Kalaallit Nunaanni kattuffinnit siullersaalluni IMAK-ip kissaatigaa, tjenestemanditut pensionisiallit Nunatsinni Danmarkimilu atugarisaasa sukumiisumik misissorneqarnissaat.
IMAK-ip ilaasortai amerlaqisut pensionernerminnut atatillugu ukiut ingerlanerini Danmarkimut nuuttarput, Nunatsinni tjenestemanditut pensionisiat ukiuni arlalinni aaqqiivigineqarsimannginnerat, minnerunngitsumillu Danmarkimi tjenestemanditut pensioneqartunut atugassarititaasut pitsaanerunerat pissutigalugit – pensionisiatut tiguneqartartut annertunerunerat, folkepensioneqarsinnaaneq, peqqinnissaqarfeqarnikkut isumaginninnikkullu pitsaanerusumik sullinneqarsinnaaneq ataatsimullu isigalugu pensionisiat aannertusaarinerusinnaaneq pissutigalugit.
Taamaalilluni Kalaallit Nunaanni innuttaasut utoqqaanerusut Nunatsinniiginnarsinnaagaluartut ukiut ingerlanerini ikiliartuaarusaarput, innuttaasut ukiopassuarni inuiaqatigiinni kalaallini sulereerlutik allatut ajornartumik nunartik, ilaquttatik ikinngutitillu qimallugit nunamut allamut nuuttariaqartarmata, inuuniarnerminni atugarisatik attatiinnarumalugit, aamma pensionistit suligallaramik Naalagaaffeqatigiiffiup killeqarfiata iluani assigiilluinnarnik suliaqarsimasut Danmarkimi atugarissaartinneqarnerunerat pissutigalugu.
IMAK-imi siulersuisut 20. dec. 2022 ataatsimiinnerminni aalajangerput IMAK-i soqutiginnittunik allanik suleqatissarsiorsinnaanermik misissueqqaassasoq. Taakku assersuutigalugu tassaasinnaapput Naalakkersuisut, Folketingimi ilaasortat Nunatsinneersut imaluunniit kattuffiit allat, qulaajaanissamut aningaasartuutinik matussuseeqataajumasinnaasut.
Manna tikillugu IMAK-ip siulittaasuata Folketingimi ilaasortaq Aaja Chemnitz aamma kingusinnerusukkut Aningaasaqarnermut Nalingiisitaanermullu Naalakkersuisoq Naaja Nathanielsen ataatsimeeqatigai. Elna Heilmannip aamma kattuffiit allat (AK, NPK, PK aamma SIK) suliassaq pillugu ilisimatinnikuuai.
Elna Heilmannip ataatsimiinnerit qulaani taaneqartut pillugit siulersuisut tulliani ataatsimiippata ilisimatissavai. Taamaalioreerpat naastorsuutigaarput suleqatigiissitamik pilersitsinissaq pilersaarutaareersoq pilersinneqassasoq.
