigineqassaaq.
- immikkoortoq 1-imiipput ilinniartitsisut, immikkoortortaqarfinni aqutsisut kiisalu siunnersortit aqutsisuunngitsut
- immikkoortoq 2-miipput meeqqanik minnernik atuartitsisut, meeqqat atuarfianni faglærerit timelærerillu
Tatigisatut sinniisoq/inuk atassuteqaat klubbimut siulittaasuuvoq siulersuisunullu atassuteqartitsisuulluni.
Sulianut tunngasunut klubbimi suleqatitit IMAK-imut ilaasortaasut tamarmik, pisortatut atorfeqartuunngitsut, tunulequtaassapput. Sulianut tunngasuni klubbimi illit suleqatitillu pissutsit suliassinnut attuumassutillit tamaasa pisortat peqataatinnagit oqallisigisinnaavasi. Inunnulli ataasiakkaanut tunngassutillit sulianut tunngasuni klubbimi eqqartorneqartassanngillat.
