Education International, Utnord IMAK-ilu peqatigiillutik Nuummi aasaru ulluni marlunni ataatsimeersuaqatigiissapput. – “Pineqartilluta, peqataatilluta taamaallaat eqqartorneqassaagut” ataatsimeersuarnermi qulequtarineqassaaq, IMAK-ip siulittaasua oqarpoq.
—
Kalaallit Nunaata USA-p præsidentianit, Donald Trumpimit, uteqqiattumik aqunneqarluni pigilerusunneqarnera nunarsuaq tamakkerlugu oqallisaaqaaq. Sammisaq tamanna ilinniartitsisut silarsuaanni aamma oqallisigineqaqaaq.
Nunarsuaq tamakkerlugu ilinniartitsinermik suliaqartut kattuffissuat, Education International, nunani avannarlerni ilinniartitsisut kattuffiisa suleqatigiiffiat, Utnord, peqatigalugu ukiaq Nuummut, IMAK-imut, tikeraarput. Tikeraarnermi tassani nunatsinnut IMAK-imullu nukittuumik tapersersuineq takutinneqarpoq.
– Utnord sinnerlugu Magnús Pór Jónsson, Education Internationalimilu general sekretær, David Edward, Nuummut ukiaq septembarimi tikipput. Tassani IMAK taperserlugu nittarsaallugulu oqariartuuteqarput. Kattuffissuit taakkua suleqatigisatta nunatta nunanit allanit, pingaartumik USA-mit, aqunneqalersinnaanera, tatineqarnissaa tiguarneqarsinnaaneraluunniit akuerinngilaat. Education Internationalip nittartagaatigut nunarpassuit Kalaallit Nunaanut tapersiillutik taamani oqariartuuteqarput, tuppallernaqisumik, Elna Thomsen Heilmann oqarpoq.
Tikeraarneq malitseqartinneqassasoq
Naapeqqinnissaq ukiaq tikeraartoqarnermi isumaqatigiissutaavoq. Naapeqqinnissarlu qanoq iluseqassanersoq maanna paasinarsillunilu ilusissaqalerpoq. Tassalu kattuffiit taakkua peqatigiillutik Nuummi ataatsimeersuassapput. Ulluni marlunni, juunip arfineq-pingajuanit qulingiluaat ilanngullugu. ”Pineqartilluta, peqataatilluta taamaallaat eqqartorneqassaagut” qulequtarineqassaaq.
– Ataatsimeersuarnermi siunertanut pingaartunut ilaavoq, nunarsuarmioqatitta nunatsinni ilinniartitsisut kattuffiat qulequttani pingaarutilinni oqaloqatigisinnaagaat, eqqartueqatigisinnaagaat suleqatigisinnaagaallu paasitissallugit. Ilinniartitsisut nunarsuarmi kattuffii IMAK-i nunarpullu tapersersorpaat, taamaattumik pisariaqarfiini oqaaseqarsinnaasarnerat uatsinnut angisoorujussuuvoq, Elna Thomsen Heilmann oqarpoq.
Eqqartugassaaleqisoqassanngitsoq
Nunatsinni nunanilumi avannarlerni nunap inoqqaavisa ilinniartitaanikkut ajornartorsiutaat eqqartorneqartussanut ilaapput.
– Eqqartugassagut tassaapput: Sullivimmi avatangiisitigut atukkat, nunap inoqqaavisa ilinniartitaanikkut periarfissaat.
– Naggataatigullu aallartitaasugut tamatta ataatsimoorluta oqariartuuteqassaagut nunarput pineqartillugu, peqataatinneqarnissaq aammalu Kalaallit Nunaat tuniniagaanngitsoq naqissusissallugu, Elna Thomsen Heilmann oqarpoq.
Taassuma kikkut tamat oqartussaaqataanerat sakkortuumik illersortuullugu naqissuserpaa. Tamassuma qaqugumorsuaq atuunnissaa pillugu nunatsinni innuttaasut tamavimmik tamaviaaruteqartuarnissaannik siulittaasoq aamma neriuuteqarpoq.
Ataatsimeersuarneq kattuffiit iluminni ataatsimeersuarnerissavaat. Taamaattumik kattuffiit aallartitaat peqataassapput. IMAK-illi ilaasortat qaaqqusatut inissisimanngikkaluarlutik namminneq periarfissartik atorlugu ataatsimeersuarnissamut tusarnaartuusinnaanerat naatsorsuutigaa.
