Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D), IMAK-ip Sinniisoqarfiata ataatsimeersuarnerani meeqqat atuartitaanerisa iluanni allannguutissanik suliaqarnerminik saqqummiussaqarpoq. Angusakkanik suliaqartarneq aamma atorunnaarsikkusuppaa.
—
Ilinniartitaanermut Naalakkersuisoq, Nivi Olsen (D), Ilinniartitsisut Meeqqat Atuarfianneersut Kattuffiata, IMAK-ip, Sinniisoqarfianut ilaasortat ataatsimeersuarneranni ullormi siullermi oqalugiaateqarpoq.
Oqalugiaat IMAK-ip ukiuni kingullerni nipituuliuutigalugu anguniagaasa ilaannut malinnaasunut tusarluarnartunik arlalinnik imaqassasoq qularnanngilaq.
Naalakkersuisup ilinniartitaanermut akisussaasuusup, meeqqat atuarfianni alloriarfinni minnerni atuartut, assersuutigalugu atualeqqaat, 14-it ilaatigut angullugit fageqartinneqartarnerat atorunnaarsinniarlugu, maanna suliaqarnini Sinniisoqarfimmi ilaasortanut nalunaarutigaa.
– Naalakkersuisutut suliartoqqaarama suliara siulleq tassaavoq meeqqat atuarfianni atualeqqaat fagii ilaatigut 14-iusartut tallimaannanngortinneqarnissaat. Meeqqat 1. klassiunerminnit 3. klassiunertik ilanngullugu oqaatsini kalaallisut taamaallaat atuarfimmi ilinniartalissavaat. Oqaatsit allat, soorlu danskisut tuluttullu 4. klassinngoreernerminni aatsaat ilinniartalissagaat kissaatigaara, Ilinniartitaanermut Naalakkersuisoq, Nivi Olsen (D) oqarpoq. Nangipporlu:
– Meeqqat nukissaqarlutik atuariartussapput, skemat ulikkaaqqassanngillat. Ilinniartitsisut nukissaqarnissaat qulakkeerusupparput. Meeqqammi nukarliit maannakkut ullormut sammisassarpassuaminnut apeqqusiisinnaanerat qularnanngilaq. Klassimmi minnerit ilaat ullormut ilaatigut arfineq-marlunnik assigiinngitsunik fageqarlutik atuartinneqartarput, Nivi Olsen oqarpoq.
Ilinniartitaanermut, Kultureqarnermut, Timersornermut Ilageeqarnermullu Naalakkersuisup kissaatigisani taakkua sulisitsisuminut, tassa aalajangiisartunut, Inatsisartunut ilaasortanut, saqqummiutissallugit ilisimatitsivoq.
– Inatsisartut taakkua tassaapput naggataani aalajangiisussat, Naalakkersuisoq erseqqissaavoq.
Taamaattumik Naalakkersuisup suliniutai piviusunngussanersut maanna oqaatigereerneqarsinnaanngilaq.
Naalakkersuisoq: Meeqqat nalilersorpallaarneqarput
Ilinniartitsisut arlalippassuit meeqqat atuartitatik nalilersorneqarpallaartartut ukiuni kingullerni arlalinngortuni nipituuliuutigisarpaat. Assersuutigalugu angusakkanik taaneqartartunik ataavartumik nalilersuisarneq apeqqusersorneqartarpoq.
Taama ilinniartitsisut arlallit isumaqarnerat nunatsinni ilinniartitaaneq pillugu pissaaneqarluartumit aamma isumaqatigineqarpoq.
– Angusakka peertariaqartut isumaqarpunga. Nalileeriaatsit oqinnerusut atortariaqarput. Angusakkatigut allatigullu pisussaaffilersuinerput annertuallaarpoq. Nalilersueriaaseq oqinnerusoq Naalakkersuisunit saqqummiutissuarput, tamanna Inatsisartut naggataani aamma aalajangissuaat, Nivi Olsen oqarpoq.
Taassumali erseqqissarpaa nalilersueriaatsinut tunngasoq suli suliassartaqarmat nukarlerni fagit ikinnerulernissaannut tunngasumit kingulliunissaa naatsorsuutigigini.
Nivi Olsen: Karsi imaqanngilaq
Ilinniartitaanermut Naalakkersuisup ilinniartitsisut sullivimminni avatangiisaat oqalugiarnermini aamma oqaasertalerpai. Atuarfiit sumiiffinni arlalinni oqummik eqqugaasimanerat aamma arajutsisimanngilaa.
Oqummilli akiuiniarnissaq nunatta nammineq karsianit aningaasassaqartinneqanngilaq. Nunattami karsia aningaasameeqaaq. Tamanna nutaarsiassaajunnaarpoq. Inatsisartut nunatta karsiata naatsorsuutai 2024-moortut, ukiaq manna ataatsimiinnerminni, akuerigamikkit 257 millionit koruuninik amigartoortutut akueraat.
– Meeqqat atuarfii oqummik eqqugaasimasut arlaqarput, ajornartorsiutigaagut. Kisianni karsi imaqanngilaq, Nivi Olsen oqarpoq.
Taamaattorli tusarluarnarnerulaarsinnaasumik tamanna pillugu aamma oqaasertaliivoq. Kalaallit Nunaatami nunanit allanit soqutigineqarnerujussuata atorluarnissaanik kissaateqarpoq. Atuarfiimmi oquttut pitsanngorsarnissaat avataanit aningaasassarsiorneqarsinnaasoq Sinniisoqarfimmi ilaasortanut siunnersuutigaa.
– Avataanit aningaasaleerusuttunik ujarlertoqarsinnaavoq, Ilinniartitaanermut Naalakkersuisoq oqarpoq.
Siulittaasoq: Iliuuseqarneq iluarisimaarparput
Ilinniartitaanermut Naalakkersuisup suliai IMAK-ip siulersuisuisa ukiuni kingullerni tamaviaarutaannut naapertuummata kattuffiup siulittaasuata, Elna Thomsen Heilmannip iluarisimaarpaa.
– Naalakkersuisut tusarnaaginnaratik iliuuseqarnerat kattuffittut iluarisimaarparput. Assersuutigalugu nukarlerni fagit amerlavallaarnerat Sinniisoqarfik Ilulissani 2023-imi naapimmat aamma eqqartorparput. Nukarlernimi atuartut ilungersortillugit atuartinneqartarnerat pitsaanngitsoq ilisimatusarnikkut paasineqareerpoq, Elna Thomsen Heilmann oqarpoq.
Taassuma Naalakkersuisup suliniutai Inatsisartunit akuerineqaqqaassasut ilisimalluarpaa. Taakkualu suliarineqarneranni IMAK qanittumik peqataatinneqaannavissasoq neriuutigaa.
