Asasara Elna,
Nammaqataalluni tapersersuinermik nalunaarut
NASUWT – Tuluit Nunaanni Ilinniartitsisut kattuffiat – sinnerlugu allappugut uppernarsarumallugu IMAK Kalaallit Nunaannilu ilinniartitsisut maanna imaannaanngitsorsiornermi peqatigilluinnaratsigit.Naqisimaneqarneq unamminartullu aqqusaakkasi eqqumaffigilluinnarpagut, taakkununnga ilanngullugit qunusaarinerit piviusut annertusiartortullu maanna aqqusaakkasi, Amerikamiut naalakkersuisoqarfiannit Kalaallit Nunaat pillugu oqaaserineqartartut, taamatullu pinngitsaaliiniarnikkut politikkikkut ingasaassisumik naqisimanninniarnerit sakkutuulersuussiniarnerit eqqunngitsunillu paasissutissiinerit. Ilissitut suliaqartutut aamma Education International-imit kiisalu ETUC-mut ilaasortatut miserratiginngilarput pissutsit taamaattut takorluugaannaanngimmata imaluunniit ungasissorsuarmi pisuullutik, ullulli tamaasa ilinniartitsisunit Kalaallit Nunaanni tamarmi inini atuartitsivinni inuiaqatigiinnilu sulisunit misigineqartarlutik — arlalitsigut sumiiffinni avinngarusimasuni ilungersunartunik atugaqarfiusuni aamma kinguaariinnut nutaanut annertuumik akisussaassusermik misigissuseqarluni sulisunut.
Ilinniartitsisut sumiikkaluartulluunniit ilisimalluarpaat ilinniartitaaneq kulturimut, oqaatsinut, kinaassutsimut aamma inuiaat nammineq siunissaminnik aalajangiinissamut pisinnaatitaaffeqarnerinut avissaartinneqarsinnaanngitsumik attuumassuteqartoq.
Ilinniartitsisut kalaallit qangaaniilli kuluturikkut kingornussaminnik ingerlatsisut inuusuttunillu ilinniartitsisuusut, akisussaaffik tamanna sapiissuseqarlutik erseqqissumillu tigummivaat.
Oqaluttuarisaanermik paasinninnersi aamma pisinnaatitaaffiit, nukissatigut sillimmatit aamma nammineq aalajangiisinnaaneq avataaniit sioorasaarinertigut qanoq pisoqarsinnaaneranik paasinninnersi, uagutsinni qamannga pisumik ataqqinninnermik pilersitsivoq.
Aamma Kalaallit Nunaanni innuttaasut aalajaassusiat maluginiarparput, nunap oqaluttuarisaanerani aatsaat taama annertutigisumik akerliussutsimik takutitsisoqarneratigut ersersinneqartoq aamma kattuffiit – soorlu SIK-p – siuttuunerisigut ersersinneqartoq. Soorlu ETUC-p
erseqqissumik oqaatigigaa, Kalaallit Nunaata inissisimanini ersarissumik nalunaarutigaa: innarligassaannginneq, ataqqinassuseq ataqqeqatigiinnerlu nunap siunissaanut naleraasariaqartut, aamma avataaniit naqisimanninniarneq pinngitsaaliiniarnerlu akuerineqarsinnaanngitsut.
Education International, ETUC aamma suliamut atatillugu kattuffiit ataatsimut isigalugit isumaqatigilluinnarlugit IMAK-imik ilaasortaanillu tapersersuinerput oqariartuutigaarput.
Pissaanillit avataaneersut kikkulluunniit Kalaallit Nunaanni nunallu siunissaa pillugu aalajangiinissamut inatsisitigut pisinnaatitaaffeqanngillat. Oqartussaaffik tamanna inuiaat kalaallit – ukiuni untritilikkaanik nunaminnik, kulturiminnik inuiaqatigiinnillu isumaginnillutillu ataavartitsisimasut – kisimik pigivaat.
Ulluni maannatut ittuni nunat tamalaat akornanni suliamut atatillugu nammaqatigiinneq tassaanngilaq allat sinnerlugit oqaaseqarnissaq, kisiannili pineqarluni ataqatigiinnissaq. Qularissanngilarsi Tuluit Nunaanni Europamilu ilinniartitsisut tamarmik maanna pisut qanimut malinnaavigimmatigit — ernumallutik, paasinnillutik kattuffissinnik ilaasortaanik naapertuilluarnermillu aalassatsinneqarsinnaanngitsumik tapersersuillutik.
Inussiarnersumik inuulluaqqusillunga
Matt Wrack
General Secretary
20. januar 2026
