Qaqugumita Naalakkersuisunit kattuffittut suleqatigisatut inuiaqatigiinnilu sullisseqataasutut oqaloqatigineqarsinnaalissaagut? Tamattami maani nunatsinni pitsaanerpaamik inuiaqatigiinni ingerlanissarput anguniagaraarput kivitseqataarusuppugullu.
Naalakkersuisut oqaasinnaarivaat isumaqatigiinngittaraluarluta pissuserissaartumik oqalliseqatigiissinnaanissaq pikkoriffiginerusariaqaripput aammalu siunissaq ungasinnerusoq kinguaassagullu pillugit ataatsimoorfigisinnaasarput nassaarisariaqaripput, siunnerfeqatigiinnissarlu aqqutissaasut.
Maannakkut qinigaaffik una qaangiukkiartuaarpoq, sulilu Naalakkersuisunit suleqatiserinnermik annerusumik isaassisoqarnikuunngilaq. Kattuffittut nammineq tusaaqqulluta ujartuiuartariaqartarpugut, annerusumilli illuatungaanit qisuariartoqassanani.
Misinnarpoq Naalakkersuisut peqataatitsinatik namminneq aqqut ingerlaffigerusutartik kisiat aallaaviginiarsarigaat. Inatsisinik allannguiniarnermi tusarniaanerit ingerlanneqartarput, pingaartumillu nunatsinnut inatsisitigut iluarsaaqqinnerit angisuut eqqarsaatigalugu, nunatsinni innuttaasut aammalu kattuffiit oqariartuutaat ataqqinagit aaliangiisarnertut takornartaajunnaarput. Tassuunaannarluunniit ersereerpoq Naalakkersuisunit naapigiaasinnaaneq peqataatitsinnginnerlu atuutsinneqartut.
Taamatuttaaq inatsisit atuuttut nassuiaatitaannik tusarniaaqqaaratik allannguisalerneri takussaaleqqapput. Taamatut pisoqartanera ilaasortatsinnut kipiluttunartaqaaq annikilliortitsisarlunilu, ilaatigut ilaasortatta isertitaannut atugassarisaannullu sunniutilimmik. Taamaaliorneq IMAK-ip pisortallu kiffaanngissuseqarlutik isumaqatigiinniarsinnaanerannik isumaqatigiissutaarersunilluunniit inatsisitigut akulerulluni allannguinertut taasariaqarpoq.
Aningaasaqarnermut Sulisoqarnermullu Aqutsisoqarfiup aammalu kommunini sulisoqarnermut sullissisoqarfiini sulisut akissaataasigut kukkuluttorfigininnittarnerisa kingunerisaanik, inuiaqatigiinni sullisseqataasut soraarnerussutisiallillu pisortanut tatiginnikkunnaaraluttuinnarnerannik nalornisitsilernerannillu pilersitseqqavoq.
Kattuffittut ilaasortat eqqortumik piffissarititaasorlu nalerorlugu sullinniaraluartillugit, illuatungaani Aningaasaqarnermut Sulisoqarnermullu Aqutsisoqarfiup sulianik naammassinissinnaanerata amigarnera kipiluttunartorujussuuvoq. Suliassat ilaat ukiut amerlasuut suliat naammassineqaratik uninngatinneqartut amerligaluttuinnarnerannik kinguneqartarput. Illuatungaani pisortat ilaasortatsinnut akiligassat tungaatigut piumasaqaraangamik killeqartitseqqissaartarput. Taamaattoqarneralu kattuffittut kipiluttanareqaarput.
Taamaattoqarnerani pisortat inuiaqatigiinni sullissisunut unneqqarinngitsutut taasariaqarput. Taamaattumik politikkerit piaartumik Aningaasaqarnermut Sulisoqarnermullu Aqutsisoqarfiup annertuumik nukittorsarnissaanut aningaasaliisariaqarput. Tamatuma saniatigut kommunini politikerit sulisoqarnermut immikkoortortaqarfiisa nuna tamakkerlugu isumaqatigiissutinik aammalu inatsisinik assigiissumik sullissillutillu malitassanik malitsitsinissaat minnerunngitsumillu qanoq pineqartut nukittorsarnissaat iliuuseqarfigisariaqarpaat.
