Atuarfik Kilaaseeqqami massakkut atugassarititaasut timikkut tarnikkullu peqqinnanngitsorujussuupput. Atuarfimmi ilinniartitsisuusugut atukkatsinnik naammatsilluinnarpugut. Atuarfik najorlugu peqqinnanngilluinnarpoq. Ilinniartitsisut atuartullu amerlasuut assigiinngitsutigut sunnerteqqaneri ajorsigaluttuinnarput. Atuartuni ilinniartitsisunilu napparsimasarnerit akulikilligaluttuinnarlutik. Maani atuarfimmi ulluinnarsiutaavoq atuisuni: Niaqorlunnerit, timikkut anillattoornerit, toqqusaakkut ungillerinerit, timitigut nukillaanganerit, isit sigguillu sinai panertut, anernikilliornerit, sorlukkut milittoortarnerit, qasoqqarujussuartarnerit, napparsimasutullu misigisarnerit.
Peqqinnanngilluinnartutut sulisutut ulluinnarni najortuarnissaa naammatsiffigilluinnarparput.
Imaanngilaq atuarfimmi atorfilittut sulerusunnginnatta, atorfeqartummi arlalissuit ilerasuutigisarpaat allatut ajornartumik sulinngittariaqarnertik. Illup iluata silaannaata ajornerani unammillernartarpoq suliartortariaqartarneq nalunagu angerlaraanni ilaqutat ilagalugit inuummarippallaassanani, soorlu niaqorlunneq imaluunniit ersiutaasinnaasut arlaat atorlugu. Ilumoorsinnaanngilarmi atuarfitsinni atorfilittut suliartoraanni napparsimalernissaq.
Iluarsartuussineq sioqqullugu ersersinneqarpoq init arlallit ajungaaramik piumasarineqartoq atoqqilersinnagit iluarsartuunneqartariaqartut.
Ininik arlalinnik iluarsartuussinermi sanasut illersuutilerlutik atisaqarput maskelersoqqallutillu.
Sanasut ininik iluarsartuussinerminni illersuutilinnik atisaqaraluartut init iluarsartuussaat parnaaqqanngillat, atuartunut ilinniartitsisunullu illersuuseqqaanngikkaluarluni iserfigineqarsinnaallutik.
Iluarsartuussereernerup kingunera malunnarpoq init silaannai suli ajortut.
Paasineqarpoq illup saqqaa oqaqartoq, klassini atuartitsivinni malunnarluni. Naluneqanngilaq illup saqqaani oqoqartoq, naatsorsuutigineqarsimallunilu illup silaannaanut sunniuteqarnavianngitsoq… Nakorsaasariaqanngilagummi paasissallugu oquk peqqissutsimut ulorianarluinnartuusoq, taava sooq uagut ilinniartitsisut atuartullu ullut tamaasa misigitinneqartassagut?
Massakkut atuarfimmi pisoq pillugu, ilinniartitsisut arlaqartut soraarniuteqarlutik tulleriiarput, ilinniartitsisut arlallit napparsimallutik sulinngiffeqarput, kialluunniit atugassarititaasut massakkut atorsinnaajunnarpai. Misigivugut nilliaateqartuaraluarluta tusaajumaneqanngitsutut misigaluta.
Pingaartumik ukioq una atuarfiusoq aallartittoq ilinniartitsisut sulinerat artukkerluinnarneqarpoq, kingullertigut suliunnaartartut eqqarsaatigalugit, sulilu soraarniuteqarusuttut arlaqarlutik taamaalilluni sulinerput oqilisinneqarnaviarani.
Qulliunerusunimi ataqatigiissaarisunit isumakulunnarsimassagaluarpoq ullut tamaasa meeqqat inersimasullu taamak atugassarititaasunut ajortigisunut nassiuttassallugit.
Oqartussaaqataasunik annerusumik atorfissaqartitsivugut, ikiorneqarnissatsinnik pisariaqartitsivugut, taamaattumik peqatigiiffitsinnit IMAK-imit, sullivinnik nakkutilliisoqarfimmiit iliuuseqartoqarnissaanik tapersersorneqarnissatsinnillu piumasaqaateqarpugut naatsorsuutigalugu ilissi suliassaq suliarisinnaagissi uagummi aporfilersorneqartuaratta.
Atuarfik Kilaaseeqqami IMAK-ip iluani suliamut tunngasumik klubbi sinnerlugu.
TR
Tuperna Lyberth
