Inatsisartunut ilaasortat isumaqatigiittut tuluit oqaasiisa allamiut oqaasiini sallersatut atuutsinneqariartornissaat aalajangerpaat. Tamanna IMAK-imit aarlerinartutut nalilerneqarpoq. – Kalaallit oqaasii nukittorsarneqarnerusariaqaraluarput, siulittaasoq uparuaavoq.
—
Oqaatsit kinaassuserlu. Sammisat taakkua pillugit oqallittoqartaqaaq. Oqallittoqartuarnissaalumi aamma naatsorsuutigiinnarneqarsinnaavoq.
Nunatsinni inatsisiliortut, tassa Inatsisartunut ilaasortat, oqaatsit pillugit apriilip 16-anni aamma aalajangiipput. Tassani tuluit oqaasiisa, allamiut oqaasiinit allanit, qanoq pingaarnerutigissanerat aalajangiiffigaat.
Tassalu Inatsisartunut ilaasortat isumaqatigiittut, tuluit oqaasii nunatsinni allamiut oqaasiini sallersatut siullertut atuutsinneqariartornissaannut Naalakkersuisut pilersaarusiorlutik suliakkerneqarnissaat aalajangerpaat.
Tamanna Ilinniartitsisut Meeqqat Atuarfianneersut Kattuffianni siulittaasup, aarlerinartutut nalilerpaa. Nunammi sanilerisatta, amerlasuutigullu sanillersuuffigineqartartup, tassa Islandip maanna inissisimanera taassuma assersuutitut taakkartorpaa.
– Soorlu Islandimi maannakkut ajornartorsiutaaleqqavoq, tuluttut oqaatsit pingaarnertut tullertut inissisimagamik Islandimi, taava taakkua tuluttut oqaatsit nukittoorujussuugamik, taava Islandimiut namminneq oqaasii maannakkut allaat navianartorsiortutut taaneqartalerput, Elna Thomsen Heilmann oqarpoq.
Kalaallit oqaasiinik illersuisoq
Siulittaasup nunatsinni allamiut oqaasii pillugit suliat ukkatarivallaarnagit nunatsinni nammineq oqaatsigut, tassa kalaallisut, sammineqarlutillu nukittorsarujussuarneqarnissaat kissaatiginerugaluaqaa.
IMAK-ip sinniisoqarfianut ilaasortat ataatsimeersuartarneranni kingullerni arlalinni eqqaaneqartunut ilaasartoq tassaavoq, meeqqat tuluit oqaasiinik atuinerat ilaatigut kalaallit oqaasiinik atuiunnaarnerannik kinguneqartartoq. Taamaattoqartillugu meeqqap ilinniartitsisullu akornanni attaveqatigiinniarneq ajornakusuulersinnaasartoq pissutsit maanna pissusiviusunngortut takutippaat.
Inatsisartullu maanna aalajangernerat suliarineqalertupallassappat ajornartorsiut tamanna sukariaannarluni ingerlalersinnaammat siulittaasoq, kalaallit oqaasiinik illersuisuusuusoq, aarlerivoq.
– Taanna ersissutigivara, Elna Thomsen Heilmann oqarpoq.
Siulittaasoq: Kalaallit oqaasii nukittorsarneqarnerujussuusariaqarput
Kalaallisut oqaatsit inunnit 1000-likkaanit arlaqanngitsuinnarnit atugaapput. Tuluit oqaasii pingaarnertut tullinngussappata tamanna kalaallit oqaasiisa tammariartupallassinnaanerannik kinguneqarsinnaanera aarleqqutaavoq. Kalaallisummi oqaatsinut ilinniutit maannamit amerlanerullutillu pitsaanerusariaqaraluarnerat siulittaasup kissaataanut aamma ilaavoq.
– Isumaqarpunga maannakkut piffissaanngitsoq tuluttut oqaatsit nunatsinni oqaatsit pingaarnerit aappaattut siullertut inissinneqarnissaannut. Kalaallisut oqaatsigut nukittorsarneqaqqaartariaqarput.
– Allaat meeqqat atuarfiani atuartitsinermut atortussat, kalaallisut allassimasut, pitsaassusillit, toqqagassat amerlanerujussuusariaqarput, Elna Thomsen Heilmann naggasiivoq.