Suliffigissaanermut suliffimmilu avatangiisinut tunngatillugu
Soormitaavaana politikkerit suliffigissaaneq suliffimmilu avatangiisinut tunngasut annerusumik iserfigerusunnneq ajoraat, iliuuseqarfigalugulu?
Politikkerit ilisimaarinerpaat ilinniartitsisut sullivimmi atugaat qanoq innersut? Sunaana pissutigalugu ilinniartitsisut suliffitsik qimallugu allamut nuuttariaqalersartut imaluunniit sunaana ilinniartitsisut sulinngittariaqartarnerannut pissutasoq? Nikalluallannaraluartoq, ilaasortatta sullivimmi tarnikkut aammalu timikkut nakuuserfigineqartarnerat annertusigaluttuinnartoq ilisimaarineqarnerluni?
Kingullermik 2021-mi isumaqatiginninniarneq naammassimmat, illuatungeriit isumaqatigiissutigivaat, isumaqatiginninniarnerup tulliata 2025-mi pisussaq pitinnagu sullivimmi atukkat aammalu uippakajaarneq pillugit misissuisoqassasoq. Isumaqatigiissutigineqarportaaq sinerissami timelærerit atugaat pillugit misissuinissaq aammalu ilaasortatta sinerissami ineqarnikkut inissisimanerat pillugu misissuinissaq pingaaruteqaqisoq. Suliassat qulaani pineqartut pillugit 2022-mili IMAK-imiit Namminersorlutik Oqartussanut kommuninilu qullersaasunut eqqaasitsissutigineqaqattaalerput suliat aallartinneqartariaqarneri. Ajoraluartumik manna tikillugu nikeriartoqanngilaq.
Sulliviit sinerissami silaannaluttut amerlalluinnartut ajornartorsiutaapput annertuumik, taakkulu ilaasortatta peqqissutsikkut inissisimanerannut ulorianartorsiortitsipput. Nunatsinni peqqissuulluni soraarnertut inuunerissaarnissamut aporfilersuipput ulorianartorsiortitsillutillu. Sullivimmi atukkat atugassarititaasullu suliffiit ingerlanneqarneranni pingaartorsuupput. Taakkuami pitsaasumik ingerlannginneri ulluinnarni sulliviup aqunneqarnerani aningaasaqarneranullu akisoorujussuanngoqqapput.
Nunatsinni suliffigissaaneq pingaarnerpaatut maannakkoqqissaaq aallunneqartariaqarpoq. Aallaqqaammut pinngitsoorani tassunga atugassanik aningaasaliisoqartariaqarpoq piffissaliisoqarlunilu. Taakkualu malitsigissavaat iliuusissatut pilersaarut aamma sumiiffinnut/suliffeqarfimmut naleqqussarneqartoq. Sulisut sullivimmi ineriartortitsinermi peqataatinneqarunik piginneqataatinneqarlutillu sullivinni atukkanut ineriartortitsinissamullu isumalerujussuussapput.
Sulisutummi ataasiakkaatut piginnaasanik ineriartortitsinissamik periarfissinneqarunik qularutissaanngitsumik suliffik pitsaassusilimmik kivitseqatigiiffiusoq pilersinneqassaaq pilersitsivinngorlunilu. Taakkualu atorluaraanni sulisorisat suliffimminniiginnarsinnaanissaat maannamit pitsaanerujussuarmik anguneqarsinnaavoq.
Neriuutigaara uani IMAK-imit saqqummiussinerput suleqatiginnikkussusermik anersaaqartumik isaassivigineqarnermik kinguneqassasoq.
Inussiarnersumik inuulluaqqusillunga
Elna Heilmann
IMAK-imi siulittaasoq
