Aya Oshima ilinniartitsisutut 2024-imi naammassivoq. – Qaanaamit nooqqinnissara naatsorsuutiginngilara, eqqissineq tamaani najorpara. Ilinniartitsisoqatigiit ataqatigiilluarpugut, taanna oqarpoq.
—
Takorlooruk atuarfimmi ilinniartitsisutut atorfeqarfigisarni meeqqat atuartut angajoqqaavilu imaluunniit pilersuisuilu tamaasa annerusumik minnerusumilluunniit ilisarisimallugit. Tamanna Aya Oshimamut naliginnaasuuvoq. Aya Oshima Qaanaami Avanersuup Atuarfiani ilinniartitsisuuvoq.
Siorapalummiu, Aya Oshima, Ilinniarfissuarmi 2024-imi naammassigami ingerlaannaq Qaanaami atorfinippoq. Ilinniarnertuunngorniarfimmi ilinniartuutilluni ilinniakkamik naammassinnereeruni Qaanaamut angerlarluni avannarpaqqinnissani aalajangiusimareerpaa.
– Avanersuarmiuunera meeraaninniilli pingaartittorujussuuara. Inuusuttuuninni takorloortarnikuugaluarpara siunissami illoqarfinni allani najugaqarsinnaanera.
– Kisianni GU-mi atuarnerma nalaani qannartakkut misigisimasarpunga tammartajaaginnaavillunga, illoqarfinni allaniikkaagama. Nuannersorpassuarnik misigisaqartaraluarlunga kisianni qannartara toqqissivissinnaanani. Taava maanga uteraagama aatsaat toqqissisarlunga. Toqqissisimaffigisorujuuara avatangiiseq taama nuannertigisoq, sorusukkuma sumukarsinnaallunga, angalaaqataasinnaallunga piniariaqataallunga, Aya Oshima oqarpoq.
Taanna kalaallisut matematikkimilu 7-10. klassinut atuartitsisarpoq.
Ataqatigiilluarneq
Avanersuup Atuarfia 100-it missaannik atuartoqarpoq. Ilinniartitsisut qulit missaannik amerlatigipput. Taamaattumik ataqatigiinneq pitsaasutut ilinniartitsisup nalilerpaa. Meeqqat atuartitami piginnaasaqaleriartornerat sulisullu toqqissillutik sulinerat ilinniartitsisutut sulinermini nuannaarutiginerpaasaasa ilagaat.
– Meeqqat piginnaasamikkut qaffakkiartorneri malinnaavigalugit nuannersorujussuusarpoq. Suleqatigiit ilutsinni suleqatigiilluarsinnaanitta suliffik nuannersorujussuanngortittarpaa. Soorlu arlaannik pinarsinnaasunik suliaqariasaartoqartillugu toqqissisimaqqinnaarluta, susoqanngitsutut illuta, angalaarsinnaasarpugut taava atuartunut sunniinata.
– Maani atorfineqqaarama isiginiakkanni annerpaaq taannaavoq, pinartoqaraluartoq ilinniartitsisut eqqissiivillutik ingerlaartut arpasaqattaarnatik. Suliffimmi misiliiffiginikuusannitut innatik. Nilliasaqattaarnatik nipituuliornatik tassa eqqissiivillutik akisussaaffik tigusarpaat, Aya Oshima oqarpoq.
Qaanaami ilinniartitsisoqatigiit upernaakkut aasakkullu sammisaqaqatigiillutik angalaaqatigiittarput aalisariaatigalutik.
Nammineq oqaatsit atorlugit atuartitsineq
Qaanaami kitaamiusut oqaatsit amerlanerpaat ulluinnarni atunngilaat. Namminnermi oqaatsitik atorpaat. Tassalu taamaalilluni atuartut amerlanerpaartaat kitaamiut oqaasiinik ilitsoqqussaqanngillat. Atuakkat suliakkiutillu kitaamiusut allaqqapput, taakkualu ilaatigut atuartunit paatsoorneqartartut Aya Oshima oqaluttuarpoq. Taamaattumik avanersuarmiut oqaasii atorlugit atuartitsisoqakkajunneruvoq.
– Kinaassuserput, tassa avanersuarmiuunerput qiviassagutsigu atuakkat kitaamiutut allaqqagaluartut oqaatsigut atorlugit atuartitsineq ingerlassinnaasarparput. Maluginiakkakka malillugit maani sulisut amerlanerpaartaat kitaamiut oqaasii atornagit atuartitsisarput, taanna oqarpoq.
Aya Oshima peqqikkuni suli ukiorpassuarni ilinniartitsisutut sulisinnaavoq. Namminerlu aalajangiisinnaaguni maanna suliffini utoqqalinissami tungaanut najorusuppaa.
– Sulisinnaaneraluunniit tamaat najorusukkaluarpara. Soorunami aappaqarlungalu meeraqarama aamma taakkua nuuttariaqaleriasaassagaluaruma isumai tusaaniartariaqassuakka. Kisianni tassa tamanna toqqissisimavugut maani. Taava aamma namminerisannik illoqariarama, siunissami najulerumaagassatsinnik nutarteqqaalaariarlugu, taanna oqarpoq.
“Qaaniaritsi”
Avanersuup Atuarfia atuarfiit allat assigalugit arlalinnik ilinniartitsisussaaleqiffiusarpoq. Sulisullu nunatsinni illoqarfiit avannarpasinnersaanut ilinniartitsisunik suliartortoqarnissaa kissaatigiuaannaraat ilinniartitsisoq kinaassutsiminik pingaartitalik oqarpoq.
– Amigaatigaatsigit. Avanersuup avatangiisaa nuannersorujuuvoq. Meerartagut piuminartorujuupput inussiarnerlutillu. Suleqatigiit ilutsinni ataqatigiilluarpugut, suleqatigiilluarpugut avitseqatigiissinnaassuseqarlutalu, Aya Oshima oqarpoq.
