IMAK-imit Qeqqata Kommunianut allakkiortarlutalu oqaloqatiginnittarnikuuvugut Maniitsumi Atuarfik Kilaaseeqqami ilinniartisisut suliffimminni avatangiisaat ajorluinnartut pillugit, iliuuseqaqqusilluta aaqqiivigillaqqullugillu.
Qeqqata Kommuniata akissutigisartagaanni iliuuseqartoqartoq aammalu iliuuseqarniartoqartoqartoq nalunaarutigineqartarpoq.
IMAK-i Atuarfik Kilaaseeqqami ilinniartitsisoqatigiit klubiannit ikioqqusunit nalunaarfigineqarpoq maannamut Qeqqata Kommunianit iliuusaasut kinguneqanngitsut.
IMAK-imit paasisinnaanngilarput sooq Qeqqata Kommuniani politikkerit atuartut, inuusuttuaqqat, ilinniartitsisut allallu Atuarfik Kilaaseeqqami sulisut pitsaanerusumik illersorusunnginneraat?
Atuartut aasaanerani atuannginnerisa nalaanni ininik oquttunik iluarsartuinerugaluaq (sanering) silaannarissarfilersuinertalik iluaqutaanngilaq. Atuartut ilinniartitsisullu akornanni anerniluutit, astma, amikkut naajorarnerit, ungillerinerit, isikkut qanikkullu panertoornerit suli atugaaqaat.
Qeqqata Kommunianit maannamut iliuusaasut amigarnerannut aningaasaq peqqutaasimappat sooq aningaasanik ujartuisoqanngila pingaarnersiuineq aqqutigalugu? aammalu sooq maannakkorpiaq aningaasassaqartitsisoqanngippat avataaniit aningaasaliisinnaasunik pissarsiortoqanngila?
Ullumikkut Maniitsumi Atuarfik Kilaaseeqqami atuartut 360-it missaaniipput sulisullu 50-it missaanniillutik. Maannakkut taakkua tamarmik peqqissutsikkut navianartorsiortinneqarput, allaat inuunermi sinnerani sunniuteqarsinnaasumik. Taamaattumik IMAK-imit pissusissamisoorsoraarput Qeqqata Kommuniani politikkerit meeqqat sulisullu illersorniarlugit immikkut iliuuseqarnissamik aalajangertariaqartut.
Qulaani pissutsit taaneqartut pissutaallutik ilinniartitsisut soraaralernikuupput soraarniuteqartullu arlaqarlutik. Taakkualu tamarmik kingunerisaannik ilinniartitsisut arlallit sinneqartunik annertuarlaartunillu atuartitsisinneqarput pisussaaffinnillu allanik tigooraasariaqarlutik ilinniartitsisut amigarluinnalernerisa atuartunut sunniutissaata annikinnerpaamiitinniarlugu. Taamatut ingerlaneq sulisut nammassinnaajunnaarluinnarpaat. Sulisut asattuunneqartariaqalerput aammalu meeqqat, inuusuttuaqqallu atuartut illersorneqartariaqarput.
Allattoq Elna Heilmann
