Meeqqat atuarfianni nukarlerni atuartut faginik danskisut tuluttullu atuartinneqaannartassappat? Tamanna Naalakkersuisut inatsisissatut siunnersuutaanni erseqqissumik allaqqanngimmat, Naalakkersuisut ersarissuliortariaqarnerat IMAK-ip kissaatigaa.
—
Ilinniartitsisut Meeqqat Atuarfianneersut Kattuffiat, IMAK, meeqqat atuarfianni inatsisissaq pillugu paatsuugassuteqarlunilu paasiuminaatsitaqarpoq.
Naalakkersuisut inatsisissatut siunnersuutaanni maanna Inatsisartuni suliarineqartumi, tassa immikkoortoq 35-imi, allaqqavoq alloriarfimmi nukarlerni atuartut kalaallit, danskit tuluillu oqaasiinik atuartinneqartassasut.
Taamaattorli inatsissatut siunnersuutip nassuiaataani allaqqavoq, danskit tuluillu oqaasiinik atuartitsinermi aallarniutitut oqaatsit taakkua atuartitsissutigineqassasut. Tassalu IMAK-ip tamanna paasiuminaatsippaa.
– Siunnersuut malillugu danskisut tuluttullu aamma fagitut atuartitsisoqartassava? Imaluunniit allassimasut malillugit oqaatsit taakkua “aallarniutitut” atuartitsissutaassappat? Taamaassimassappat “aallarniutitut” atuartitsineq qanorpiaq paasineqassava? Ilinniartitsisut tamanna nalunngittariaqarpaat. Maannakkullu suliarineqartumi tamanna erseqqinngilaq, kattuffiup siulittaasua, Elna Thomsen Heilmann, oqarpoq.
IMAK: Nukarlerni kalaallisut naammappoq
Alloriarfinni nukarlerni atuartut, tassa 1-3. klassit, kalaallisuinnaq atuartinneqartarnissaat inatsisissatut siunnersuut tamanut tusarniutaaqqaarmat allassimavoq. Tamannalumi aamma IMAK-ip anguniagaanut, kattuffiullu qullersaani, Sinniisoqarfimmi oqallittarnernut naapertuuppoq.
Inatsisissatulli siunnersuut Naalakkersuisut Inatsisartunut qaqikkamikku tamanna allanngorpoq. Taamaattumik maannakkut paatsuuganartuliorneq apeqquserneqarpoq.
– Paaserusunnarpoq Naalakkersuisut suna siunertaralugu maannakkut taamatut allannguutissamik allanngueqqinnersut. Sooq taamatut nalileeriataarpat? IMAK-ip siulittaasua, Elna Thomsen Heilmann apeqqusiivoq.
Allanngortoqangaarnissaa qularaa
IMAK-ip inatsimmik allannguineq pitsaasumik kinguneqartoq takorusuppaa. Tamannali maanna siunnersuummi takujuminaatsinneqarpoq.
– Inatsit maanna atuuttoq taava atuunniarli allanngortinnagu, taama allanngortitassanngugaat annikitsigisut. Atuartut atuarnikinnerulernissaannut atuartut pitsaassusilimmik angusaqarnissaannut qulakkeerinninnavianngilaq.
– Ullumikkummi nunatsinni piffinni amerlaqisuni atuartuutitta akornanni attaveqaqatigiinnermi kalaallisut imminnut oqaloqatigiinneq ajorput, allaat angajoqqaaqarpoq meeqqaminnik iluamik attaveqaqatigiissinnaajunnaartunik, meeqqat tuluttuinnaq attaveqaqatigiinneq atuleqqagamikku.
– Uaniuna qulakkeerniarneqaraluartoq atuartut mikinerit oqaatsigut aallaavigalugit atuartinneqarnermikkut kalaallisut, inuiaqatigiilerineq, matematikki assassorissanilu kalaallisut oqaatsit atorlugit atuartinneqarnermikkut piginnaasaat tunngaviusumillu pigisassaat qulakkeerusukkaluarigut, tullissaanut oqaatsinik allanik atuilernissaannut nukittuffeqarneruniassammata, Elna Thomsen Heilmann oqarpoq.
Attaveqarfissaq: IMAK-ip siulittaasua, Elna Thomsen Heilmann, elh@imak.gl, 52 33 45.
Inussiarnersumik inuulluaqqusillunga
Elna Thomsen Heilmann
Siulittaasoq
