IMAK-imi ilaasortanut
Ukioq 2022 aallartiinnaqaaq IMAK-imit sinerissatsinni ilinniartitsisut allallu ilaasortagut tamassi ukiortaami pilluaritsi, neriuppunga ukioq 2022 tamassinnut iluanaarfiusumik, pilluarnartumik peqqiffiusumillu atugassaqarfiujumaartoq.
Siullermik Ilaasortagut tamassi maannakkut assigiinngitsutigut unammillernarsinnaasumik inissisimanitsinni nersorpassi qujaffigerusullusilu pisussaaffissi ataqqillugu assigiinngitsutigut naammassiniartarassiuk.
Paasisinnaavassi ilinniartitsisutut sulinissinni, allamiluunniit suliffigisassinni pikkunartorsiorsimassagussi aammalu sulinersi uippakajaarnarsimappat. Taamatullu pisortatut sulisitsisutullu sulisut sulineranni sullitanullu peqqinnarnerpaamik pitsaanerpaamillu sullissinerup anguniarniarnerani piffissap sivitsup iluani atuarfimmi suleriaatsimik allannguisariaqartartunut.
Tamassinnut oqaatigerusuppara aatsaat taamak pingaaruteqartigilerpoq ilissi ilinniartitsisutut, allamiluunniit sulisutut sulisitsisutut pisortatullu atukkasi, isumaqatigiissutillu eqqortumik malinneqarlutik atuutsinneqarnersut eqqumaffigissallugit. Pingaaruteqarpoq isumaqatigiissutit malitassallu paasisimanissaat, tassani pisortasi IMAK-imilu sinniisusi atorluaqqunaqaat pineqartut paaseqatigiissutiginiarlugit.
Ullumikkut nunatsinni tamaavitta Covid 19-ip atuunnerani inissisimanitsigut kalluarneqaqqavugut. Sulinitsinni ikioqatigiinnissarput sulisutullu ileqqorissaarnissarput pisariaqarluinnarpoq. Neriuutiginaqaaq sulisut tamassi kivitseqatigiinnissamut suleqatiginninnissamullu isaassissasusi, aammalu sulisitsisut pisortallu ammasumik periuseqarlutik pitsaasumillu paaseqatigiiffiusumik pisinnaappata tamassinnut pitsaasumik naammassisaqarfiussaaq sullitallu toqqissisimanissaat qulakkiissallugu.
Pingaaruteqarluinnarpoq isumaqatigiissutit, najoqqutassat sinaakkutillu avaqqutaarlugit ingerlasoqannginnissaa.
Isumaqatigiissutinik sinaakkutinillu avaqqutaarinerit pileraangata sulisut toqqissisimajunnaartarput uippakajaalernissamullu qanittuararsuanngortarlutik. Sulisitsisunut taamaattut toqqittuaannarput sullitanullu kingunerluttarlutik toqqissisimajunnaarutaallutik.
Aap, sulisitsisut pisortallu piumaffigineqarput suligasuarnissamik; suligasuarnerilli aatsaat iluatsissinnaapput sulisut peqatigalugit aaqqissuisoqarpat. Allannguinissaq sioqqullugu sulisut tamarmik nalunngittariaqarpaat susoqalernersoq qanorlu iliortoqarniarnersoq; pingaaruteqarporlu sulinermi isumaqatigiissutit, najoqqutassat, sinaakkutillu malillugit allannguinissap aaqqissuunneqarnissaa.
Taamaaliornikkut qitiusumit maleruagassatut sinaakkusiarineqartut innersuunneqartullu aallaavigalugit sulisut pisortallu paaseqatigiiffiusumik kivitseqatigiinnissaat pilersinneqassammat.
Tamassi sulilluaqqinnissassinnik kissaappassi.
IMAK-imi siulittaasoq Elna Heilmann
