Naalakkersuisut siulittaasuata ukiortaami oqalugiaatimini 2023-mi pisimasut pitsaasut taakkarsorpai, tamatumunngalu ilanngullugu timersornikkut angusaasut, kulturikkullu pisimasut
silaannaallu pissusaata allanngoriartornera akiorniarlugu suliniutit nersualaarlugit.
Taamaattoq maluginiagassaavoq taamatut pitsaasunik taakkarsuisoqaraluartoq, oqalugiaammi ilinniartitaanermut tunngasut pingaartutut isiginiarlugit eqqaaneqanngimmata.
Naalakkersuisut siulittaasuata ukiortaami oqalugiaataani Ilinniartitaanermut tunngasut malunnaatilimmik isiginiarneqannginnerat, IMAK-imit ernumanaateqartutut isigineqarpoq. Naak
ukioq 2023 pisoqarfiugaluaqisoq, eqqaaneqartutullu pitsaasunik misigisaqarfiugaluartoq, ilinniartitaanerup iluani unamminartut qarsupinneqarput.
Pingaartumik uparuagassaavoq ilinniartitaanermut tunngasut naammattumik aningaasalersorneqannginnerat. Assersuutigalugu Naalakkersuisut siulittaasuata, meeqqat atuarfianni atuartut ilinniarfinnilu ilinniartut ilikkariartornerminni avatangiiserissaarnissaat
qularnaarniarlugit sulinermi pissutsit pitsanngorsarnissaannik suliniutit takorluukkalluunniit ersarissut saqqummiutinngilai. Pisussaaffiit ersarissut saqqummiunneqannginnerat oqalugiaammi annertuumik sanngeequtaavoq.
Ilinniartitsisut qanoq iliorlutik pitsaasumik atuartitsisinnaassappat, pikkorissarnissanut
ilinniaqqinnissanullu aningaasaliissutit qitiusumiit ikilisarneqartuartillugit?
Saniatigut aamma amigaataavoq Nunatsinni ilinniartitaanerup aaqqissugaanerata pitsanngorsarnissaanut pilersaarut ersarissoq anguniagaqarfiulluartorlu. Naalakkersuisut siulittaasuata ilinniartitaanerup qaffasissusiata annertunerulernissaanut piffissamut ungasinnerusumut pilersaarutit periusissiallu ersarissut saqqummiutinngilai, tamatumalu Naalakkersuisut ilinniartitaanermut tunngasunut naleqqiullugu tunniussimassusiat qularnartoqalersippaa.
Assersuutigalugu assassornermik ilinniagallit qanoq iliorluta amerlanerulersissavagut, sungiusarluni suliffissat ilinniartuinullu inissat Nunatsinni taama amigaataatigitillugit?
Aamma Naalakkersuisut siulittaasuata ilinniartitsisut ilinniartitaanermut inuiaqatigiinnullu pingaarutaasa akuersaarlugit nersualaarnissaat oqalugiaatimini minippaa, tamannalu timersornikkut angusaassut nersualaarneqarnerannut illuatungiliuttutut ippoq. Nunami maani meeraqarlunilu inuusuttoqarpoq ingerlanerliortunik, meeqqallu inuusuttullu taakku ilinniartitsisut ulluinnarni naapittuarpaat.
Siulittaasup meeqqat inuusuttullu taakku puigorsimanerpai, imaluunniit aamma matumani sorsunneq nunarsuarmilu akit pissutaanerlutik?
Kiisalu oqalugiaat ilinniartitaanermut tunngasutigut ajornartorsiutit pissuseqarfiginissaat pillugu politikkinik imaluunniit tunaartarisassanik erseqqissunik imaqanngilaq. Ulluni unammilligassaqarfiusuni ersarissunik paasiuminartunillu aalaakkaassutsip tunaartarisassaqarnissaq siumullu takorluuereersinnaassutsip pilersinneqarnissaannut pinngitsoorneqarsinnaanngillat.
Nunarput aningaasaqarnikkut atugarissaarnikkullu annertuunik ajornartorsiuteqarpoq.
Maluginiagassaavoq Naalakkersuisut siulittaasuata Nunatsinni pissutsit piviusut uniorlugit oqaluttuatoqqanit takorluukkersaarluni pissutsit aallaaveqartinniarsarigai. Naalakkersuisut siulittaasuata kissaatigisaraluatut ilaasortagut allanik ikiueriarsinnaanngillat tamatumunngaluunniit periarfissaqaratik.
Ullumikkummi pissutsit imaapput, ilaasortatta ulluinnarisartik ataqatigiissinniarlugu ilungersoreeqaat, atugassarititaasut atorlugit naammattunik sorsuutissaqareerlutik. Ilaasortagut Naalakkersuisut siulittaasuata eqqaasaatut annertunerusumik suliaqarsinnaassagunik imaluunniit namminneq kajumissusertik naapertorlugu sulisinnaassagunik, pisariaqartippaat piffissaqarnerunissaq aammalu atugassarititaasunik oqilisaanneqarnissaq.
Aammattaaq IMAK isumaqarpoq, Naalakkersuisut siulittaasuata innuttaasunik sipaaqqusinera, ilaatigut namminneq soraarnerussutisiassaminnut atugassanut tunngasunik. Illuatungaani
Naalakkersuisut ukiunut tulliuttunut sisamanut amigartoorfiusussamik aningaasanut inatsisiliornerat imminnut akerleriittut taasariaqarpoq. Imatut paasisassaanerluni, Nunatta aningaasaqarnikkut inissisimanerlunnera pissutigalugu Naalakkersuisut atugarissaarnerup qaffasissusia ukiuni tulliuttuni sisamani appartinniaraat?
Oqalugiaammik apersuusersuisumik misissueqqissaarnerup matuma ataatsimut isigalugu ersersippaa ilinniartitaanermut tunngasut isiginiarneqarnerusariaqarlutillu iliuuseqarfigineqarnerusariaqartut. Siunissami ilinniartitaanermut tunngasut patajaatsuunissaat qularnaarneqassappat, IMAK-ip ujartorpai
Naalakkersuisut tungaanniit pisussaaffiit ersarissut suliniutillu sunniuteqarluarnerusut.
