Suleqatigiissitaq Kalaallit Nunaanni Danmarkimilu tjenestemandit pensionernerminni atugarisaannik misissuinissamut suliaqartussaq sulilluni aallartippoq.
Suleqatigiissitaq William Kriegelimit siulersorneqartussaq ukuninnga inuttaqassaaq: Inger Kleist Berglund Kleist, Johan Reimer, Marianne Jensen aamma Kunuunnguaq Fleischer. Siullermeerlutik ataatsimiinnissaat suleriusissaallu maanna piareersarneqarput.
Kalaallit Nunaanni kattuffinnit siullersaalluni IMAK-ip kissaatigaa, tjenestemanditut pensionisiallit Nunatsinni Danmarkimilu atugarisaasa sukumiisumik misissorneqarnissaat.
IMAK-ip ilaasortai amerlaqisut pensionernerminnut atatillugu ukiut ingerlanerini Danmarkimut nuuttarput, Nunatsinni tjenestemanditut pensionisiat ukiuni arlalinni aaqqiivigineqarsimannginnerat, minnerunngitsumillu Danmarkimi tjenestemanditut pensioneqartunut atugassarititaasut pitsaanerunerat pissutigalugit – pensionisiatut tiguneqartartut annertunerunerat, folkepensioneqarsinnaaneq tjenestemanditut penionisianut ilanngaataanngitsumik, peqqinnissaqarfeqarnikkut isumaginninnikkullu pitsaanerusumik sullinneqarsinnaaneq ataatsimullu isigalugu pensionisianik aannertusaarinerusinnaaneq pissutigalugit.
December 2022-imi IMAK-imi siulersuisut suliassamik qulaani taaneqartumik suliassiinerisa kingorna IMAK-imi siulittaasup Elna Heilmannip politikkerit arlallit naapippai. Aningaasaqarnermut, Naligiissitaanermullu Naalakkersuisoq Naaja Nathanielsen (IA), Folketingimi nunatsinniit ilaasortatitagut Aaja Chemnitz (IA) aamma Aki-Matilde Høegh-Dam (Siumut). Taakkua tamarmik suliassamut arlaatigut ilapittuutaanissartik neriorsuutigaat.
IMAK-imi siulittaasup Elna Heilmannip Partiit siulittaasui aammalu Inatsisartut Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiisitaliami ilaasortaasa naapinnissaat pilersaarutigaa.
Suleqatigiissitap IMAK-ip ataani pilersinneqartup suliassani september 2023-mi naammassisimassagaa siunnerfiuvoq.
