Siverth Rosing Maniitsumi Kilaaseeqqap Atuarfiani ilinniartitsisuuvoq. Marlunngornerilli tamaasa meeqqanik soraarummeertussanik angajoqqaavinillu piumasunik, kajumissutsiminik matematikkimi unnukkut atuartitsisarpoq.
Inersimasut unnukkut atuartinneqartarnerat tusarsaalluarpoq. Meeqqat atuartut ullukkut atuareerlutik amerlanerpaartaat unnukkut atuarnermut samminngitsunik sammisaqartarput.
Maniitsumili Kilaaseeqqap Atuarfiani atuartut angajulliit angajoqqaavilu marlunngornerit tamaasa unnukkut matematikkimi atuartinneqarnissamut periarfissaqarput. Siverth Rosing, ilinniartitsisutut ullukkut suleriarluni 2019-imiilli marlunngornerni unnukkut kajumissutsini atorlugu matematikkimi atuartitsisarpoq.
– Atorfininninnit 2007-imit artorsangaatsiarnikuuvunga fag-erpassuit tigummigakkit. Taava ukiut ingerlaneranni eqqarsaatigisalerakku uffami sunngiffinni atuartitsisaruma. Takusinnaajartuinnarakkit atuartut angajoqqaallu pisariaqartitsisut. Atuartut matematikkimi naammaginartumik takutitaqassappata pisariaqartitsisorujussuugamik atuartinneqarnissaminnut. Taava sunngiffinni unnukkut atuartitsisarlunga 2019-imi aallartippunga. Marlunngornerit tamaasa arfineq-marlunit qulingiluat tungaanut, Siverth Rosing oqarpoq.
Upernarnissaanut soraarummeerlutik misilitsittussat, tassa 10. klassit, kajumissutsiminik matematikkimi atuartitsisarnermini pingaarnerutittarpai. Angajullernili atuartut allat kajumittut aamma tikilluaqqusaasut Siverth Rosing oqaluttuarpoq.
Umiartortoq
Siverth Rosing ukiumi 50-inik ukioqalerfimmini ilinniartitsisutut ilinniarfissuarmi naammassilluni allagartartaarpoq. Tamanna sioqqullugu angallatit naalagaatut ilinniagaqarluni 1979-imit umiartortuulluni aalisartuullunilu piniartuuvoq.
– 1977-imit 1979-mut Nuummi skipperskolemi ilinniarpunga. Skipperitut naammassivunga. Taassuma kingorna, kilisaatini aquttutut naalakkatullu sulisarpunga. Kilisaatit ikilisarneqalermata allatut eqqarsalernikuuvunga. Piniartuulluni umiatsiaararsortuullunilu silap ajornerani suffissaaleqinarsisarpoq. Aningaasarsiorneq unilluni. Nuliama allamut ilinniarnissannik kaammattuleriarmanga taava aalajangerpunga Ilinniarfissuarmi atuarniarlunga, taanna oqarpoq.
Ilinniarnertuujunngitsoq
Siverth Rosing meeqqat atuarfianni 7. klassi naammassigamiuk atuarunnaarluni aalisartunngorpoq. Taamaattumik umiartortooreerluni ilinniartitsisunngorniartussanngorami angallatit naalagaattut ilinniakkami saniatigut allanik, soorlu ilinniarnertuutut, allagartaqanngilaq.
Tamannalu ilaatigut tunngavigalu ilinniartitsisunngorniarnissani akuerineqarmat imminut pisussaaffilerpoq.
– Neriorsuillunga ilinniarninni peqataajuaannaavissallunga. Taannalu eqqortinnikuuara qujanartumik. Napparsimanngiivillunga atuanngitsuunngiivillungalu ukiut sisamat. Iluatsilluarpoq, Siverth Rosing oqarpoq.
«Inuunerput matematikkiuvoq»
Ilinniartitsisup siusinnerusukkut umiartortuusimasup matematikki pingaarnertut atuartitsissutigisarpaa. Taamaattumillu atuartitsissut taanna pingaartittupilussuuaa. Pingaartitsininilu ima nassuiarpaa:
– Inuunerput matematikkiuvoq. Ullaakkut iterutta nalunaaqutaq, matematikkiuvoq. Pisukkutta allornerit, nerigutta, suulluunniimmi qanoq nerinigut allaat naatsorsorsinnaavagut. Pisukkutta allornerit, kaloriat katatat, kilometerit, tiimit. Taamaattumik oqartartunga inuunerput matematikkiuvoq, sunulluunniit naatsorsorsinnaallugu. Tamakkua tamaasa ilinniartitsininni tikillattaartarpakka.
Atuartitsissutissanik nammineq suliaqarneq
Atuartut kajumissutsimik atuartitassami suliassaat nammineerluni aamma piareersarlugillu suliarisarpai. Tassa siornatigut suliani atuakkallumi isumassarsiorfigalugit atuartut angajoqqaallu unnukkut suliassaat piareersartarpai.
– Soorlu initussuseq, annertussuseq, pythagoras, procentilerinerit, diagonalit, agguaqatigiisitsinerit ulluinnarnut tunngasinnaasut assigiinngitsut aallaavigalugit atuartitsissusiorneq ingerlasarpoq. Taavalu taassuma saniatigut kaasarfimmi piareersimasuuteqarnissaq, akunnattoornaveersaarluni, unittoorutaasinnaasut sapinngisamik pinaveersaarlugit, Siverth Rosing oqarpoq.
Kajumissutsimillu marlunngornikkut siunissami atuartitsiinnarnissani maannamut pilersaarutigaa.
– Sapinngiivippunga, suli atuartitsinissara naatsorsuutigaara, Siverth Rosing naggasiivoq.
