IMAK-imi ilaasortat aammalu ilaasortanngortut nutaat suliffimmut ukiullu atuarfiusup nutaap aallartinnerani aallartilluaqqullusi pilluaqquassi tikilluaqqullusilu.
Upernaaq aasaaneranilu atuanngiffik tikillugu 2025-mi isumaqatiginninniarnissanut sinerissami ilaasortatta piumasaqaataannik (OK-krav 25) katersilluta ataatsimiisitsisaqattaarnitsinni peqataasunut tamanut qujavugut, immersorneqarluarpugut.
Angalanitsinni saaffiginnissutaasartutigullu maluginiarparput IMAK-imi ilaasortat kissaatigigaat sullivimmi atukkat pitsaanerulernissaat pillugit iliuuseqartoqartariaqartoq aammalu peqataatinneqarneq ataatsimullu siunnerfeqaqatigiinnissaq pingaaruteqarluinnartutut kissaatigineqartoq.
Ukiup ingerlanerani sulinermi assigiinngitsorpassuit aqqusaartorneqartussaapput. Sulisutut aqutsisutulluunniit suliffik nuannersuussaaq;
- Suliffik toqqissisimaffiuppat
- Sullivimmi atukkat naleqquttut atuutsinneqarpata
- Sullivimmi nukiit agguataarluarlugit inississorneqarpata
- Piginneqatigiittutut anguniagaqaqatigiikkaanni
- Tapersersorneqarluni ingerlaaqatigiikkaanni
- Ineriartorfiujuarnissamik aqqutissiuussisoqarpat
Minnerpaamik qulaani allaqqasut atuutsinneqarpata Meeqqat Atuarfiat kikkunnut tamanut periarfissiisoq ingerlalluassaaq.
Sullitat pitsaassusilimmik ingerlaavartumillu ineriartortuarnissaannik ilikkagaqarnissaannillu aqqutissiuunneqassapput, taamatullu suleqateqarnissaq nukissaqarfigineqarluni aallulluarneqassaaq.
Ilinniartitsisutut ataqqinaat pigilluarneqassaaq, suleqatigiittullu pitsaasumik sunneeqatigiinneq nukittoqutaassaaq:
- Pilersaarusiorluarsinnaaneq piffissalersuilluarsinnaagaannilu
- Sullitanut suleqatinullu tamanut ammasuugaanni inissaqartitsillunilu
- Suliassat pitsaassusilimmik suliarisaraanni nalilersorluarsinnaallugillu
- Suliffimmut tunniusimasuugaanni
- Unneqqarissuugaanni
- Imminut naalaarluarsinnaagaanni ilisimaaralunilu
Ilinniartitsisutut pikkoriffigisat allarpassuusinnaapput aamma, pikkoriffiit atorluarlugit suleqatigiittullu agguataarluarsinnaagaanni nukik tunniunneqarsinnaasoq avitseqatigiissutigineqartussallu annertussaqaat.
IMAK-imit kissarpugut sulisitsisunit sullivimmi avatangiisit aammalu tarnikkut atugassarititaasut sulisunut sullitanullu pitsaasuunissaat eqqummaariffigineqassasut. Qanortoq ukioq atuarfiusoq 2024/25 naallugu nukissaqarluarluarlusi aammalu atuartuutisi sutigut tamatigut pissarsitilluarumaarisi.
Uagut kattuffittut ilaasortatsinnut ikorfartuiniarpugut nunatsinnilu sulinermi atugassarititaasut pitsaanerujuaannarnissaannik anguniagaqartuassalluta.
IMAK-imit nuannersuujuaannarpoq qiimmaallannartarlunilu sinerissami ilaasortatsinnit tusagassanik nuannersunik qiimmaallannartunillu tusassalluta sinerissamullu siammarterissalluta, taamaalilluta ilinniartitsisuunerup nuannersuuneranik aammalu ataqqinartuuneranik siammatererusunnartarmat.
Sulilluarisi.
Allattoq
Elna Heilmann
