Marlunngorneq 4. februar 2025 KNR-imi Illeq immikkut aallakaatinneqarmat partiit siulittaasui apersorneqarput.
Qineqqusaarneq aallartiinnartoq meeqqat atuarfiat suliassinneqarpallareerpoq. Qinersisinnaasut ikippallaartut qinersiartortarnerannut atatillugu partiit siulittaasuisa ilaasa suliassaq Meeqqat atuarfiannut miloriuteriikatappaat. Tamanna nalinginnaavallaaqaaq.
Meeqqat atuarfianni inuiqatigiilerinermi inuiaqatigiinnut tamat oqartussaaqataanerat tunngavigalugu ingerlasunut ineriartornerannullu tunngasut ilinniartitsisut ingerlaavartumik suliassaannut ilaareerput aammalu atuarfiit tamat oqartussaanerannut ulloqartitsinikkut immikkut sammisareerpaat sammiuarlugillu, pineqartummi ilikkagassatut anguniagassaneereerput.
Inuiaqatigiit qinersiartortarnerannut atatillugu inuiaqatigiit peqataasutut misigalutik akisussaaqataassappata atuarfillu aallaaviussappat aallarniutissat ilagisinnaavaat atuarfiit aqunneqarnerinut atatillugu atuarfinni siulersuisut oqartussaanerisa annertusaaffiginissaat. Taamaaliornikkut atuarfimmiinnermi malugineqaleriissammat oqartussaaqataaneq.
Ukiuni arlalissuanngortuni inatsisartuni kommunalbestyrelsenilu qinikkat qulaaniit, atuarfimmi klassinut isinngiluatsiaannartutut illutik, naalakkiisarnerat atuuppallaarujussuaqaaq.
Atuarfinni pisariaqartinneqartoq tassaavoq atuarfiit, ilinniartitsisut, angajoqqaat atuartullu suliniutaasa ineriartortikkusutaasalu politikkerinit tapersersorneqarnissaat inissaqartinneqarnissaallu.
Qinikkat aamma iliuuseqarfigisinnaavaat ilinniartitsisut qitiusumit pikkorissartinneqartarnerannut ilinniaqqittarnerannullu aningaasatigut annikillisaasimanerujussuup iluarsiiffigineqarnissaa. Ukiuni makkunani nunatsinni avatitsinnilu ineriartorneq taama sukkatigitillugu pikkorissartuarneq ilinniaqqinnerlu aqqutissaapput.
Meeqqat atuartitsinermi atortussatigut assigiinngitsunik atugassaqartitaallutik atuartinneqarput. Mernguernartunik atuartitsinermi atortussat kommunit ilaannit sipaarniarfigineqartuarput taamaattumillu assassorissanik assigisaannillu atuartitsinermut pitsaasumik ineriartuutaasinnaasumillu ingerlatsineq tusialluni.
IMAK-imiit qineqqusaartut eqqarsaluaqqaarlutik misissuilluaqqaarlutillu qineqqusaarnissaat kaammattuutigaarput.
IMAK-imi siulittaasoq
Elna Heilmann
