IMAK-imi siulittaasup meeqqat atuarfianni nukarlerni atuartut fagiisa tallimaannanngortinneqarusunnerat, atuartitsinerullu kalaallisut oqaatsigut aallaavigalugit ingerlanneqartalernissaa tapersersorpaa.
—
Naalakkersuisut meeqqat atuarfianni alloriarfinni minnerni fagit atuartitsissutit 13-it tallimaannanngornissaat kissaatigigamikku inatsisissatut siunnersuutertik tusarniutigeqqammerpaat. Isuma tamanna, tassa fagit atuartitsissutaasut ikilinissaat, Ilinniartitsisut Meeqqat Atuarfianneersut Kattuffianni, IMAK-imi, siulittaasup isumatsialattut nalilerpaa.
Siunnersuut maanna isikkumitut isikkoqarluni inatsisiliortunit akuerineqassappat nukarlerni atuartut oqaasilerinermi kalaallit oqaasiinnaanik atuartinneqartalissapput, tassa danskisut tuluttulluunniit alloriarfiit aappaannut ikaarsaareerunik aatsaat atuartinneqartalissallutik.
– Nunatsinni kalaallisut oqaatsigut pigiinnarniarutsigit taava piffissanngorpoq iliuuseqarfigineqarnissaat.
– Inaarutaasumik alloriarfinnilu misilitsittarnerni erserpoq, meerartatta kalaallisut oqaatitsinnik tamakkiisumik atuisinnaanerat appariartortoq. Tassa imaappoq kalaallisut oqaatsigut piffissanngorpoq meeqqat atuarfianni pitsaassusilimmik annertuumillu meeqqanut sammitissallugit, Elna Thomsen Heilmann oqarpoq.
Taassuma oqarnera naapertorlugu sunngiffimmi sammisassat, ilaatigut internetsi aqqutigalugu sammineqartartut, kalaallit oqaasiinik atuinermut nukillaarsaaqataasunut ilaapput.
– Meeqqat tuluttut oqaasilinnik spillertarnerminni isiginnaartarnerminnilu kalaallit oqaasiinik atueriaasiisa pitsaassusaat appasissoq taanna ilaasortatta oqariartuutigivaat. Taamatullu meeqqat atuarfiini amerlasuuni kalaallisut atuartitsineq ilinniartitsisumit immikkut kalaallisut fagi atuartitsissutigissallugu ilinniarsimasumit ingerlanneqarneq ajorpoq. Ilinniartitsisussaaleqineq peqqutigalugu, siulittaasoq oqarpoq.
Isorinnittunut isumaqataanngitsoq
Inatsisissatut siunnersuut tusarniutaammat soqutigisaqartut arlallit akissuteqarput. Akissutini isummat assigiinngillat. Tassalu siunnersuummut isumaqataasut isumaqataanngitsullu. Isumaqataanngitsut ilaasa oqaatsinik allanik, soorlu danskit oqaasiinik, nukarlerni atuartitsisarunnaartoqassagaluarpat siunissami meeqqat ilikkarniarnerannut ajornartorsiutaalersinnaasoq ernummatigaat. Kisianni IMAK, ilaasortallumi amerlasuut allatut isumarput.
– Ilaasortatta oqariartuutigaat kalaallisut oqaatsigut meerartatta pikkoriffiginerusariaqaraat. Ilaasortagut aamma isumaqarput kalaallisut oqaatsigut tunngaviusumik meeqqat atuartut pikkoriffigilluarunikkit taava oqaatsinik allanik ilikkarnissaminnut ajornannginnerusumik ilikkarsinnaasut, siulittaasoq oqarpoq.
Taassuma taama oqarnermini ilisimatuussutsikkut misissuisimaneq innersuussutigaa.
– Nunatsinniunngikkaluartoq misissuisoqarnikuuvoq. Tassa meeqqat namminneq oqaaserisaminnik pitsaassuseqarluartumik atuisinnaagaangamik oqaatsinik allanik ilikkarniarnissaminnut ikaarsaarnissaat ajornannginnerusartoq. Taamaattumik isumaqarluinnarpugut tamanna atuuttoq, Elna Thomsen Heilmann naliliivoq.
Oqaatsinik allanik ajattuinngitsoq kalaallilli oqaasiinik pingaartitsisoq
IMAK-ip siulittaasuata erseqqissaatigaa oqaatsinik allanik, tassa kalaallit oqaaserinngisaannik, ajattuisuunnginnini. Taassumami oqarnera naapertorlugu oqaatsit allat ilikkarneqarnissaat aamma pingaartuuvoq, ilinniagaqarfinni ulluinnarnilu attaveqatigiinnermut atorluagassaammata. Taamaakkaluartorli meeqqat atualeqqaajunerminni kalaallit oqaasiinik pitsaassuseqarluartumik atuisinnaalernissaat qulakkeerusukkini erseqqissaatigaa.
– Qallunaatut oqaatsit oqimaalutatut inissinniarneqarnerat taanna apeqquserpara uanga. Imaanngitsoq akerlerigakkit, kisiannili uagut nunatsinni oqaatsigut pigiinnarusukkutsigit pingaartittariaqarlugillu taamaattumik piffissanngorpoq iliuuseqarnissatsinnut, Elna Thomsen Heilmann oqarpoq.
Atuartitaanermi allatut aaqqiisoqanngippat tamanna allannguisoqannginneranik kinguneqassaaq. Tamannalu kalaallinut pitsaassanngitsoq siulitaasoq isumaqarpoq.
– Nunatsinni ilinniartitaanerup aaqqissuussaanera taama isikkoqartillugu kalaaliaqqat ajorsartitaajuassapput, Elna Thomsen Heilmann naggasiivoq.
