Ilinniartitsisut sulisooreersut, ilinniartitsisut naammasserlaat sulileqqammisut, atuartitsisut pisortallu tamassi atualernissinni pilluaritsi. Neriuppunga aallartilluartusi, qanortoq ukioq atuarfiusoq nutaaq pitsaasumik angusaqarfioqqikkili nuannersuullunilu.
Ilinniartitsisutut piginnaasaqarneq
Maanna suleqatigiillusi ukioq atuarfiusumut 2026/27-mut piareersaatigisimasasi piviusunngortinniarlugit sulisussanngorpusi. Ilinniartitsisunngorniarnissinni ilikkarnikuusasi, ilisimaarilikkasi taamatullu sulisuunissinni atuartitsitsinikkut pigiliunnikuusasi pamersaanermillu tunngaveqartunik ilikkarsartitsinissinni misilittakkasi aallaavigisussanngorpasi. Ilikkagassatut anguniagassat aallaaviussapput, saniatigullu pingaartinneqartussaalluni piffissinni immikkut ukkatassatut isumaqatigiissutigisimasassi.
Sammititasilu aallaavigalugit atuartuutissi piginnaasatigut, atuagarsornikkut inuttullu ilikkassaneraat ineriartuutigiumaarneraallu nalilersortuassallugit. Tassa imaappoq; ilinniartitsisut piginnaasaqarnersi qitiutillugu anguniakkallu aallaavigalugit meeqqat atuarfianni suleqatigiinnersi sullissinersilu ilusilersorsimassavarsi.
Misissuisarnerit ilisimatusarnerillu takutittuarpaat, meerartatta siunissaat pineqartillugu inuiaqatigiinni meeqqat atuarfiat qanoq qitiulluinnartigisoq. Taamatullu ilinniarsimasuunerup inuiaqatigiinni kivitsinissamut pingaaruteqassusia naqissuserneqartuarpoq.
Isumaqarpunga nunatsinni inuiaqatigiit paasiartuleraat meeqqat atuarfiat qanoq isumaqartigisoq. Taamaattumik meeqqat atuarfiini tamani pitsaassusilimmik ilinniartitsisutut piginnaasaqarnissap aallunneqartuarnissaa pingaartinneqartuartariaqarpoq.
Suleqatigiittut ataatsimuussuseqarneq
Maanna ukioq atuarfiusup nutaap aallarteqqinnerani ilaasa suleqatit nutaat suleqatigilersimassavaat, nukiit nutaat, piumassusillit, suleqatinut aammalu atuartunut ilisimasanik inerikkiartuutaasunik immersuerusuttut ilikkartitserusuttullu.
Ilinniartitsisutut sulisooreersunut kaammattuutigerusuppara sulilerlaat peqatigilerluarniarsareqqullugit. Suliffissinnut sulilerlaat isertilluarsigit, ilinniartitsisutut suleqatigiinneq nassaareqatigiiffigilluarsiuk, sulilerlaat piffissaqarfigalugit suliffissinnilu aallartilluarnissaat suleqataaffigilluarlugu. Taakkuuppummi kissaatigut ukiorpassuarnilu meeqqat atuarfianni sullissilluallaqqusagut.
Qanortoq ilinniartitsisooqatigiillusi pisortasi peqatigalugit piginnaasassinnik avitseqatigiittarneq aammalu assigiimmik naleqartitaqarnikkut sullitanut suleqatigisanullu tatiginninnermik isaassigisi, taanna isumalerujussuuvoq tamanut.
Ilinniartitsisutut sumiiffimmi ilisimasat aallaavigalugit nalilersuisarnerat sulisitsisunit tapersersorneqassasoq naatsorsuutiginarpoq, taamaaliornikkut ilinniartitsisutut ataatsimuussuseqarneq ineriartortillugulu pilersinneqarsinnaammat.
Neriunnaqaaq nuannersumik ammasumik suleqatigiittut ataatsimoorfeqarnissarsi ikummarissartuassagissi. Eqqaamallugulu tamassi assigiinngitsumik isumaqarsinnaatitaavusi, taamaattumillu aamma naapigiaasinnaaneq pingaaruteqarluartuusoq.
IMAK-ip ukiup ingerlanerani sammisassaa ilaat
IMAK-imi suliarisartakkat saniatigut siulersuisut ukiarmi Sinniisoqarfiup suliakkiussaanik sulinerat ingerlassaaq. Tamatuma saniatigut, soorlu ilaasortatsinnut siammarternikuugipput, ukioq manna juunip aappani Namminersorlutik Oqartussanut atsiorluta isumaqatigiissuteqarnerput ilaasortatsinnut juunip naalernerani taasissutigitikkatsigu akuerineqarpoq. IMAK-imit naatsorsuutigaarput ukiap 2026-p ingerlanerani IMAK-ip isumaqatigiissutaasa ataani atorfillit akissaataat aaqqiivigineqassasut.
Uani tikilluaqqusillunga allagaqarninni ilinniartitsisutut piginnaasaqarneq ersersinniarsarivara. Tassunga ilaatigut pissutaalluni isumaqatiginninniarnitsinni naqissusertinniarnikuungatsigu pitsaanerusumik ilinniartitsisunullu amerlanernut pikkorissartarnerup ilinniaqqittarnerullu ingerlaqqilernissaa.
Ilinniartitsisut atuartitsissutigisartakkaminni pikkorissartuarnissaat naleqqussartuarnissaallu Namminersorlutik Oqartussanit kommuninilu sulisitsisunit pingaartinneqarluni ingerlanneqartariaqarmat. Ilisimavarput Naalakkersuisut kissaatigigaat angorusullugulu meeqqat atuarfianni atuartitsineq pitsaassusilik aammalu meeqqat atuarfiannit ingerlaqqittartut naammassinnittartullu amerlanerusut inuiaqatigiinni sullissilernissaat.
Saneqqunneqarsinnaanngilarlu ullumikkornit annertunerungaartumik pikkorissartarnerup ilinniaqqissinnaanerullu periarfissiilluartumik neqeroroorutiginissaat pisariqarmat.
Aappaattut, ilinniartitsisunngorniartartut amerlanerunissaat aammalu naammassillutik meeqqat atuarfianni ilinniartitsisutut sulisalernissaat tamatta soqutigisariaqarparput. IMAK-imit tamanna pillugu suleqataarusunnerput taasareerparput. Ilaasortagut kaammattorumavagut ilinniartitsisunngorlutik sulilertartut meeqqat atuarfianni sulisinnaanissaannut kaammattuillutillu peqatiginnilluarlutik ingiaqasiussisarnissaannik.
Ukiuni kingullerni ilinniartitsisunngorniarlutik aallartittartut amerlassusaat pisariaqartitatsinnut naapertuutinngillat. Ukiuni aggersuni ilinniartitsisut soraarninngortussat amerlassusaat eqqarsaatigalugit, nunatsinni meeqqat atuarfiat immikkut annertuumik ukkanneqarnissaa kissaatiginarpoq. Nunatsinni meerartatta pitsaassusilimmik atuartitaanerata appariannginnissaa killormulli pitsaassutsip qaffasinnerulernissaa anguniarlugu qinikkat tamarluinnarmik ataatsimoorfigisinnaasatsinnik suleqatigiissuteqartariaqarput.
Tamassi suliffissinni nuannersumik suleqatigiinnissassinnik kissaallusi, sulilluaqquassi!
Elna Heilmann
IMAK-imi siulittaasoq
